ދުންފުހީގެ މައްސަލައަށް ދިގު މުއްދަތުގެ ހައްލެއް ހޯދަން ބޭރު ގައުމުތަކާއެކު މަސައްކަތްކުރަނީ

ދުންފުހީގެ މައްސަލައަށް ދިގު މުއްދަތުގެ ހައްލެއް ހޯދަން ބޭރު ގައުމުތަކާއެކު މަސައްކަތްކުރަމުންދާ ކަމަށް ސަރުކާރުން ބުނެފިއެވެ.

މިފަހުން ރާއްޖެ ސަރަހައްދަށް ދުންފުހީގެ އަސަރު އަންނަނީ ވަރަށް ބޮޑަށް ކުރަމުންނެވެ. އެގޮތުން މިއަދުވެސް ވައިގެ ކޮލިޓީ ވަރަށް ބޮޑަށް ދަށްވެ ދުރުފެންނަ މިންވަރު ވަނީ ވަރަށް ކުޑަވެފައެވެ.

މި މައްސަލައާ ގުޅިގެން ފޮރިން މިނިސްޓްރީން މިއަދު ނެރުނު ބަޔާނެއްގައި ބުނީ، ރާއްޖޭގެ ސަރަހައްދަށް މިދުވަސްވަރު ކުރިމަތިވެފައިވާ ދުންފުހީގެ މައްސަލައަކީ، އާންމު ސިއްހަތާއި، ތިމާވެއްޓާއި އަދި ގައުމުގެ އިގްތިސާދާ ސީދާ ގުޅުންހުރި ކަމަކަށްވާތީ، މިއީ ސަރުކާރުން ނުހަނު އިސްކަންދޭ ގައުމީ މައްސަލައެއްގެ ގޮތުގައި ކަނޑައަޅައިފައިވާ ކަމަށެވެ.

އަދި މިކަމުގެ ސަބަބުން އާންމު ރައްޔިތުން ކުރަމުންދާ ކަންބޮޑުވުންތައް ސަރުކާރުން ބަލައިގަންނަ ކަމަށާ، ބޯޑަރު ހުރަސްކޮށް އަންނަ މިފަދަ ވައިގެ ނުސާފުކަމަށް ގިނަ ވަގުތު ހުށަހެޅިފައި ހުރުމަކީ އާންމު ސިއްހަތަށާއި، އިޖުތިމާއީ ދުