އެމްޑީޕީން އިސްރާއިލަށް ތާއީދެއް ނުކުރާނެ؛ މިތިބީ ފަލަސްތީނާއެކު: ރައީސް ނަޝީދު

އެމްޑީޕީ ސަރުކާރުތަކުން ރާއްޖޭގެ ވެރިކަމަށް އައިސް ތަންފީޒު ކުރީ ޕްރޯ-އިސްރާއިލް ސިޔާސަތު ކަމަށް ވިދާޅުވެ ރައީސް ޑރ މުޙައްމަދު މުޢިއްޒު ދެއްކެވި ވާހަކަފުޅުތަކަށް ކުރީގެ ރައީސް މުޙައްމަދު ނަޝީދު ރައްދު ދެއްވައިފިއެވެ.

ރާއްޖޭގެ 61 ވަނަ މިނިވަން ދުވަހުގެ މުނާސަބަތުގައި ބޭއްވި ޚާއްސަ ޖަލްސާގައި ވާހަކަ ދައްކަވަމުން ރައީސް މުޢިއްޒު ވަނީ، މި ސަރުކާރުން ގެންގުޅޭނީ މޯލްޑިވްސް ފަސްޓް ޕޮލިސީ ކަމަށާ، އެ ޕޮލިސީގެ ދަށުން އިސްރާއީލް ފިޔަވައި އެހެން ހުރިހާ ގައުމަކާ ގުޅުން ބާއްވާނެ ކަމަށެވެ.

ނަމަވެސް އެމްޑީޕީގެ ވެރިކަން ރާއްޖޭގައި އޮތް އިރު އިސްރާއިލާއެކު ގުޅުން ބާއްވާފައިވާ ކަމަށެވެ.

އެމްޑީޕީގެ ވެރިކަން މިތާ ހިނގިއިރު އޮތީ އޭގެ ދިމާ އިދިކޮޅު. މިއީ ހަގީގަތް ފެންނަން އޮތް. ޕްރޯ އިސްރާއީލް ޕޮލިސީއެއް މިތާ ތަންފީޒު ކުރީ. އަރަބި އިސްލާމް ގައުމުތަކާ ދުރުވެގަތީ. މީކީ ދިވެހިންނާ ދޯޅު ގޮތެއް ނޫން. ދިވެހިންނާ ބީރަައްޓެހި ޚާރިޖީ ސިޔާސަތެއް އެއީ

ރައީސް މުޢިއްޒު

ރައީސް މުޢިއްޒުގެ ވާހަކަފުޅަށް ރައްދު ދެއްވަމުން ނަޝީދު ވަނީ އެމްޑީޕީ އަކީ އިސްރާއިލަށް ތާއީދު ކުރާ ޕާޓީއެއް ނޫން ކަމަށާ، އެ ޕާޓީން ތާއީދު ކުރާނީ ފަލަސްތީނަށް ކަމަށް ވިދާޅުވެފައެވެ.

"ކާކުތޯ އިޒްރޭލަށް ތާއީދު ކުރާނީ؟ ޓީވީތަކުން ފެންނަމުން އެ ގެންދާ މަންޒަރުތައް، އިޒްރޭލް ސަރުކާރުގެ ލާއިންސާނީ އަމަލުތައް، ކާކުތޯ ހަނދާން ނެތޭނީ؟ ކާކުތޯ އިޒްރޭލަށް ތާއީދު ކުރާނީ. އެމްޑީޕީން ނުކުރާނެ. އިޒްރޭލަށް އެމްޑީޕީ ވެސް ތާއީދު ނުކުރާނެ! އަޅުގަނޑުމެން އަބަދު ވެސް ތެދުވެ ތިބޭނީ މިނިވަންކަމަށްޓަކައި ތާ އަބަދު މަސައްކަތް ކުރާ ފަލަސްތީނުގެ ރައްޔިތުންނާ އެކީގައި."

ރައީސް ނަޝީދު

ނަޝީދު މިފަދައިން ވިދާޅުވެފައިވާއިރު، އެމަނިކުފާނުގެ ވެރިކަމުގައި އިސްރާއީލާ ގުޅުން ބަދަހިކުރަން މަސައްކަތްކުރައްވާފައިވާކަން އިސްރާއީލްގެ މީޑިއާތަކުންވެސް ހާމަކޮށްފައިވެއެވެ.

އެގޮތުން، އެމަނިކުފާނުގެ ވެރިކަމުގައި، މެއި 2011ގައި، ދިވެހިރާއްޖޭގެ އޭރުގެ ޚާރިޖީ ވަޒީރު އަޙްމަދު ނަސީމް އިސްރާއީލަށް ކުރި ދަތުރަކީ ރާއްޖޭގެ މަތީ ފަންތީގެ އިސް ވެރިއަކު އެ އެޖަމާއަތުގެ މީހުން އުޅޭތަނަށް ކުރި ފުރަތަމަ ރަސްމީ ދަތުރުކަން ފާހަގަކޮށްލަންޖެހެއެވެ. ހަތަރު ދުވަހުގެ މުއްދަތަށް ކުރި މި ދަތުރުގައި، ނަސީމް ވަނީ އިސްރާއީލްގެ އޭރުގެ ރައީސް ޝިމޮން ޕެރޭޒް އާއި ޚާރިޖީ ވަޒީރު އެވިގްޑޯ ލީބަމަންއާ ބައްދަލުކޮށްފައެވެ.

މީގެ އިތުރުން، ނަޝީދުގެ ވެރިކަމުގައި، 2010 ވަނަ އަހަރުގެ ޑިސެމްބަރު މަހުގެ ތެރޭގައި، "އައި ފްރޮމް ޒަޔަން" ނަމަކަށް ކިޔާ ޖަމިއްޔާއަކަށް ނިސްބަތްވާ އިސްރާއީލުގެ ލޮލުގެ ޚާއްޞަ ޑޮކްޓަރުންގެ ވޮލަންޓިއަރު ޓީމެއް ދިވެހިރާއްޖެއަށް ޒިޔާރަތްކުރިއެވެ. އެކަމާ ގުޅިގެން ރާއްޖޭގައި އިހްތިޖާޖުތައްވެސް ކުރިއަށް ދިޔަ ނަމަވެސް، ނަޝީދު ވަނީ އެ ޓީމުގެ ޑޮކްޓަރުންނާއި ބައްދަލުކުރައްވައި، ރާއްޖޭގެ ގިނަ ރައްޔިތުން އެމީހުންގެ މަސައްކަތް ބަލައިގަންނަ ކަމަށް ވިދާޅުވެ ތައުރީފް ކުރައްވާފައެވެ.