ނޭޕާލް އެއާޕޯޓްގައި ބޯޑިން ބަންދުކުރުމުން ދެ ދިވެއްސަކު ތާށިވި، މިހާރު އެކަން ޙައްލުވެއްޖެ

ނޭޕާލުގެ ކަތަމަންޑޫ އެއާޕޯޓުގެ ބޯޑިން ވަގުތީ ގޮތުން ބަންދުކުރި ނަމަވެސް، މިހާރު އެކަން ޙައްލުކޮށް ބޯޑިން ފަށާފައިވާ ކަމަށް ދިވެހި ޚާރިޖިއްޔާއިން ބުނެފިއެވެ.

ޚާރިޖިއްޔާއިން އެފަދައިން ބުނީ، ކަތަމަންޑޫ އެއާޕޯޓުން ބޭރަށް ފުރަން ދިޔަ ދެ ދިވެއްސަކު އެ އެއާޕޯޓުގައި ތާށިވެފައިވާ ކަމަށް ބުނެ ސޯޝަލް މީޑިޔާގައި ވާހަކަތަކެއް ފެތުރެމުން ދިޔުމާ ގުޅިގެންނެވެ.

"ވޮއިސް" އަށް މައުލޫމާތު ދެމުން ޚާރިޖީ ވުޒާރާގެ އޮފިޝަލަކު ވިދާޅުވީ، ޙާލަތުގެ ސަބަބުން އެ އެއާޕޯޓުގެ ބޯޑިން ވަގުތީ ގޮތުން ބަންދުކުރި ނަމަވެސް މިހާރު ބޯޑިން ފަށާފައިވާ ކަމަށެވެ.

އަދި ނޭޕާލުގައި ތިބި ދިވެހިންގެ ޙާލަތު ގާތުން ބަލަމުންދާ ކަމަށް ވެސް އޮފިޝަލް ވިދާޅުވިއެވެ.

ނޭޕާލުގެ ސަރުކާރުން ސޯޝަލް މީޑީޔާ ބޭންކުރަން ނިންމުމާ ގުޅިގެން ނޭޕާލްގެ ވެރިރަށް ކަތަމަންޑޫގައި ފެށި މުޒާހަރާ ހޫނުވެގެންގޮސް އެންމެފަހުން ވޭތުވެދިޔަ 24 ގަޑިއިރުގެ ތެރޭގައި 19 މީހަކު ވަނީ މަރުވެފައެވެ. މުޒާހަރާ ހޫނުވެ އެންމެފަހުން ބަޔަކު މަރުވުމާ ގުޅިގެން ނޭޕާލް ސަރުކާރުން ރޭގެ ވަގުތެއްގައި ވަނީ ސޯޝަލް މީޑިއާ އަލުން ބޭނުންކުރެވޭގޮތް ހަދާފައެވެ.