މިދިޔަ ދޮޅުމަހެއްހާ ދުވަހުގެ ތެރޭގައި ބިލިއަނެއްހާ ޑޮލަރުގެ ދަރަނި އަދާކުރެވިއްޖެ: ރައީސް
ލިޔުންތެރިޔާ
އަބްދުﷲ ހުސައިން
މިދިޔަ ދޮޅުމަހެއްހާ ދުވަހުގެ ތެރޭގައި ބިލިއަނެއްހާ ޑޮލަރުގެ ދަރަނި އަނބުރާ ދެއްކިއްޖެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ވެރިކަންކުރާ މައި ޕާޓީ ކޮންގްރެސް ޕާޓީގެ ޖަލްސާގައި ވާހަކަދައްކަވަމުން ރައީސް ޑރ.މުހައްމަދު މުއިއްޒު ވިދާޅުވީ، މި ސަރުކާރުގެ އަމާޒަކީ ވަށާޖެހޭ އިގްތިސާދީ ސިޔާސަތެއް ތަންފީޒުކޮށްގެން ކުރިއަށްގެންދިއުންކަމަށެވެ. އެގޮތުން ކުރެވެމުންދާ މަސައްކަތްތަކުގެ ދަށުްނ މީގެކުރިން ބޮޑެތި އަދަދުތަކުން ނަގާފައިވާ ދަރަނިތައް ކާމިޔާބުކަމާއެކު ދައްކައި ހަލާސްކުރަމުންގެންދާކަން ރައީސް ވިދާޅުވިއެވެ.
ރައީސް ވިދާޅުވީ، މިދިޔަ ދޮޅުމަހެއްހާ ދުވަހުގެ ތެރޭގައި 974 މިލިއަން ޑޮލަރުގެ ދަރަނި އަނބުރާ ދައްކާފައިވާކަމަށެވެ. މީގެ ތެރެއިން އެންމެ ބޮޑު އަދަދަކީ މިދިޔަ ދައުރުގައި ނަގާފައިވާ ބޮޑު ސުކޫކްކަން ރައީސް ފާހަގަކުރެއްވިއެވެ. ރައީސް ޑރ.މުއިއްޒު ވިދާޅުވީ، މި ސަރުކާރުން ދަރަނިތައް އަދާކުރަމުންދަނީ، އެ ދަރަނިތައް ނެގުމަށް ރަހުނުކޮށްފައިވާ ހަރުމުދާތައް އަނބުރާ ދައުލަތަށް ހޯދުމާވެސް އެކުގައިކަމަށެވެ.
އެ ސުކޫކުގެ ދަރަނި 524 މިލިއަން ޑޮލަރު އަޅުގަނޑުމެން ދެއްކިއިރުގައި އަޅުގަނޑުމެންގެ ވަރުގަދަ ހަރު މުދާތައްވެސް ވަނީ ރަހުނުކޮށްފައި. އެ ރަހުނުންވެސް ސަލާމަތްކޮށް މިހާރު ވަނީ ރައްޔިތުންގެ އަތްމައްޗަށް ގެނެސްދީފައި
ރައީސް ވިދާޅުވީ އަދުގެ ސަރުކާރު ވެރިކަމާ ހަވާލުވިއިރު ޤައުމު އޮތީ އިގްތިސާދީގޮތުން ވަރަށްބޮޑު އަނދަވަޅަކަށް ވައްޓާލާފައި ކަަމަށާއި، މި ސަރުކާރުން ވަށާޖެހޭ އިގްތިސާދީ ސިޔާސަތެއް ތަންފީޒުކޮށް ދަރަނިތައް ދައްކައި ރައްޔިތުންނަށް ފަހިވާނެހެން ކަންކަން ކުރަމުން ގެންދާކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
