ސިޔާސީ ވަޒީފާއަކީ ލިބޭ ހަދިޔާއެއް ނޫން، މަސައްކަތް ނުކުރެވޭނެމަ ޖެހޭނީ ވަކިވާން: މުންދު
ލިޔުންތެރިޔާ
އަބްދުﷲ ހުސައިން
ސަރުކާރުގެ ސިޔާސީ މަގާމުތަކަކީ ލިބޭ ހަދިޔާއެއް ނޫންކަމަށާއި، މަސައްކަތް ނުކުރެވޭނަމަ ޖެހޭނީ ވަކިވާންކަމަށް ރައީސުލްޖުމްހޫރިއްޔާގެ އޮފީހުގެ ޗީފް ގަވަމަންޓް ސްޕޯކްސްޕާސަން މުޙައްމަދު ޙުސައިން ޝަރީފް (މުންދު) ވިދާޅުވެއްޖެއެވެ.
މަގާމާ ހަވާލުވެ ވަޑައިގަތުމަށްފަހު ޕީއެސްއެމް ރާއްޖެ މިއަދު ޕްރޮގްރާމްގައި ވާހަކަދައްކަވަމުން މުންދު ވަނީ ވަރަށް ސާދާކޮށް ސިޔާސީ މަގާމުތަކާއި ވަޒީފާތައް މާނަކޮށްދެއްވާފައެވެ. ރައީސް މައުމޫނު ސަރުކާރުން ފެށިގެން ރައީސުލްޖުމްހޫރިއްޔާގެ ތަރުޖަމާނުކަމުގައި އެކި ފަހަރުމަތިން ތަރުޖަމާނުކަމުގެ މަޤާމު އަދާކުރެއްވި މުންދު ވިދާޅުވީ، ސިޔާސީ ވަޒީފާ ލިބެނީ ސިޔާސީ ފިކުރެއްގެ ތެރެއިން ކަމަށާއި، ސިޔާސީމީހުންގެ ބޭނުމަކީ ވަފާތެރިކަމާއެކުގައި އެއިރެއްގެ އޮންނަ ސަރުކާރެއް އެއިރެއްގެ ހުންނަ ރައީސުލްޖުމްހޫރިއްޔާއާއި އެކު އިތުބާރު ހުރި ގޮތެއްގައި މަސައްކަތްކުރުން ކަމަށެވެ.
ސިޔާސީ މީހުންގެ ފަރާތުން އެ އިތުބާރު ވަރަށް މުހިންމުވާނޭކަން ފާހަގަކުރައްވަމުން މުންދު ވިދާޅުވީ، ސިޔާސީ ވަޒީފާއަކީ ލިބޭ ހަދިޔާއެއް ނޫންކަމަށެވެ. ހުވައެއްކޮށްގެން އަދި ޗިޓަކާއެކު މަގާމާ ހަވާލުވިނަމަވެސް އެމީހަކަށް މުސާރަދެނީ ދައުލަތުގެ ބަޖެޓުން ރައްޔިތުންގެ ފައިސާއިން ކަމަށާއި، މާނައަކީ އެމީހާއަކީ ރައްޔިތުންގެ ހާދިމެއް ކަމަށެވެ. އެހެންކަމުން އެމީހެއްގެ ފަރާތުން މަސައްކަތުގެ ހުނަރު ނުދެއްކި މަގާމުން ވަކިވެގެން ދާންޖެހޭ ވަގުތެއް އަތުވެއްޖެނަމަ އެކަމާ ޝަކުވާ ކޮށްގެން ނުވާނޭކަމަށް މުންދު ވިދާޅުވިއެވެ.
އަޅުގަނޑުމެން ސިމެނޭގޮތަށް އަޅުގަނޑުމެން އެއްވެސް މީހަކަށް ލިބޭ ހަދިޔާއެއް ނޫން މީކީ. އަޅުގަނޑު ގަބޫލެއް ނުކުރަން އަޅުގަނޑުގެ ވަޒީފާއަކީ އަޅުގަނޑަށް ސިޔާސީ ގޮތުން އަޅުގަނޑުގެ ޕާޓީއަށް ވަފާތެރިވީތީ އަޅުގަނޑަށް ފަސްއަހަރު ދުވަހާ ފީސަބީލިއްލާހި ލިބިފައިވާ ހަދިޔާއެއް ކަމަކަށް. ޕާފޯމަންސް ނުދެއްކޭ ކަމަށް ވެއްޖެއްޔާ އަޅުގަނޑު ނުކުމެގެން ދާންޖެހޭ ހާލަތެއް އަންނައިރު އަޅުގަނޑު ޝަކުވާއެއް ކޮށްގެން ނުވާނެ
ޗީފް ގަވަމަންޓް ސްޕޯކްސްޕާސަން މުޙައްމަދު ޙުސައިން ޝަރީފް (މުންދު)
މުންދު ވިދާޅުވީ ސިޔާސީ މީހަކަސް އެމީހެއްގެ މަގާމުގައި ކުރަންޖެހޭ ކަންކަން ނުކުރެވޭނަމަ އެހިސާބުން ޖެހޭނީ ވަކިވާން ކަމަށާއި، ސިޔާސީ މުއައްޒަފުންގެ މަސައްކަތުގެ ފެންވަރު ވަޒަންކުރުމަކީ ސަރުކާރުން މީގެ އަހަރެއް ކުރިންވެސް ކުރި މަސައްކަތެއްކަމަށެވެ. އެގޮތުން މިހާރުވެސް އެ މަސައްކަތް ކުރަމުންދާކަމަށް މުންދު ފާހަގަކުރެއްވިއެވެ.
މުންދު ވިދާޅުވީ މިކަމަކީ ވަކި އަދަދަކަށް މުއައްޒަފޔުން ވަކިކުރުމަށް ނުވަތަ، މާލީ ވިސްނުމަކުން ކުރާ ކަމެއް ނޫންކަމަށާއި، މިއީ ސިޔާސީ މުވައްޒަފުންގެ ޕާފޯމަންސް އެސެސްކުރުމަށް އޮންނަ ސިޔާސަތުގެ ތެރެއިން ކުރިއަށްދާ ކަމެއްކަމަށެވެ. އެގޮތުން ސަރުކާރުގެ ހުރިހާ ވުޒާރާތަކާ ހުރިހާ އިދާރާތަކެއްގަ މިހާރުވެސް އެ މަސައްކަތް ކުރިއަށްދާކަން މުންދު ފާހަގަކުރެއްވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
