އިމިގްރޭޝަން ވޮޗަށް މިހާތަނަށް 840 މައްސަލަ؛ ގިނައީ ގަވާއިދާ ހިލާފު ވިޔަފާރިތަކާ ގުޅޭ މައްސަލަ

ބިދޭސީންނާ ގުޅޭ މައްސަލަތައް އާއްމުންގެ ފަރާތުން ރިޕޯޓުކުރަން އިމިގްރޭޝަނުން ތައާރަފުކުރި އިމިގްރޭޝަން ވޮޗަށް 840 މައްސަލަ މިހާތަނަށް ރިޕޯޓުކޮށްފައިވާ ކަމަށް އިމިގްރޭޝަންގެ ތަފާސްހިސާބުތަކުން ދައްކައިފިއެވެ.

އިމިގްރޭޝަނުން މިއަދު އާންމުކުރި ތަފާސްހިސާބުތަކުން ދައްކާ ގޮތުން، އެ އިދާރާއަށް މިހާތަނަށް ހުށަހެޅުނު 840 މައްސަލައިގެ ތެރެއިން، އެންމެ ގިނައީ  ބިދޭސީން ގަވާއިދާ ހިލާފަށް ކުރާ ވިޔަފާރިތަކާ ގުޅޭ މައްސަލަތަކެވެ. އެއީ 221 މައްސަލަ އެވެ.

ދެވަނައަށް އެންމެ ގިނައީ ވޯކް ވިސާއާ ގުޅޭ މައްސަލަތަކެވެ. އެ ފަދަ 206 މައްސަލައެއް ރިޕޯޓުކޮށްފައިވެއެވެ.

މީގެ އިތުރުން ވެސް އިމިގްރޭޝަން ވޮޗް މެދުވެރިކޮށް ރިޕޯޓުކޮށްފައިވާ މައްސަލަތަކުގެ ތެރޭގައި؛

- ހަށިވިއްކުމާ ގުޅޭ 50 މައްސަލަ

ބްލެކް މާކެޓުގައި ޑޮލަރު ވިއްކުމާ ގުޅޭ 7 މައްސަލަ

ޓޫރިސްޓް ވިސާއާ ހިލާފުވުމުގެ 10 މައްސަލަ

ބިދޭސީން ގެންނަ މީހުން ގަވާއިދާ ހިލާފުވެގެން 9 މައްސަލަ

ލިޔެކިޔުންތައް އޮޅުވާލުމުގެ 2 މައްސަލަ

ޑުރަގު ޓްރެފިކްކުރުމުގެ 9 މައްސަލަ

އިންސާނީ ވަގުފާރީގެ 7 މައްސަލަ

ގެއްލިގެން ހޯދާ މީހުންނާ ގުޅޭ 32 މައްސަލަ

ގަވާއިދާ ހިލާފަށް އެތެރެވާން އުޅޭކަމުގެ 3 މައްސަލަ

އެހެނިހެން 40 މައްސަލަ

އިމިގްރޭޝަނަށް ހުށަހެޅުނު 840 މައްސަލަ ތަކުގެ ތެރެއިން އެ އުދާރާއިން އެޓެންޑްވެފައިވަނީ، 596 މައްސަލައެވެ.އޭގެ ތެރެއިން 70 މައްސަލައެއް ވެރިފައިކުރުމުގެ މަސައްކަތް ކުރިއަށްދާއިރު، 174 މައްސަލައެއް ބަލައިނުގަނެއެވެ.

"އިމިގްރޭޝަން ވޮޗް" އިފުތިތާހުކުރީ މިދިޔަ ޖުލައި މަހުގެ 17ވަނަ ދުވަހުއެވެ.

އިމިގްޜޭޝަން ވޮޗްގެ މައިގަނޑު މަޤްޞަދަކީ މުޖުތަމަޢުގެ ރައްކާތެރިކަން އިތުރުކޮށް، އިމިގްރޭޝަންގެ ޤާނޫނުތައް ދެމެހެއްޓުން ކަމަށް އިމިގްރޭޝަނުން ބުނެއެވެ. މީގެ ސަބަބުން ގަވާއިދާ ޚިލާފަށް އުޅޭ ބިދޭސީންގެ މައްސަލަތަކާއި، އޮޅުވާލައިގެން ރާއްޖެ އެތެރެވުމަށް މަސައްކަތްކުރާ ބިދޭސީން ދެނެގަތުމާއި، އިމިގްރޭޝަނާ ގުޅުންހުރި އެހެނިހެން މައްސަލަތަކުގައި ޝާމިލްވާ ބިދޭސީން ރިޕޯޓުކުރުން ވަނީ ފަސޭހަވެގެން ގޮސްފައެވެ.

އިމްގްރޭޝަނުން ކުރިން މައުލޫމާތު ދިންގޮތުގައި، "އިމިގްރޭޝަން ވޮޗް" ޕްލެޓްފޯމުން ރިޕޯޓުކުރާ ފަރާތާއި މައްސަލައިގެ ސިއްރިއްޔާތު ދެމެހެއްޓޭނެއެވެ. އެގޮތުން މަޢުލޫމާތު ފޯރުކޮށްދޭ ފަރާތުގެ މަޢުލޫމާތު ހާމަނުކޮށްވެސް ރިޕޯޓުކުރެވޭނެ ކަމަށާއި އާންމުންނަށް މުހިންމު މަޢުލޫމާތު ހިއްސާކޮށް ބޮޑެތި ކުށްތައް ހުއްޓުވުމުގެ ފުރުސަތު ލިބޭނެ ކަމަށްވެސް އިމިގްރޭޝާނުން ބުނެއެވެ.