މަރުކަޒީ ބޭންކުގެ ޑެޕިއުޓީ ގަވަރުނަރު އިމާދު ވަކިކުރަން ހުށަހަޅައިފި

މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީގެ ޑެޕިއުޓީ ގަވަރުނަރު އަދުމަދު އިމާދު މަޤާމުން ވަކިކުރެއްވުމަށް ރައީސުލްޖުމްހޫރިއްޔާއަށް ލަފާދިނުމަށް މާލިއްޔަތު ކޮމިޓީއަށް ހުށަހަށައިފިއެވެ.

އިމާދު ވަކިކުރުމުގެ މައްސަލަ މަޖިލީހުގެ މާލިއްޔަތު ކޮމިޓީއަށް ހުށަހެޅުއްވީ މިއަދު އޮތް އެ ކޮމިޓީގެ ބައްދަލުވުމުގައި ވެރިކަންކުރާ ޕީއެންސީއަށް ނިސްބަތްވާ ދިއްދޫ ދާއިރާގެ މެންބަރު އަބްދުއް ލަތީފް މުހައްމަދެވެ. މި މައްސަލަ ކޮމިޓީއަށް ހުށަހެޅުމުން ބައެއް މެމްބަރުން ވަނީ މި މައްސަލަ މަޖިލީހުގެ ތަޅުމަށް ފޮނުވާލުމަށް ފެންނަކަމަށް ވިދާޅުވެފައެވެ. މަޖިލީހުގެ ތަޅުމަށް ފޮނުވަން ނިންމާފައިވަނީ ކޮމިޓީން އެ މައްސަލަ ބަލާގޮތަށެވެ.

ޑެޕިއުޓީ ގަވަރުނަރު އިމާދު ވަކިކުރެއްވުމަށް ނިންމި މައިގަނޑު ސަބަބެއްކަމަށް ކޮމިޓީއަށް ހުށަހެޅި ސިޓީގައި ބަޔާންކޮށްފައިވަނީ، ނިމިގެންދިޔަ ސަރުކާރުގައި ގަވަރުނަރަކަށް ހުންނެވި ބޭފުޅާ ނިންމެވި ނިންމެވުންތަކުގެ ސަބަބުން ރާއްޖޭގެ އިގްތިސާދީ ހާލަތު އިތުރަށް ގޯސްވެގެންދިޔައިރު، ޑެޕިއުޓީ ގަވަރުނަރުގެ މަޤާމުގެ ހައިސިއްޔަތުން އަދާކުރަންޖެހޭ ޒިއްމާތަށް އަދާކޮށްފައި ނުވުމެވެ.

މިއަދުގެ ކޮމިޓީ ބައްދަލުވުުގައި ޕީއެންސީއަށް ނިސްބަތްވެ ވަޑައިގަންނެވާ ބައެއް މެމްބަރުން ވަނީ ޑެޕިއުޓީ ގަވަރުނަރުގެ މަޤާމުން އިމާދު ވަކިކުރަންޖެހޭ ކަމަށް ވިދާޅުވެ ވާހަކަދައްކަވާފައެވެ. އެގޮތުން މިދިޔަ ސަރުކާރުގައި އެމްއެމްއޭއިން އިގްތިސޯދާ ގުޅޭގޮތުން ދޯހަޅި އެތައް ނިންމުންތަކެއް ނިންމިއިރު، އެކަމުގައި ޑެޕިއުޓީ ގަވަރުނަރުގެ ހައިސިއްޔަތުން ޒިންމާ އަދާކޮށްފައިނުވާކަމަށް އެ މެމްބަރުން ފާހަގަކުރެއްވިއެވެ. އެހެންކަމުން ކުރީގެ ގަވަރުނަރު އަލީ ހާޝިމެކޭ އެއްހަމަޔަކުން ޑެޕިއުޓީ ގަވަރުނަުވެސް މިކަމުގެ ޒިންމާ ނަގަންޖެހޭނޭކަމަށް ޕީއެންސީއަށް ނިސްބަތްވެ ވަޑައިގަންނަވާ މެމްބަރުން ވިދާޅުވިއެވެ.

ނަމަވެސް ކޮމިޓީގައި އެމްޑީޕީ ތަމްސީލްކުރައްވަމުން ގެންދަވާ ޑރ.އަހުމަދު ޝަމްހީދު ވަނީ ޕީއެންސީގެ ހުށަހެޅުމަށް ވަރަށްބޮޑަށް ފާޑު ވިދާޅުވެ ވާހަކަދައްކަވާފައެވެ. މިގޮތުން ޑެޕިއުޓީ ގަވަރުނަރު މަޤާމުން ވަކިކުރަން އުޅެނީ މި ސަރުކާރުން މިނިވަން މުއައްސަސާތަކުގެ ބާރު ކަނޑުވާލުމަށްކަމަށް ޝަމްހީދު ވަނީ ސިފަކުރައްވައި ވާހަކަދައްކަވާފައެވެ.

ކޮމިޓީގައި އިންނަވާ އެމްޑީޕީއަށް ނިސްބަތްވެ ވަޑައިގަންނަވާ ހަނިމާދޫ ދައިރާގެމެމްބަރު ޢަބްދުލްޢަފޫރު މޫސާ (ގަޕޯ) ވިދާޅުވީ މިއީ ދިއްދޫ ދައިރާގެ މެމްބަރު ހުށަހެޅުއްވި މައްސަލައެއް ނޫންކަމަށާއި މިއީ ސީދާ ސަރުކާރުން ބުނެގެން ހުށަހެޅި މައްސަލައެއް ކަމަށެވެ. ބޭނުމަކީ ހުޅުމާލެއިން ބިން ގަންނަން ދެކޮޅުހަދާ މެމްބަރުން ނިޒާމުގެ ތެރެއިން ބޭރުކުރުންކަމަށް ގަޕޯ ވިދާޅުވިއެވެ.