އެސްޖޭ މިސްކިތް ނިންމަން ބުނި ތާރީހަށް ނިމޭނެތަ؟

ހުޅުމާލެ ފޭސް ދޭއް ޓަވަރު 16 އާ ދިމާލުގައި ހެޔޮއެދޭ ފަރާތެއްގެ އެހީގައި ބިނާކުރަމުންގެންދާ މިސްކިތުގެ މަސައްކަތް ނިމިފައިވާ ކަމަށާއި، ޑިސެމްބަރުމަހުގެ ތެރޭގައި އެ މިސްކިތް ހުޅުވުމަށް ނިންމާފައިވާކަން އިސްލާމިކް މިނިސްޓަރު ޑރ.މުހައްމަދު ޝަހީމް އިއްޔެ ވަނީ ސޯޝަލް މީޑިއާގައި ވިދާޅުވެފައެވެ. މިނިސްޓަރު އެވާހަކަ ހިއްސާކުރެއްވީ މިސްކިތުގެ މަންޒަރުތައް ދައްކުވައިދޭ ޑްރޯން ވީޑިއޯއަކާ އެކުގައެވެ.

މިނިސްޓަރުގެ އެ ޕޯސްޓަށް ގިނަ އަދަދެއްގެ ކޮމެންޓްތައް ލިބިފައިވާއިރު، އެންމެގިނަ މީހުން ސުވާލުތައް އަމާޒުކޮށްފައިވަނީ ފޭސް ދޭއް ސަލާހުއްދީން ސްކޫލް ކައިރީ އެސްޖޭއިން ބިނާކުރަމުންދާ މިސްކިތް ނިމޭނެ ދުވަހަކާ ގުޅޭގޮތުންނެވެ. އެންމެފަހުން މިއަހަރުގެ ފެބުރުއަރީމަހު އިސްލާމިކް މިނިސްޓްރީން ބުނެފައިވަނީ އެސްޖޭއިން ބިނާކުރަމުންދާ މިސްކިތް މިއަހަރުގެ ޑިސެމްބަރުމަހުގެ ތެރޭގައި ނިމޭނޭކަމަށް އެކުންފުނިން ބުނެފައިވާކަމަށެވެ. އެގޮތުން އޭރު ކުރިއަށްދާކަމަށް ބުނެފައިވަނީ އެ މިސްކިތުގެ ކޮންކްރިޓް އަރޗްތައް ހެދުމުގެ މަސައްކަތެވެ. އާއްމުންގެ ޝަކުވާތައް ބޮޑުވުން ފާޅުކުރުމާއި އަދި މީޑިއާގައި އެވާހަކަތައް ދެކެވެން ފެށުމާއެކު އެސްޖޭ ކުންފުނިން ވަނީ ަމަ އެދުވަސްކޮޅު މިސްކިތުގެ މަސައްކަތް އަލުން ފަށާފައެވެ.

އިސްލާމިކް މިނިސްޓްރީގެ ޓީމުން މިދިޔަ އަހަރުގެ ނޮމްބަރުމަހު މިސްކިތް އިމާރާތްކުރާ ސައިޓަށްގޮސް ބެލުމަށްފަހު އޭރު ބުނެފައިވަނީ މިއަހަރުގެ ޖޫންމަހުގެ ތެރޭގައި މިސްކިތުގެ މަސައްކަތް ނިންމާލެވޭނޭކަމަށް އެސްޖޭއިން ބުނެފައިވާކަމަށެވެ. ކުރިން އެ މިސްކިތުގެ މަސައްކަތް ލަސްވަމުންދާ މައްސަލާގައި އިސްލާމިކް މިނިސްޓްރީން މިދިޔަ 2023 ވަނަ އަހަރުގެ މާޗްމަހު ބުނެފައިވަނީ، މަސައްކަތް މަޑުޖެހުނީ ފައުންޑޭޝަން އެޅިފަހުން ބެންޗްމާކްތަކުގައި މައްސަލަތަކެއް ދިމާވެގެން ކަމަށެވެ.

