އެމްޑަބްލިޔުއެސްސީގެ އިސްވެރިންނަށް ޚާއްޞަކޮށްގެން ކުރިއަށްގެންދިޔަ ލީޑަރޝިޕް ވޯކްޝޮޕް ކާމިޔާބުކަމާއެކު ނިންމާލައިފި

މާލެ ވޯޓަރ އެންޑް ސެވަރޭޖް ކޮމްޕެނީ (އެމްޑަބްލިޔުއެސްސީ) ގެ ސީނިއަރ ލީޑަރޝިޕް ޓީމުގެ 39 އަށް ވުރެ ގިނަ ވެރިން ބައިވެރިވި ޚާއްޞަ ލީޑަރޝިޕް ވޯކްޝޮޕެއް ކާމިޔާބުކަމާއެކު ނިންމާލައިފިއެވެ.

މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން އިންތިޒާމުކޮށްގެން ކ. ގިރިފުށީގައި ދެ ދުވަސް ބައިގެ މުއްދަތަށް ކުރިއަށްގެންދިޔަ މި ވޯކްޝޮޕަކީ އެމްޑަބްލިޔުއެސްސީގެ އެކި ޑިވިޜަންތަކުގެ އިސްވެރިންނާއި، ޑެޕިއުޓީން އަދި ޑިޕާޓްމަންޓްތަކުގެ ހެޑުންނަށް އަމާޒުކޮށްގެން ބޭއްވި ޕްރޮގްރާމެކެވެ.

އެމްޑަބްލިޔުއެސްސީން ބުނީ މި ވޯކްޝޮޕްގެ މައިގަނޑު މަޤްޞަދަކީ ކުންފުނީގެ އެކި ޑިވިޜަންތަކުގެ މެދުގައި ގުޅުން ބަދަހިކޮށް، އޮޕަރޭޝަނަލް ގޮތުން ދިމާވާ ގޮންޖެހުންތަކުން އަރައިގަނެވޭނެ ފަދަ އެއްބައިވަންތަ އަދި ޤާބިލު ލީޑަރޝިޕް ސަގާފަތެއް ބިނާކުރުން ކަމަށެވެ. އެގޮތުން، އިސް މަޤާމުތަކުގައި ނިންމުންތައް ނިންމުމާއި، ކާރިސާތައް މެނޭޖުކުރުމާއި، ސްޓްރެޓީޖިކް ގޮތެއްގައި ވިސްނުމުގެ ހުނަރު ތަރައްޤީކުރުމަށް ޚާއްޞަ ތަމްރީނުތަކެއް މި ޕްރޮގްރާމްގެ ތެރެއިން ވަނީ ކުރިއަށް ގެންގޮސްފައެވެ.

މީގެ އިތުރުން މަސައްކަތުގެ މާޙައުލުގެ ރައްކާތެރިކަމަށާއި ކުއްލި ޙާލަތްތަކަށް ތައްޔާރުވުމަށް އިސްކަންދިނުމުގެ ގޮތުން ފަސްޓް އެއިޑާއި އަލިފާން ނިއްވުމުގެ ޢަމަލީ ތަމްރީނުތައް ވެސް ބައިވެރިންނަށް ދީފައިވެއެވެ. އަދި އެމްއެންޑީއެފްގެ ތަމްރީނުތަކުގައި ބޭނުންކުރާ ހުރަސްތައް ގިރާކުރުމުގެ އުނދަގޫ ހަރަކާތްތަކުގައި ބައިވެރިވެ، ޖިސްމާނީ ގޮތުންނާއި ކެތްތެރިކަމުގެ ގޮތުން އަމިއްލަ ޤާބިލުކަން ވަޒަންކުރުމުގެ ފުރުޞަތު ވެސް ވެރިންނަށް ލިބިގެންދިޔައެވެ.

