ސަރުކާރުގެ ސިޔާސަތުތައް މުތާލިއާކޮށް ފާޑުކިއުމަކީ އިދިކޮޅު ޕާޓީތަކުގެ މަސްއޫލިއްޔަތެއް: ރައީސް ނަޝީދު

ސަރުކާރުގެ ޚާރިޖީ ސިޔާސަތާއި އެހެނިހެން ސިޔާސަތުތައް ދެނެގަނެ، އެ ކަންކަމަށް ފާޑުކިއުމަކީ ވާދަވެރި ސިޔާސީ ޕާޓީއެއްގެ އެންމެ ބޮޑު މަސްއޫލިއްޔަތު ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިހެން ވިދާޅުވީ އެމަނިކުފާނު މިހާރު އިންޑިއާއަށް ކުރެއްވި ދަތުރުފުޅެއްގައި، ރާއްޖޭގެ ދަރަންޏާ، ޚާރިޖީ ސިޔާސަތާ ގުޅޭގޮތުން ދެއްކެވި ވާހަކަފުޅުތަކަކާ ގުޅިގެން ފޮރިން މިނިސްޓްރީން ނެރުނު ބަޔާނަށް ރައްދު ދެއްވައި އެކްސްގައި ކުރެއްވި ޕޯސްޓެއްގައެވެ.

”ދިވެހިރާއްޖެއަކީ މުޅި ދިވެހި ރައްޔިތުންގެ ރާއްޖެއެއް. 30 އިންސައްތައަށް ވުރެ ދަށުގެ ތާއީދެއް އޮތް ރައީސް ޑރ. މުޙައްމަދު މުއިއްޒުގެ ސަރުކާރުގެ ރާއްޖެއެއް ނޫން“ ނަޝީދު ވިދާޅުވިއެވެ.

މީގެ އިތުރުން ނަޝީދު ވަނީ އެކުވެރި ދައުލަތްތަކުން ދޭ މާލީ އެހީއާއި ލޯނުތައް ސަރުކާރުން ބޭނުންކުރަން ޖެހޭނީ ޒިންމާދާރުކަމާ އެކު ކަމަށްވެސް ވިދާޅުވެފައެވެ.

ނަޝީދު އިންޑިޔާގައި ދެއްކެވި ވާހަކަފުޅާއި ގުޅިގެން ޚާރިޖީ ވުޒާރާއިން ނެރުނު ބަޔާނުގައި ވަނީ، ދައުލަތުގެ މަތީ މަގާމުތައް ފުރުއްވާފައިވާ ބޭފުޅުން ޚާރިޖީ ސިޔާސަތާއި ބައިނަލްއަޤުވާމީ ގުޅުންތަކާ ގުޅޭގޮތުން ވާހަކަދައްކަވާއިރު ޙިކުމަތްތެރިކަން އިސްކުރުމަށް ގޮވާލާފައެވެ.

ފޮރިން މިނިސްޓްރީގެ ބަޔާނުގައި ބުނެފައިވަނީ، މި ސަރުކާރުގެ ޚާރިޖީ ސިޔާސަތަކީ ރާއްޖޭގެ ސިޔާދަތު ރައްކާތެރިކުރުމާއި ޤައުމީ މަސްލަހަތު އިސްކުރުމުގެ މައްޗަށް ބިނާވެފައިވާ "މޯލްޑިވްސް ފަސްޓް" ސިޔާސަތު ކަމަށެވެ. މިއީ ބައިނަލްއަޤުވާމީ ޤާނޫނުތަކަށް އިޙުތިރާމްކުރާ، ޒިންމާދާރު ސިޔާސަތެއް ކަމަށާއި، ރާއްޖޭގެ ތަރައްޤީގެ ބައިވެރިންނާ އެކު އޮންނަ ޒަމާންވީ ގުޅުންތަކަށް ސަރުކާރުން އިސްކަންދޭ ކަމަށްވެސް އެ ބަޔާނުގައިވެއެވެ.

މީގެ އިތުރުން، ދައުލަތުގެ އިސް މަގާމުތައް ފުރުއްވާފައިވާ ބޭފުޅުން ދައްކަވާ ބައެއް ވާހަކަތަކުގެ ސަބަބުން ނޭދެވޭ ނަތީޖާތަކެއް ނުކުމެދާނެތީ، އެފަދަ ވާހަކަތައް ދެއްކެވުމުގައި ޙަޤީޤަތުގެ މައްޗަށް ބިނާކުރުމަށާއި ޤައުމީ އެއްބައިވަންތަކަމަށް އިސްކަންދިނުމަށް ފޮރިން މިނިސްޓްރީން ވަނީ އިލްތިމާސްކޮށްފައެވެ.