އެސްޖޭއިން ޑިސެމްބަރުމަހަށް މިސްކިތް ނިންމަން ބުނިތާ 8 މަސްދުވަސް ފާއިތވެގެން ގޮސްފައިވާއިރު އަދިވެސް މިސްކިތުގެ މަސައްކަތް ހުރީ ގާތްގަނޑަކަށް އޭރުވެސް ފެންނަން ހުރި ގޮތަށެވެ. މަސައްކަތް މާބޮޑަށް ކުރިއަށްގޮސްފައިވާތަނެއް ނުފެނެއެވެ.

އެސްޖޭމިސްކިތް މިހާރު ގޮސްފައިވާ ހިސާބަށް ބަލާއިރު ބޭރުފާރުގައި ސިމެންތި ޖަހާފައިވާއިރު، މިސްކިތުގެ އެތެރޭގެ މަސައްކަތްތައްވެސް މާބޮޑަށް ކުރިއަށްގޮސްފައިވާތަނެއް ނުފެނެއެވެ. މިނިސްޓަރުގެ ޕޯސްޓަށް ކޮމެންޓްކުރި ބައެއް ފަރާތްތަކުން ވަނީ މަސައްކަތް މިހާރު ކުރިއަށްދާގޮތުން ކުރިއަށްއޮތް 5 އަހަރުތެރޭގައިވެސް މިސްކިތް ނިމޭނޭކަމަށް ގަބޫލުނުކުރާކަމަށް ބުނެ ޝުއޫރު ފާޅުކޮށްފައެވެ.

އެސްޖޭ މިސްކިތުގެ މައްސަލާގައި ވޮއިސްއިން އިސްލާމިކް މިނިސްޓްރީއަށް ސުވާލުކުރި ނަމަވެސް އަދި މިހާތަނަށް ޖަވާބެއް ލިބިފައެއް ނުވެއެވެ. އެސްޖޭއިން ހުޅުމާލޭގައި ތަރައްޤީކުރަމުންދާ މިސްކިތުގެ މަސައްކަތް ލސްވެފައިވާއިރު، މިސްކިތުގެ މަސައްކަތް އެދެވޭގޮތެއްގައި ކުރަމުން ނުދާކަމަށް އެ ސަރައްދުގައި ދިރިއުޅެމުންދާ ބައެއް ފަރާތްތަކުން ވަނީ ވޮއިސްއަށް މައުލޫމާތު ހިއްސާކޮށްފައެވެ. އެގޮތުން އެވަރުގެ މިސްކިތެއް ހެދުމުގެ މަސައްކަތުގައި އެކަށީގެންވާ އަދަދަކަށް މީހުން މަސައްކަތް ކުރަން އުޅޭތީ ނުފެންނަ ކަމަށްވެސް ބައެއް މީހުން ބުންޏެވެ.

"އެމީހުން މިސްކިތް ނިންމާތީ އުޅޭތަނެއް ނުފެނޭ. އެތަނުގެ ބިން އެމީހުން ބޭނުންކުރަނީ ގުދަނަކަށް، މިސްކިތް ނިންމަން އުޅޭނަމަ މިހާރު ހުންނާނީ ނިމިފައި" އެ ހިސާބުގައި ދިރިއުޅެމުންދާ މީހަކު ވޮއިސްއާ މައުލޫމާތު ހިއްސާކުރަމުން ބުންޏެވެ.

ހުޅުމާލޭ ފޭސް ދޭއްގައި އެސްޖޭއިން ބިނާކުރަމުންދާ މިސްކިތުގެ މަސައްކަތުގެ އެއްބަސްވުމުގައި ސޮއިކޮށްފައިވަނީ، 2022 ވަނަ އަހަރުގެ ޖެނުއަރީމަހުގެ ތެރޭގައެވެ. އެސްޖޭއިން އެ މިސްކިތް ނިންމާގޮތަށް އޮތީ އަހަރުދުވަހުގެ ތެރޭގައެވެ. މިސްކިތުގައި އެއްފަހަރާ 1،400 މީހުންނަށް ނަމާދުކުރެވޭއިރު، މިސްކިތުގެ ބޭރާއެކު އެއްފަހަރާ 3،000 މީހުންނަށް ނަމާދުކުރެވޭނޭކަމަށް އިސްލާމިކް މިނިސްޓްރީން އޭރު ވަނީ ބުނެފައެވެ.