މި ވޯކްޝޮޕްގެ ޚާއްޞަ އެއް ހަރަކާތަކީ ކަނޑުމަތީގެ ކުއްލި ޙާލަތްތަކުގައި އުޅަނދު ދޫކޮށް މޫދަށް ފުންމާލައިގެން ސަލާމަތްވުމަށް ޢަމަލުކުރާނެ ގޮތްތައް ދަސްކޮށްދިނުމަށް ހިންގި ޢަމަލީ ތަމްރީނެވެ. ވޯކްޝޮޕް ނިންމި ބައިވެރިން ވަނީ މިއީ ޑިވިޜަންތަކުގެ މެދުގައި އޮތް ގުޅުން ބަދަހިކޮށްދީ، މަސައްކަތުގެ އަމާޒު ހާސިލުކުރުމަށް ލިބުނު ވަރަށް އަގުހުރި އަދި ބަދަލުތަކެއް ގެނުވި ތަޖުރިބާއެއްގެ ގޮތުގައި ފާހަގަކޮށްފައެވެ.

މި ތަމްރީނު ޕްރޮގްރާމާ ގުޅޭގޮތުން އެމްޑަބްލިޔުއެސްސީގެ މެނޭޖިންގ ޑިރެކްޓަރ ހުސައިން ފަހުމީ ވިދާޅުވީ، އެމްއެންޑީއެފް ގިރިފުށީ ޓްރޭނިންގ ސެންޓަރުގައި ކުރިއަށްގެންދިޔަ "ލީޑަރޝިޕް އެންހާންސްމަންޓް ޕްރޮގްރާމް" ކުންފުނީގެ އިސްވެރިން ކާމިޔާބުކަމާއެކު ފުރިހަމަކޮށްފައިވާ ކަމަށެވެ. އަދި މިއީ ގުޅިގެން މަސައްކަތްކުރުމުގެ ރޫހާއި، އަޚުލާޤާއި، ސްޓްރެޓީޖިކް ވިސްނުމުގެ އިތުރުން ސާބިތުކަން އިތުރުކުރުމަށް އެޅުނު ވަރަށް މުހިންމު ފިޔަވަޅެއް ކަމަށް ވިދާޅުވިއެވެ.

"މި ޕްރޮގްރާމުން ޙާސިލުކުރެވުނު ޢިލްމާއި ތަޖުރިބާގެ އަލީގައި ކުންފުނީގެ ނިންމުންތައް އިތުރަށް ހަރުދަނާވެ، މަސައްކަތުގެ މާޙައުލުގައި ޓީމުތަކުގެ ޤާބިލުކަން އިތުރުވެ، މުސްތަޤުބަލަށް ތައްޔާރުވެފައިވާ ލީޑަރުންތަކެއް އުފެދިގެންދާނެ. މީގެ ސަބަބުން ކުންފުނީގެ ހިންގުން ހަރުދަނާވެ، ރައްޔިތުންނަށް ދެވޭ ޚިދުމަތުގެ ފެންވަރު މަތިވެގެންދާނެ،" އެމްޑީ ވިދާޅުވިއެވެ.

މީގެއިތުރުން ފަހުމީ ވަނީ، ޤައުމަށް ބޭނުންތެރި، ޤާބިލު ލީޑަރުން ބިނާކުރުމުގައި ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ޑރ. މުޙައްމަދު މުޢިއްޒު ދެއްވާ ޚާއްޞަ އިސްކަމަށާއި، މިނިސްޓަރ އޮފް ޑިފެންސް، ޗީފް އޮފް ޑިފެންސް ފޯސް އަދި އެމްއެންޑީއެފްގެ ލީޑަރޝިޕުން ދެއްވި ފުރިހަމަ އެއްބާރުލެއްވުމަށް ފަށްފަށުން ޝުކުރު އަދާކުރައްވާފައެވެ.

އެމްޑަބްލިޔުއެސްސީން ބުނީ، މިއީ ހިންގުމުގެ ދާއިރާއިންނާއި ސްޓްރެޓީޖިކް ގޮތުން ކުންފުނި ކުރިއަށް ގެންދެވޭނެ ފަދަ ހުނަރުވެރި، ހިންގުންތެރި ލީޑަރުން ބިނާކުރުމަށް އެ ކުންފުނިން ކުރަމުންދާ މުހިންމު އިންވެސްޓްމަންޓެއް ކަމަށެވެ.