ޕީސީބީ އިން މިފްކޯ ގެ ސީއީއޯ ޝަމާހުގެ ސަސްޕެންޝަން އުވާލައިފި

ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ) އިން މިފްކޯގެ ސީއީއޯ އަދި މެނޭޖިން ޑިރެކްޓަރު އަހުމަދު ޝަމާހު ރަޝީދުގެ ސަސްޕެންޝަން އުވާލައިފިއެވެ.

މަގާމުގެ މަސްއޫލިއްޔަތުތަކުން ޝަމާހު ދުރުކުރީ އޭނަ އާއި ގުޅޭގޮތުން ޕީސީބީ އަށް ހުށައެޅުނު ކޯޕަރޭޓް ގަވަނެންސްއާއި ގުޅުން ހުރި މައްސަލަތަކަކާއި ގުޅިގެން މިދިޔަ މަހުގެ 18 ވަނަ ދުވަހުއެވެ.

އޭރު ޕީސީބީ އިން ބުނެފައިވަނީ އެކަމާއި ގުޅުން ހުރި ފުރިހަމަ އިންކުއަރީއެއް ހިންގުމަށްޓަކައި، "ސަރުކާރު ހިއްސާވާ ކުންފުނި ތަކުގެ ޑިރެކްޓަރުންގެ ސުލޫކީ މިންގަނޑާއި، ޝަކުވާ ހުށައެޅުމާއި އަދި ފިޔަވަޅު އެޅުމާއި ގުޅޭ އުސޫލު" ގެ ދަށުން 14 ދުވަހުގެ މުއްދަތަކަށް މަގާމުގެ މަސްއޫލިއްޔަތުން ވަގުތީ ގޮތުން އެކަހެރިކޮށްފައިވާ ކަމަށެވެ.

މިފްކޯގެ ސީއީއޯ ޝަމާހު އަށް ޕީސީބީ އިން މި ފިޔަވަޅުތައް އޭރު އެޅިއިރު، މިފްކޯގެ ވަޞީލަތްތައް ސިޔާސީ ކަންކަމުގައި ބޭނުންކުރަމުންދާކަމަށް ބަޔާންކޮށް ހުށައަޅާފައިވާ މައްސަލައާއި ގުޅިގެން، މިފްކޯގެ ބޭފުޅުންނާއި ޕީސީބީ ބޯޑުގެ ބޭފުޅުންނާއި މަޖިލީހުގެ ސްޓޭޓް އޯންޑް އެންޓަރޕްރައިޒަސް ކޮމިޓީއިން ވެސް ވަނީ މީގެ ކުރިން ބައްދަލުކޮށްފައެވެ.