މާދަމާ އިން ފެށިގެން ބޭސްފަރުވާއަށް އިންޑިޔާއަށް ދިއުމަށް ވިސާ ނަގާކަށް ނުޖެހޭނެ

މާދަމާ އިން ފެށިގެން ބޭސްފަރުވާއަށް އިންޑިޔާއަށް ދިއުމަށް ދިވެހިން ވިސާ ނަގަން ނުޖެހޭނެއެވެ. މިގޮތަށް ހަމަޖެހިގެން މިދިޔައީ ފާއިތުވި ޑިސެމްބަރު މަހު ސަރުކާރުން އިންޑިޔާ އާއި އެކު ސޮއިކުރި ވިސާ އެގްރިމަންޓުގެ ދަށުންނެވެ.

މާދަމާއިން ފެށިގެން އަލަށް ސޮއިކުރި ވިސާ އެގްރިމަންޓަށް އަމަލުކުރަން ފަށާއިރު އިންޑިޔާއަށް ދަތުރުކުރާ ދިވެހިންނަށް މާދަމާއިން ވިސާ ހޯދުމުގައި ފަސޭހަތަކެއް ލިބިގެން ދާނެއެވެ.

އާ އެއްބަސްވުމުގެ ދަށުން ބޭސްފަރުވާގެ ކަންކަމަށް އިންޑިޔާއަށް ދާ ފަރާތްތަކަށް ވިސާ އަކާއި ނުލައި 90 ދުވަހަށް އިންޑިއާގައި ހުރެވޭނެއެވެ. މީގެ ކުރިން އަމަލުކުރަމުން އައި ގޮތަށް ބަލާއިރު ބޭސްފަރުވާއަށް އިންޑިޔާއަށް ދާ ފަރާތްތަކުން ރާއްޖޭގައި ހުންނަ އިންޑިއާ އެމްބަސީ މެދުވެރިކޮށް ވިސާއަށް އެދެން ޖެހެއެވެ.

90 ދުވަހަށް ވުރެ ގިނަ ދުވަހުގެ މުއްދަތަކަށް މެޑިކަލް ވިސާއަށް އެދޭ ފަރާތްތަކުން މާލޭގައި ހުންނަ އިންޑިއާ އެމްބަސީއަށް ހުށަހަޅައިގެން ހަ މަސް ދުވަހަށް ނުވަތަ އެއް އަހަރާ ހަމައަށް ވިސާ ލިބޭނެ އެވެ.

މީގެ އިތުރުން އިންޑިޔާގައި ތައުލީމް ޙާސިލްކުރާ ދިވެހިންނަށް ވެސް ފަސޭހަ އިންތިޒާމްތަކެއް ވަނީ ހަމަޖެހިގެން ގޮސްފައެވެ. އެގޮތުން ސަރުކާރު ގަބޫލުކުރާ މަރުކަޒެއްގައި ފުލްޓައިމް ޕްރޮގްރާމެއްގައި ބައިވެރިވާ ދަރިވަރުންނަށް، ކޯހުގެ މުއްދަތަށް (ގިނަވެގެން ފަސް އަހަރު ދުވަހަށް) މަލްޓިޕަލް އެންޓްރީ ސްޓޫޑަންޓް ވިސާ ހަމަޖެހޭނެއެވެ.