ވިޔަފާރި ބޭނުމަށް އައްޑޫ އިން 7 ބިން ކުއްޔަށް ދޫކުރަނީ

ވިޔަފާރި ބޭނުމަށް އައްޑޫ އިން 7 ބިން ކުއްޔަށް ދޫކުރަން އައްޑޫ ސިޓީ ކައުންސިލުން އިއުލާންކޮށްފިއެވެ.

އައްޑޫ ސިޓީ ކައުންސިލުން މިއަދު ގެޒެޓްގައި ޝާއިއުކުރި އިއުލާނެއްގައި ވަނީ އައްޑޫސިޓީ ހިތަދޫ އަވަށުގެ ކޮމާޝަލް ޒޯން ސަރަހައްދުން ބިން ކުއްޔަށް ހިފަން ޝައުޤުވެރިވެލައްވާ ރަޖިސްޓްރީ ކޮށްފައިވާ ފަރުދުންގެ ވިޔަފާރި، ކުންފުނި އަދި ޕާޓްނަރޝިޕްތަކަށް ފުރުޞަތު ހުޅުވާލާފައިވާ ކަމަށެވެ.

އައްޑޫ ސިޓީ ކައުންސިލުން ބުނީ ރީޓެއިލް އަދި ހޯލްސޭލް ވިޔަފާރިތަކަށް ހާއްސަކޮށް ކުއްޔަށް ދޫކުރުމަށް ހަމަޖެހިފައިވާ ހުރިހާ ބިމެއްގެވެސް ބޮޑުމިނަކީ 4،000 އަކަފޫޓު ކަމަށެވެ.

އައްޑޫ ސިޓީ ކައުންސިލުން ބުނިގޮތުގައި ބީލަމުގައި ބައިވެރިވުމަށް ޝައުގުވެރިވާ ފަރާތްތަކުން 300 ރުފިޔާގެ ނަން-ރިފަންޑަބަލް ރަޖިސްޓްރޭޝަން ފީއެއް ދައްކަންޖެހޭނެއެވެ. ބީލަމުގައި ރަޖިސްޓްރީ ވުމުގެ މުއްދަތު މިއަދުން ފެށިގެން މި މަހުގެ 25 ވަނަ ދުވަހާއި ހަމައަށް ހަމަޖެހިފައިވާއިރު، ރަޖިސްޓްރީ ވުމަށް ހުޅުވާލާފައިވަނީ ބަންދު ނޫން ކޮންމެ ދުވަހެއްގެ ހެނދުނު 8:00 އިން މެންދުރުފަހު 2:00 އަށެވެ.ބީލަމުގައި ރަޖިސްޓްރީ ވުމަށް ބޭނުންވާ ފަރާތްތަކުން ބިމުގެ ނަންބަރު، ބީލަން ގަންނަ ފަރާތުގެ ނަން، އެޑްރެސް، ގުޅޭނެ ނަންބަރު އަދި އީމެއިލް އެޑްރެސް ހިމެނޭ ގޮތަށް އައްޑޫ ސިޓީ ކައުންސިލްގެ އީމެއިލް އެޑްރެސް [email protected] އަށް މެއިލް ކުރަންޖެހެއެވެ. އަދި ރަޖިސްޓްރޭޝަން ފީ ދެއްކުމަށްފަހު، ފައިސާ ޖަމާކުރި ސްލިޕް މެއިލް ކުރަންޖެހޭނެއެވެ.

އައްޑޫ ސިޓީ ކައުންސިލުން ބުނީ ބީލަމުގައި ބައިވެރިވުމަށް ރަޖިސްޓްރީ ކުރާ ފަރާތްތަކަށް ބިން ކުއްޔަށް ދޫކުރުމާ ގުޅޭ މަޢުލޫމާތު ކަރުދާހާއި ބީލަން ހުށަހަޅާ ފޯމު އެ ކައުންސިލުން މެއިލް ކުރާނެ ކަމަށެވެ.

ބީލަން ބަލައިގަތުމާއި ބީލަން ހުޅުވުން އޮންނާނީ އައްޑޫ ސިޓީ ކައުންސިލް އިދާރާގައި އަންނަ މާޗް މަހުގެ 10 ވަނަ ދުވަހުގެ ހެނދުނު 10:00 ގައެވެ.