ކުރީ ސަރުކާރުން، މާލެ ސިޓީ ކައުންސިލަށް، އެއްވެސް ކަމެއްގައި ހުރަހެއް ނާޅާ: ފައްޔާޒު

ކުރީގެ ރައީސް އިބްރާހިމް މުހައްމަދު ޞާލިހު ގެ ސަރުކާރުން މާލެ ސިޓީ ކައުންސިލަށް އެއްވެސް ކަމެއްގައި ހުރަސް ނާޅާ ކަމަށް، އެ ސަރުކާރުގެ އިކޮނަމިކް އަދި އެމްޑީޕީގެ ޗެއަރޕާސަން ފައްޔާޒު އިސްމާއީލް ވިދާޅުވެއްޖެއެވެ.

އިއްޔެ ބޭއްވުނު މާލޭ މޭޔަރ ކަމުގެ ބައި-އިލެކްޝަން އެމްޑީޕީ ކެންޑިޑޭޓް އަދި ކުރީގެ ސީއީއޯ އާދަމް ޢާޒިމް ކާމިޔާބު ކުރެއްވުމާއި ގުޅިގެން އެކަމުގެ އުފާ ފާޅުކުރުމަށް ބޭއްވި ޖަލްސާއަށްފަހު، ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ފައްޔާޒު ވަނީ، އެމްޑީޕީ ސަރުކާރުގައި، މިހާރުގެ ރައީސުލްޖުމްހޫރިއްޔާ ޑރ މުހައްމަދު މުޢިއްޒު މާލޭ މެޔަރ ކަމަށް ހުންނެވިއިރު ކަންކަމަށް ހުރަސް އަޅާފައިވާ ކަމަށް ދެކެވޭ ވާހަކަ ތަކަށް ރައްދު ދެއްވާފައެވެ.

މީގެ ދެމަސްދުވަސް ކުރިން، ރައީސުލްޖުމުހޫރިއްޔާ ހުންނެވީ މާލޭގެ މޭޔަރ ގެ މަގާމުގައި. އަޅުގަނޑުމެން އޭރު ތިބީ ސަރުކާރުގައި. އަޅުގަނޑުމެންނެއް ސިޓީ ކައުންސިލަށް އެއްވެސް ކަމަކަށް ހުރަހެއް ނާޅަން. އަޅުގަނޑުމެންގެ ސަރުކާރުގައި ކައުންސިލް ތަކަށް ހަގީގީ ބާރުވެރިކަން ދިނިން. އަޅުގަނޑުމެންގެ މަޖިލީހުން ފާސްކޮށްގެން މާލީ ބާރުވެރި ކަމާ، ހުރިހާ ބާރުވެރިކަމެއް ދީފައި އެ އޮތީ އަޅުގަނޑުމެން.

ފައްޔާޒު އިސްމާއީލް

ފައްޔާޒު މިހެން ވިދާޅުވެފައި ވާއިރު، ސޯލިހުގެ ސަރުކާރުން ކަންކަން ކުރެއްވީ ލާ މަރުކަޒީ ގާނޫނާއި ޚިލާފަށް ކަމަށް އޭރު މޭޔަރ ކަމުގައި ހުންނެވި ރައީސް މުޢިއްޒުގެ އިތުރުން މާލެސިޓީ ކައުންސިލަށް އެމްޑީޕީ ޓިކެޓްގައި ހޮވިވަޑައިގެންނެވުމަށްފަހު ޑިމޮކްރެޓްސް އާއި ގުޅުވައިގެންނެވި ކައުންސިލަރ ސައިފް ފާތިހް ވެސް ވަނީ ވިދާޅުވެފަ އެވެ.

އެގޮތުން، އަމީނީ މަގު ހެދުމުގެ މަސައްކަތް ސިޓީ ކައުންސިލް އަތުން އަތުލުމާއި، އަދި މާލޭގެ މުނިސިޕަލް އެހެން ބައެއް ޚިދުމަތްތަކުގެ އިތުރުން ހުޅުމާލޭގެ މުނިސިޕަލް ޚިދުމަތްތައްވެސް ލާ މަރުކަޒީ ގާނޫނުގައިވާ ފަދައިން ސިޓީ ކައުންސިލްގެ ބެލުމުގެ ދަށުން ކުރިއަށް ނުގެންދާތީ މާލެ ސިޓީ ކައުންސިލުން ވަނީ ވަރަށް ބޮޑު ނުރުހުން ފާޅުކޮށްފައެވެ.

އެހެން ކަމުން ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވެރިކަމާއި ހަވާލުވެވަޑައިގެންނެވުމަށްފަހު އެމަނިކުފާނު ވަނީ ހުޅުމާލޭގެ މުނިސިޕަލް ޚިދުމަތްތައް މާލެ ސިޓީ ކައުންސިލްގެ ބެލުމުގެ ދަަށަށް ގެނެސް، ލާ މަރުކަޒީ ގާނޫނާއި އެއްގޮތަށް ސިޓީ ކައުންސިލް ހިންގުމަށް ފުރިހަމަ އެއްބާރުލުން ދެއްވާނެ ކަމަށް ވިދާޅުވެފައެވެ.