ކަލައިދޫ ކޯޒްވޭގެ ޑިޒައިނަށް ގެންނަން ފެންނަ ބައެއް ބަދަލުތައް ހުށައަޅައިފި

ލ.ކަލައިދޫ ކޯޒްވޭގެ ޑިޒައިނަށް ގެންނަން ފެންނަ ބައެއް ބަދަލުތައް އެރަށު ކައުންސިލުން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އަށް ހުށައަޅައިފިއެވެ.

މި ބަދަލުތައް ކަލައިދޫ ކައުންސިލުން ރައީސް ޑރ.މުޢިއްޒަށް ހުށައަޅާފައިވަނީ އެމަނިކުފާނު ކަލައިދޫ ކައުންސިލާއި އެ ރަށުގެ އަންހެނުންގެ ތަރައްގީ އަށް މަސައްކަތް ކުރާ ކޮމިޓީ އާއި އެކު މިއަދު ކަލައިދޫ އިޖުތިމާޢީ މަރުކަޒުގައި ބޭއްވި ބައްދަލުވުމުގައިއެވެ.

ކަލައިދޫ ކޯޒްވޭގެ ޑިޒައިނަށް ގެންނަން ގެންނަން ފެންނަ ބައެއް ބަދަލުތައް ރައީސް ޑރ.މުޢިއްޒު އަށް ހުށައެޅުމުގެ އިތުރުން، އެ ރަށުގެ ކައުންސިލުން ވަނީ ރަށުގެ ތަރައްޤީއަށް ބޭނުންވާ ބައެއް މަޝްރޫޢުތައް ހުއްޓިފައިވުމުގެ ސަބަބުން ކުރިމަތިވާ ދަތިތަކާއި ކަލައިދޫ  ލޭންޑް ޔޫސް ޕްލޭން ފާސްނުވެ ގިނަ ދުވަސްވުމުގެ ސަބަބުން ކުރިމަތިވާ ދަތިތައް ވެސް ފާހަގަކޮށްފައެވެ.

ހަމައެއާއިއެކު، މި ބައްދަލުވުމުގައި ރަށުގެ ކައުންސިލުން ވަނީ، ކަލައިދޫ ބަނދަރުގެ ޙާލަތު ރަނގަޅު ކުރުމާއި ފުޓްސަލް ކުޅޭނެ ބޮޑު ދަނޑެއް އަޅައިދެއްވުމަށް ވެސް ރައީސް ޑރ.މުޢިއްޒު އަށް ދަންނަވާފައެވެ. އަދި ރަށުގެ ބޮޑު މަގުގައި ތާރުއެޅުމުގެ މަސައްކަތް ކުރިއަށް ނުގޮސް ހުއްޓިފައި ވާތީ އެކަން ރައީސް ޑރ.މުޢިއްޒުގެ ސަމާލުކަމަށް ގެނެސް، ކަލައިދޫގައި ކުނި ނައްތާލުމުގެ ނިޒާމުގައި ހުރި ދަތިތައް ޙައްލުކުރުމާއި ރަށުގެ ރައްޔިތުން މޫދަށް އެރިލާނެ ސަރަޙައްދެއްގެ އިތުރުން ޕޮލިސް ޕޯސްޓެއް ޤާއިމުކުރުމުގެ މުހިންމުކަން ވެސް ރަށުގެ ކައުންސިލުން ވަނީ ފާހަގަކޮށްފައެވެ.

މީގެ އިތުރުންވެސް، އިސްދޫ ކައުންސިލް ފަދައިން ކަލައިދޫ ކައުންސިލުންވެސް ވަނީ ރަށުގެ އިޙްތިސާސްގެ މައްސަލައަށް އެދެވޭ ޙައްލެއް ހޯދައިދެއްވުމަށް ރައީސް ޑރ.މުޢިއްޒު އަށް ދަންނަވާފައެވެ.

ރައީސް ޑރ.މުޢިއްޒު ވަނީ ކައުންސިލްގެ ފަރާތުން ފާހަގަކުރި ކަންބޮޑުވުންތައް ހައްލުކޮށްދެއްވުމަށް މަސައްކަތް ކޮށްދެއްވާނެކަމުގެ ޔަޤީންކަން ދެއްވައި، މިބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުން މެދުވެރިކުރައްވައި ކައުންސިލުން ފާހަގަކުރި މުހިންމު ކަންތައްތަކުގެ އެންމެ ފަހުގެ މަޢުލޫމާތު ހިއްސާކުރައްވާފައެވެ.