ލަނޑު ގޯންޏަކާއެކު މެންޗެސްޓާ ސިޓީ އެފްއޭ ކަޕްގެ އަނެއް ބުރަށް

އިނގިރޭސި އެފްއޭ ކަޕްގެ ތިންވަނަ ބުރުގައި ޗެންޕިއަންޝިޕްގެ ޓީމެއްކަމަށްވާ ރޮތަހެމް ޔުނައިޓެޑް ކޮޅަށް 7 ލަނޑު ޖަހައި މެންޗެސްޓާ ސިޓީ އެފްއޭ ކަޕްގެ ހަތަރުވަނަ ބުރު ކަށަވަރުކޮށްފިއެވެ.

ބޮޑު ތަފާތަކުން ސިޓީ މޮޅުވި މި މެޗުގައި އެޓީމުގެ ލަނޑުތައް ޖަހާފައިވަނީ ތަފާތު ހަ ކުޅުންތެރިންނެވެ. ސިޓީގެ ލަނޑުތަކުގެ ތެރެއިން އެއް ލަނޑަކީ ރޮތަހެމް އަތުން ބައިކޮޅަށް ވައިން ލަނޑެކެވެ.

ސްޓާލިންގ އަދި ފޯޑެން ޖެހި ދެ ލަނޑުގެ އިތުރުން ރޮތަހެމްގެ ކުޅުންތެރިޔެއްގެ އަތުން ބައިކޮޅަށް ވައިން ލަނޑަކާއެކު ފުރަތަމަ ހާފް ސިޓީ 3-0 ކުން ކުރީގައި އޮވެ ނިންމާލިއިރު ދެވަނަ ހާފުގައި ޖީސުސް، މަހްރޭޒް، އޮޓަމެންޑީ އަދި ސާނޭ ކާމިޔާބުކުރި ލަނޑުތަކާއެކު ސިޓީ މެޗު ނިންމާލީ 7-0 ކުންނެވެ. މި މެޗުގައި ސިޓީގެ މެދުތެރެއަށް ކުޅެމުން އަންނަ ގުންޑޮގަންވަނީ ހަތަރު އެސިސްޓް ހަދާފައެވެ.

މިއީ 1968 ވަނަ އަހަރުގެ ފަހުން އެފްއޭ ކަޕްގައި ސިޓީ 7 ލަނޑު ޖެހި ފުރަތަމަ ފަހަރެވެ.

މެޗައި ބެހޭ ގޮތުން ސިޓީގެ ކޯޗް ގާޑިއޯލާ ބުނީ، ކުޅޭ ކޮންމެ މުބާރާތެއްގައިވެސް އޭނާގެ ޓީމުން ރަނގަޅު ކުޅުމެއް ދެއްކޭތޯ މަސައްކަތް ކުރާނެ ކަމަށެވެ. މިދިޔަ ބުރާސްފަތި ދުވަހު ލީގުގައި ލިވަޕޫލައި ދެކޮޅަށް ނުކުޅެތިބި ނުވަވަރަކަށް ކުޅުންތެރިން ތިބީ މާބޮޑު ވަރުބަލިކަމެއް ނެތި ކަމަށައި އެހެންކަމުން މި މެޗް ސީރިއަސްކޮށްނަގައި އެކުޅުންތެރިން ބޭނުންކޮށް، ބޮޑު އަދި ވަރުގަދަ ކްލަބަކަށް ވުމަށް ސިޓީއިން ކުރަންޖެހޭ ކަންތައް ކުރީކަމަށްވެސް ގާޑިއޯލާ ބުންޏެވެ.

ސިޓީ ދޫކޮށްލަން އުޅޭ ކަމުގެ އަޑުތައް އަރާފައިވާ އެޓީމުގެ 18 އަހަރުގެ ޒުވާންތަރި ފޯޑެންއައި ބެހޭގޮތުން ގާޑިއޯލާބުނީ ފޯޑެން ސިޓީ ދޫކޮށްދާނެ އެއްވެސް ގޮތެއް ނޯންނާނެ ކަމަށައި އޭނާއަކީ ސިޓީއާއެކު ގިނަ އަހަރުތަކެއް ހޭދަކުރާނެ ކުޅުންތެރިޔެއް ކަމަށެވެ.

ރޮތަހެމްގެ ކޯޗް ޕޯލްބުނީ އޭނާގެ ޓީމް ކުޅެން ޖެހުނީ ދުނިޔޭގެ ފެންވަރުގެ ޓީމަކައި ދެކޮޅަށް ކަމަށައި އެހެންކަމުން ބޮޑު ތަފާތަކުން ބަލިވިޔަސް އޭގައި ލަދު ގަންނަންޖެހޭ ކަމެއް ނެތް ކަމުގައެވެ.