އަކޫގެ ފުޓުބޯޅައިގެ ހަޔާތް އައު މިސްރާބަކަށް ގެންގޮސް ދިނީ، ދީނަށާއި ނަމާދަށް ދޭން ފެށި އަހަންމިޔަތުކަން!

މަޝްހޫރު ފުޓުބޯޅަ ކުޅުންތެރިޔާ، އަދި ޤައުމީ ޓީމުގެ ކުރީގެ ކެޕްޓަން އަކްރަމް ޢަބްދުލްޣަނީ (އަކޫ)ގެފުޓުބޯޅަ ކެރިއަރު އައު މިސްރާބަށް ގެންގޮސްދީ އެންމެ ބޮޑު ކާމިޔާބީ ތަކެއް ލިބެން ފެށީ ދީނީ ކަންކަމަށާއި ނަމާދަށް ފަރުވާތެރިވާން ފެށި ފަހުން ކަމަށް އޭނާ ބުނެފިއެވެ.

ޕީސް ފައުންޑޭޝަނުން ނިމިދިޔަ ހަފްތާގައި، ތ ވިލުފުށީގައި ބޭއްވި “ލަކުސަނަ” ޕްރޮގްރާމްގެ ތެރެއިން އެކި އުމުރުފުރާތަކަށް ޚާއްސަ ތަފާތު ގިނަ ހަރަކާތްތައް ކުރިއަށް ގެންގޮސްފައިވާއިރު، އޭގެ ތެރެއިންވެސް، ޒުވާނުންނާއި، ފުޓުބޯޅައަށް ލޯބިކުރާ ކުދިންނާއެކު އަކޫގެ ވަރަށް ޚާއްސަ އިވެންޓެއް ވަނީ ކުރިއަށް ގެންގޮސްފައެވެ.

“ތަށި އުފުލާލި އިޙްސާސް” ނަމުގައި ކުރިއަށް ގެންދެވުނު މި އިވެންޓްގައި ބައިވެރިވި އެންމެހާ ފަރާތްތަކާއެކު އަކޫ ވަނީ، އޭނާގެ ކެޕްޓަން ކަމުގެ ދަށުން 2018 ވަނައަހަރު ރާއްޖެއިން ދެވަނަ ފަހަރަށް ސާފް ޗެންޕިއަންޝިޕްގެ ތަށި އުފުލާލިއިރު ކުރެވުނު އިހްސާސާއި، އަދި އެކާމިޔާބީ އާއި ހަމައަށް ވާސިލްވުމަށް ކުރެވުނު ދަތުރުގެ އިތުރުން، ލިބުނު ތަޖުރިބާތައް ހިއްސާ ކޮށްފައެވެ.

އެގޮތުން 2004 ވަނައަހަރުން ފެށިގެން އަކޫގެ ފުޓުބޯޅައިގެން ކެރިއަރު ފެށިގެން ގޮސްފައިވާއިރު އޭރުވެސް އަކޫގެ އަޒުމަކަށްވީ ބޭބެ، އަދި ގައުމީޓީމުގެ ކުރީގެ ކެޕްޓަން، އައްސަދު އަބްދުލް ޣަނީ ހުންނެވި މަގާމާ ހަމައަށް ދިޔުމެވެ.

ވަރަށް ވެސް ގިނަ މަސައްކަތް ތަކެއް ކޮށްގެން، 2006 ވަނަ އަހަރުން ފެށިގެން 2015 ވަނަ އަހަރާ ހަމައަށް ގައުމީ ސީނިއާ ޓީމަށް އަޅުގަނޑު އައީ ކުޅެމުން. އެފަހުން 2015 ވަނަ އަހަރު ގައުމީ ޓީމަށް އޭރުއައި ކޯޗަށް އަޅުގަނޑު ކަމު ނުގޮސްގެން ޓީމުން ކެޓިވެސް. އަދި ދޮޅު އަހަރުވަންދެން އެގޮތަށް ހުރުމަށްފަހު 2017 ވަނަ އަހަރު އަލުން ގައުމީ ޓީމަށް އަނެއްކާވެސް ނަގީ. ދެން 2018 ވަނަ އަހަރު، އެފަހަރު އައި ކޯޗު ގައުމީ ޓީމުގެ ކެޕްޓަން ކަން ހަވާލުކުރީ. އެހިސާބުން 2022 ވަނަ އަހަރު އެންޖަރީ ވުނާ ހަމައަށް އަޅުގަނޑު ހުރީ ގައުމީ ޓީމުގެ ކެޕްޓަން ކަމުގައި. އަޅުގަނޑަށް ކެޕްޓަންކަން ލިބުނު އަހަރު އަޅުގަނޑުމެންނަށް ދެވަނަ ފަހަރަށް ގޯލްޑް މެޑަލް ލިބި ތަށި އުފުލާލީ. އެދުވަހު އަޅުގަނޑަށް އިހްސާސް ކުރެވުނީ އަޅުގަނޑު ކަނޑައެޅި ގޯލް ކާމިޔާބު ކުރެވިއްޖެއޭ

