ބަންކަރިން ޚިދުމަތް ހޯދާ ބޯޓުތަކުގެ ކުނި މެނޭޖް ކުރަން ވެމްކޯއަށް ހަވާލުކުރަން އެއްބަސްވުމުގައި ސޮއިކޮށްފި

އިހަވަންދިއްޕޮޅުގައި ބަންކަރިން ޚިދުމަތް ފޯރުކޮށްދޭ ބޯޓުތަކަށް ކުނި މެނޭޖް ކުރުމުގެ ޚިދުމަތް ދިނުމަށް މޯލްޑިވްސް ޕޯޓް ލިމިޓެޑް (އެމްޕީއެލް) އަދި ވޭސްޓް މެނޭޖްމެންޓް ކޯޕަރޭޝަން (ވެމްކޯ) ދެމެދު އެއްބަސްވުމެއްގައި ސޮއިކޮށްފިއެވެ.

އެމްޕީއެލް ހެޑް އޮފީހުގައި މިކަމަށްޓަކައި ބޭއްވި ޚާއްސަ ރަސްމިއްޔާތެއްގައި އެމްޕީއެލްގެ ފަރާތުން ސޮއިކުރެއްވީ އެ ކުންފުނީގެ ސީއީއޯ މުހައްމަދު ވަޖީހު އިބްރާހީމެވެ. އަދި ވެމްކޯގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު މުޖުތަބާ ޖަލީލެވެ.

އެއްބަސްވުމުގައި ސޮއިކުރެއްވުމަށްފަހު ނޫސްވެރިންނަށް މައުލޫމާތުދެއްވަމުން ވަޖީހު ވިދާޅުވީ، އުތުރު ގޭޓްވޭއިއަށް ބޯޓުތަކުން މި ކުނިތައް ޑިސްޗާޖް ކޮށްލުމުން ވެމްކޯއިން ކުނިތަކާއި ހަވާލުވެ، ކުނިތައް ނައްތާލާނެކަމަށެވެ. މިކަމަށްޓަކައި، ވަކި ރަށެއްގައި މިކަމަށް ހާއްސަކޮށް ތަނެއް ހެދިގެން ކުރިއަށްދާ ގޮތަށް ވިސްނުން އެބަހުރިކަމަށް ވަޖީހު ވިދާޅުވިއެވެ.

"އުތުރުގައި ފެށޭ ބަންކަރިން ސާވިސް އާއި ގުޅިގެން، އަޅުގަނޑުމެންގެ އުތުރު ގޭޓްވޭއިއަށް ބޯޓުތަކުން މި ކުނިތައް ޑިސްޗާޖް ކޮށްލާނީ، އެތަނުން ހާވާލުވާނީ ވެމްކޯ، ވެމްކޯއިން ގޮސް އެ ބޭފުޅުން ނައްތާލާ ގޮތަށް ކުރިއަށްގެންދާނީ. ވެމްކޯއާއެކު އެމްޕީއެލްގައި ޕްލޭންތަކެއް އެބަހުރި ވަކި ރަށެށްގައި މިކަމަށް ހާއްސަކޮށް ތަނެއް ހެދިގެން ކުރިއަށްދާ ގޮތަށް."

ވަޖީހު ވިދާޅުވިއެވެ.

ވަޖީހު ވިދާޅުވީ، މި ޚިދުމަތް ފެށުމުން މިކަމުން ވެމްކޯއަށް އަދި އެމްޕީއެލްއަށްވެސް އާމްދަނީ އިތުރުވެގެންދާނެ ކަމަށެވެ.

މީގެ އިތުރުންވެސް، ވެމްކޯގެ މެނޭޖިން ޑިރެކްޓަރ ވިދާޅުވީ، މި ޚިދުމަތް ދޭއިރު ވެމްކޯއިން ބޯޓުތަކުން ކުނި ނެގުމުގެ އިތުރުން "ޔޫޒްޑް އޮއިލް" ވެސް މޭނޭޖް ކުރުމުގެ ޚިދުމަތް ފޯރުކޮށްދޭނެ ކަމަށާއި، އެކަމަށް ޚާއްސަކޮށް ޤާއިމް ކުރެވޭ ސެންޓަރުން ކުނިތައް ކުނބުރުދޫގައި ޤާއިމުކުރެވޭ ރީޖަނަލް ވޭސްޓް މެނޭޖްމެންޓް ސެންޓަރަށް ގެންދެވޭނެކަމަށެވެ.

"އަޅުގަނޑުމެންގެ ޕްލޭނަކީ އެތަނުގައި ހަމަ ޔޫސްޑް އޮއިލްއަށް ހާއްސަ ޓޭންކެއް ބަހައްޓައިގެން އެ ރިފައިންކޮށްފައި އަޅުގަނޑުމެންނަށް ފޮނުވަންޖެހޭ ފަރާތްތަކަށް ފޮނުވުން. އަދި މި ހިދުމަތްދޭ އިންޓަނޭޝަނަލް ޕާޓްނާތަކެއް ވެސް އެބަ ވޯކްކުރޭ އަޅުގަނޑުމެންނާ އެކު މިހާރު ވެސް. އެހެންވީމާ އެގޮތަށް އަޅުގަނޑުމެން މި ހިދުމަތް ގާއިމުވެގެންދާނީ،"

މުޖުތަބާ ވިދާޅުވިއެވެ.

މި ޚިދުމަތް ފަށާއިރު މި ޚިދުމަތް ފޯރުކޮށްދިނުމަށް ބޭނުން ކުރާނީ ކުޅުދުއްފުށީގައި ޤާއިމްވެ ތިބި މުވައްޒަފުން ކަމަށާއި، އެކުންފުނީގެ ލޭންޑިންގް ކްރާފްޓް ބޭނުންކޮށްގެން ކުނި އުފުލުމުގެ މަސައްކަތް ކުރާއިރު، މި ޚިދުމަތް ފުޅާވާ ވަރަކަށް އިތުރު ވަޒީފާގެ ފުރުސަތުތައްވެސް އުފެދިގެންދާނެ ކަމަށް ވެމްކޯއިން މައުލޫމާތުދެއެވެ.