ރާއްޖޭގެ ކޮންމެ ދިމާލަކުންވެސް ފެންނަނީ ފާލުން ނެއްޓިފައިވާތަން؛ އެދަނީ ފަރަށް އަރަން: ޝާހިދު

ރާއްޖޭގެ ބަލާލި ކޮންމެ ދިމާލަކުން ވެސް ފެންނަނީ މިސްރާބު އޮޅި ފާލުން ނެއްޓިފައިވާތަން ކަަމަށް އިދިކޮޅު އެމްޑީޕީ ގެ އަލަށް އިންތިހާބު ވެވަޑައިގެން ރައީސް އަދި ރާއްޖޭގެ ކުރީގެ ޚާރިޖީ ވަޒީރު އަބްދުالله ޝާހިދު ވިދާޅުވެއްޖެއެވެ.

ޝާހިދު މިފަދައިން ވިދާޅުވީ ބުދަ ދުވަހުގެ ރޭ ތިމަރަފުށީ ދާއިރާގެ ކެންޑިޑޭޓްގެ މާލެ ޖަގަހަ ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ. މިގޮތުން ރާއްޖެ ވަނީ ފާލުން ނެއްޓި ކައްސާލާފައި ކަމަށާއި، މިހާރު ދަނީ ހަމަ ސީދާ ފަރަށް އަރަން ކަމަށް ޝާހިދު ވިދާޅުވިއެވެ.

ޝާހިދު ވިދާޅުވީ އެމްޑީޕީން ކުރިއަށް އޮތް 20 މަޖިލިސް ބޮޑުކޮށް ނަގައިގެން އުތުރާއި ދެކުނާއި، އަނެއްކާވެސް މެދުރާއްޖެ ތެރޭގެ އިތުރުން މާލެގައި ފެތުރިގަންނާނެ ކަމަށެވެ.

"ރާއްޖޭގެ ބަލާލި ކޮންމެ ދިމާލަކުން ފެންނަން މިއޮތީ މިސްރާބު މިއޮތީ އޮޅިފައިކަން. ފާލުން ނެއްޓިފައިކަން ކައްސާލާފައިކަން. މިހާރު މިދަނީ ސީދާ ފަރަށް އަރަން. އަޅުގަނޑުމެންގެ ވަރުގަދަ މި ރީނދޫ ލަޝްކަރު އުތުރާއި ދެކުނާއި، އަނެއްކާވެސް މެދުރާއްޖެ ތެރޭގައި މާލޭގައި އަނެއްކާވެސް މިފެތުރިގަންނަނީ."

ޝާހިދު ވިދާޅުވިއެވެ.

މީގެ އިތުރުންވެސް ޝާހިދު ވަނީ އާ ޖޯޝަކާއި އެކު މަޖިލީހުގެ މެޖޯރިޓީ އެމްޑީޕީން ހޯދުމަށް ނުކުންނަ އިރު، ކުރީގެ ރައީސް އަދި އެމްޑީޕީގެ ވަގުތީ ރައީސް ގެ ގޮތުގައި ހުންނެވި، ރައީސް އިބްރާހިމް މުހައްމަދު ޞާލިހު ޕާޓީ އަށާއި ގައުމަށް ކޮށްދެއްވި އަގު ނުކުރެވޭ، ތެދުވެރި، އިޚްލާސްތެރި މަސައްކަތް ހަނދާނަށް ގެންނަން ޖެހޭ ކަމަށް ވެސް ވިދާޅުވެފައެވެ.

"ޅުގަނޑުމެންގެ ޕާޓީ އައު ޖޯޝަކާއި އައު ބާރެއްގައި މަޖިލިސް 20 ބޮޑުކޮށް ނަގަން. ބޮޑުކޮށް މަޖިލިސް 20 ނަގައި ރާއްޖެ މިހާރު ހިފާފައިވާ މިސްރާބު ހަމަ މަގަށް އެޅުވުމަށް މިކަމަށް އަޅުގަނޑުމެން ނުކުތް އިރުގައި އަޅުގަނޑުމެން ހަނދާނަށް ގެންނަންޖެހޭ އަޅުގަނޑުމެންގެ ރައީސް ރައީސް އިބްރާހިމް މުހައްމަދު ސާލިހު ރާއްޖޭގެ ރައީސުލްޖުމްހޫރިއްޔާގެ މަގާމުގައި ހުންނަވާގެންނާއި، ޕާޓީގެ އިސްލީޑެއްގެ މަގާމުގައި ހުންނަވާގެންނާއި، އަދި ޕާޓީގެ ވަގުތީ ރައީސްގެ ގޮތުގައި ހުންނަވާގެން ދިވެހިރާއްޖެއަށްށާއި، މިޕާޓީއަށް ކޮށްދެއްވާ އަގު ނުކުރެވޭ ފަދަ ތެދުވެރި އިހްލާސްތެރި މަސައްކަތްޕުޅުތައް މަތިން."

ޝާހިދު ވިދާޅުވިއެވެ.

ޝާހިދު ރޭގައި ދެއްކެވި ވާހަކަފުޅުގައި ތިމަރަފުށީގެ އެދާއިރާގެ މިސްރާބު އޮޅުވާލާފައިވާ ކަމަށާއި އަމިއްލަ ޕާޓީގެ ކެންޑިޑޭޓަކު ހުއްޓައި އެކަހެރިކޮށްލުމަށްފަހު ސަރުކާރުގެ ކެންޑިޑޭޓަކު ނެރެފައިވާކަން ޝާހިދު ފާހަގަކުރެއްވިއެވެ. ހަމައެހެންމެ، މިސަރުކާރު އަދިވެސް މަސައްކަތް ކުރަނީ ދޮގު ހަދައި އޮޅުވަލައިގެން ކަންކަން ކުރުމަށް ކަމަށް ވެސް ޝާހިދު ވަނީ ވިދާޅުވެފައެވެ.

ރާއްޖޭގެ މަސްވެރިކަން އޮތް ހާލަތަށް އަލި އަޅުވާލާ ޝާހިދު ވިދާޅުވީ ކުރީ ސަރުކާރުން ކޮވިޑް-19ގެ އެންމެ ދަތި ހާލަތުގައި މަސްވެރިންނަށް ފައިސާ ދިން އިރު، އެވަރުވެސް މިސަރުކާރަށް ނުވާ ކަމަށެވެ. އަދި ކުރީ ސަރުކާރުގައި މަސް ކިލޯއެއް ގަންނަ އަގު 25 ރުފިޔާއަށް ބޮޑު ކުރީ ވަރަށް ގިނަ ދިރާސާތައް ހެދުމަށްފަހު އެކަން ކުރެވޭނެ ކަމުގެ ޔަގީންކަން އޮތުމުން ކަމަށާއި މިސަރުކާރަށް އުޅެނީ އެކަން ކުރާނެ ގޮތް ވެސް ނޭނގިގެން ކަމަށް ވިދާޅުވެ ޝާހިދު ވަނީ ސަރުކާރަށް ވަރަށް ބޮޑަށް ފާޑު ވިދާޅުވެފައެވެ.