އަކްރަމް ޢަބްދުލްޣަނީ (އަކޫ)

އެހެންކަމުން އަކޫ އެދެނީ ކޮންމެ ކަމަކާވެސް ކުރިމަތިލާއިރު، ވަކި ލަނޑުދަނޑިއެއްް ކަނޑައަޅައި އެ ލަނޑުދަނޑި ހާސިލް ކުރުމަށް މަސައްކަތް ކުރުމަށެވެ. އަދި އެގޮތަށް ކުރިއަށް ގޮސްފި ނަމަ ކާމިޔާބު ވާނެ ކަމަށްވެސް އޭނާ ފާހަގަކޮށްފައެވެ.

މިއާއެކު އަކޫ ވަނީ އޭނާގެ ކެރިއަރާއިގެން އޭރު ކުރިއަށް ދިޔައިރު، ދީނީ ގޮތުން ގިނަ ކަންތައްތަކެއް ނޭނގި ހުރިކަމަށް ވިދާޅުވެފައެވެ. އެހެން ނަމަވެސް 2010 ވަނަ އަހަރުގެ ތެރޭގައި، ގިނަ ކަންތައްތަކަާއި ކުރިމަތިލާން ޖެހުނު ކަމަށާ، އެކަންކަމުގެ ތެރެއިން ދިމާވި ބޭފުޅެއްގެ ސަބަބުން، ނަމާދަށް ހިތްޖެހި، ނަމާދަށް ފަރުވާތެރިވެވެން ފެށުނު ކަމަށް އޭނާ ބުންޏެވެ.

އެދުވަހަކީ އަޅުގަނޑު ދެކޭ ގޮތުގައި، އަޅުގަނޑުގެ ކެރިއަރު އައު މިސްރާބަކަށް ދިޔަ ދުވަސް. އެކަމުގެ ސަބަބުން އަޅުގަނޑަށް ވިަރަށް ގިނަ އެހީތަކެއް، ވަރަށް ބޮޑު ސަޕޯޓެއް ލިބިގެންދިޔަ އަޅުގަނޑު މިއަދު މިހުރި މަގާމަށް އަންނަން… ފުޓުބޯޅައިގެ ތެރޭ އުޅޭއިރުވެސް އަޅުގަނޑުމެން އޭގެ ކުރިންވެސް ކުރަންޖެހޭ ކަންކަން އެބަހުރި. އެކަން ފޮލޯކޮށް، އިސްލާމްދީނުގެ އިމުގެ ތެރޭގައި މި ކުޅިވަރު ކުޅެގެން އެންމެ އުސްމިނަށް ދެވިދާނެ. ރާއްޖޭގެވެސް ބައިވެރު ކުޅުންތެރިން އެބަ ތިބި ސުންނަތް ފޮލޯ ކޮށްގެން މިކަމުގެ ތެރޭގައި އުޅޭ.

އަކްރަމް ޢަބްދުލްޣަނީ (އަކޫ)

އަކޫ ބުނި ގޮތުގައި، 2015 ވަނަ އަހަރު ގައުމީ ޓީމުގެ ސްކޮޑުން ބޭރު ކޮށްލުމުންވެސް ހިތްވަރު އެލުވައު ނުލައި ކުރިއަށް ދެވުނީ ނަމާދާއި ކެތްތެރިކަމުން ލިބުނު ހިތްވަރުން ކަމަށެވެ. އެގޮތުން، 2017 ވަނަ އަހަރު އަލުން ގައުމީޓީމުގެ ސްކޮޑަށް ނެގުނީ، ގަވައިދުން ނަމާދުކޮށް ގުރުއާނުގައި އަންގަވާފައިވާ ގޮތަށް އުޅެމުން، ހިތްވަރާއެކު ކުރި މަސައްކަތަކުން ކަމަށް އަކޫ ބުންޏެވެ.