ލަންކާ ޓޫރިޒަމް: ލަންކާއަށް ދަތުރުކުރާ ދިވެހިންގެ އަދަދު އިތުރުވެއްޖެ

މިދިޔަ އަހަރާ އަޅާބަލާއިރު، މިއަހަރުގެ ސެޕްޓެމްބަރުމަހުގެ ނިޔަލަށް އަވައްޓެރި ސްރީލަންކާއަށް ދަތުރުކުރި ދިވެހިންގެ އަދަދު %37.4 އިންސައްތަ އިތުރުވެއްޖެއެވެ.

ސްރީލަންކާގެ ޓޫރިޒަމް ޑިޕާޓްމަންޓް އޮތޯރިޓީން އާއްމުކުރި ތަފާސަްހިސާބުތަކަށް ބަލާއިރު، މިއަހަރުގެ ސެޕްޓެމްބަރުމަހުގެ ނިޔަލަށް އެޤައުމަށް 34،457 ފަތުރުވެރިން ވަނީ ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު، 9,379 ދިވެހިންގެ އިތުރުވުމެކެވެ. މިދިޔަ އަހަރުގެ މި މުއްދަތުގެ ތެރޭގައި ސްރީލަންކާއަށް ދަތުރުކުރި ދިވެހިންގެ އަދަދު އުޅެނީ 25.078 ގައެވެ.

މި ތަފާސްހިސާބަށް ބަލާއިރު، ގިނަ ދިވެހިން ލަންކާއަށް ދަތުރުކޮށްއުޅެނީ، ބޭސްފަރުވާގެ ހިދުމަތް ހޯދުމަށާއި، ޗުއްޓީ ހޭދަކޮށްލުމުގެ އިތުރުން ވިޔަފާރީގެ އެކި ބޭނުންތަކަށެވެ. ތަފާސްހިސާބަށް ބަލާއިރު ސްކޫލް ޗުއްޓީ ދުވަސްވަރު ލަންކާއަށް ދަތުރުކުރި ދިވެހިންގެ އަދަދު އިތުރުވާކަން ފާހަގަކޮށްލެވެއެވެ.

ނަމަވެސް މިފަހުން ޑޮލަރު ލިބުމުގެ ދަތިކަމާއިހުރެ ލަންކާއަށް ދަތުރުކުރާ ދިވެހިންގެ ނިސްބަތްވަނީ ދަށަށްގޮސްފައިވާކަމަށް ވޮއިސް އާ މައުލޫމާތު ހިއްސާކުރި ބައެއް ޓްރެވަލް އޭޖެންސީތަކުން ވަނީ ބުނެފައެވެ.

ރާއްޖެއަށް އުދުހުންތައް ބާއްވަމުން އަންނަ ގިނަ އަދަދެއްގެ އެއާއިލްތަކުން މިހާރުވެސް ކޮލަމްބޯއަށް އުދުހުންތައް ބައްވައެވެ. އޭގެ ތެރޭގައި ސްރީލަންކަން، އެމިރޭޓްސް، ފިޓްސް އެއާ، ފްލައި ދުބާއީ، ގަލްފް އެއާ، ޗައިނާ އީސްޓަރން، ހިމެނެއެވެ.

ރާއްޖެއާ އެންމެ ގާތުގައި އޮތް ލަންކާއަކީ އެންމެ ގިނައިން އެކި ބޭނުންތަކަށް ދިވެހިން ދަތުރުކޮށް އުޅޭ ޤައުމެވެ. ސްރީލަންކާއަށް މި ފަހުން ލައިގަތް ދަތިދުވަސްތަކުގެ ކުރިއަށް ޖެހިލާއިރު، ސްރީލަންކާ ފާހަގަކުރެވިފައިވަނީ، ދިވެހިން އެންމެ ގިނައަދަދަކަށް ދިރިއުޅެމުން އަންނަ ޤައުމުގެ ގޮތުގައެވެ. އީސްޓާ ބޮމުގެ ހަމަލާ އާއި އެންމެފަހުން ލަންކާއަށް ދިމާވި އިގްތިސާދީ ކާރިސާގެ ކުރިން އެޤައުމުގައި 30،000 ހާހެއްހާ މީހުން ދިރިއުޅޭނޭ ކަމަށް ބެލެވުނު ނަމަވެސް، މިހާރު އެއަދަދު ދަށްވާނޭކަމަށް ބެލެވެއެވެ.