އެމްޑީޕީއަށް ބޭނުން ގޮތަކަށް ގައުމު ހިންގަން ލިބުނު، އެކަމަކު ކުރީ ދަރަނި: މިނިސްޓަރު ޚަލީލު

އެމްޑީޕީއަށް ބޭނުން ގޮތަކަށް ގައުމު ހިންގަން ލިބުނުކަމަށާއި ނަމަވެސް އެޕާޓީން ދަޢުލަތް ކުރީ ދަރަނިކަމަށް ހެލްތު މިނިސްޓަރު ޑރ. އަބްދުﷲ ހަލީލް ވިދާޅުވެއްޖެއެވެ.

މިނިސްޓަރު ޚަލީލު ރޭ އެކްސްގައި ކުރި ޕޯސްޓެއްގައި ވަނީ އެމްޑީޕީގެ ސުޕާމެޖޯރިޓީ ވެރިކަމަށް އަލިއަޅުވާލާފައެވެ. ޙަލީލު ވިދާޅުވީ، 2018 ވަނަ އަހަރުގައި ވެރިކަމެއް ރައްޔިތުން ދިންކަމަށާއި އަދި 2019 ވަނަ އަހަރު މަޖިލީހުގެ ސުޕަރ މެޖޯރިޓީވެސް ރައްޔިތުން ދެއްވި ކަމަށެވެ.

އެމްޑިޕީގެ ވެރިކަމަކާއި އެމްޑީޕީގެ ސުޕާމެޖޯރިޓީ މަޖިލީހަށް ލިބި ބޭނުން ގޮތަަކަށް ގައުމު ހިންގަން އެޕާޓީއަށް ލިބުނުކަމަށާއި، ނަމަވެސް 60 ބިލިޔަނުން ދައުލަތް ކުރީ ދަރަނިކަމަށް ޚަލީލު ވިދާޅުވިއެވެ.

ރައްޔިތުންނަށް ދޭން ލާޒިމްކުރާ އަސާސީ ޚިދުމަތެއް ކުރިނޭރުވުނު. ފެން، ކަރަންޓް، ސިއްހީ ނިޒާމް، ތަޢުލީމީ ނިޒާމް ވެރިކަން ނިމުނު އިރު އޮތީ ނޭވާ ގޮޅިއަށް އެޅިފައި. މިވެރިންގެ މިސްރާބު ހުރި ހަމަމަގަކީ މިއީ!

މިނިސްޓަރު ޙަލީލު އެކްސްގައި ވިދާޅުވެފައިވެއެވެ.

މިނިސްޓަރު މިފަދައިން ވިދާޅުވެފައިވާއިރު، ރައީސް ޑރ. މުޙައްމަދު މުއިއްޒުވެސް މަޖިލީސް އިންތިހާބުގައި ވާދަކުރައްވާ ސަރުކާރު ކެންޑިޑޭޓުންގެ ކެމްޕެއިން ޖަލްސާގައި ގެންދަވަނީ ތަކުރާރުކޮށް އެމްޑީޕީ ސުޕާމެޖޯރިޓީއާއި ބެހޭގޮތުން ވާހަކަފުޅު ދައްކަވަމުންނެވެ. އެގޮތުން، އެމްޑިޕީން މަޖިލިސް އިންތިހާބުގެ މެޖޯރިޓީ ދެމެހެއްޓުމަށް އެދެމުން އަންނައިރު މިވީހާދުވަހު ކުރެއްވީ ކޮން ކަމެއްތޯ ރައީސް  މުއިއްޒު ވަނީ ސުވާލު އުފައްދަވައިފައެވެ.

ރައީސް މުއިއްޒު ވިދާޅުވީ، އެމްޑީޕީން ބުނަމުންދަނީ އެޕާޓީއަށް މެޖޯރިޓީ ދެއްވުމަށް ކަމަށާއި، އެޕާޓީން އޭރުގައި ދޭން ބުނި ފެލްޓުތަކާއި ގޯތިތައް ރައްޔިތުންނަށް ދޭނެކަމަށް ބުނަމުންދާ ކަމަށެވެ. ނަމަވެސް، އެޕާޓީއަށް އެކަން ކުރައްވަން އާ މެޖޯރިޓީއެއް ބޭނުންވަނީ ކީއްވެތޯއާއި، މިހާރުވެސް އޮތީ އެޕާޓީގެ މެޖޯރިޓީ ނޫންތޯ ސުވާލު އުފައްދަވަވާ ރައީސް މުއިއްޒު ވިދާޅުވީ، އެމަނިކުފާނުގެ ވެރިކަން ފެށިގެން އައި ދުވަހުވެސް މެޖޯރިޓީ އޮތީ އެމްޑީޕީ އަތުގައި ކަމަށެވެ. އެމަނިކުފާނުގެ ވެރިކަމަށް ހަތަރު މަސްދުވަސް ވެގެން ދިޔައިރުވެސް އަދިވެސް އޮތީ ހަމަ އެ މެޖޯރިޓީކަމާއި ހަމަ އެއްކަމެއްވެސް ނުކުރައްވައެއް ނޫންތޯ ވަނީ ސުވާލު އުފައްދަވާފައެވެ.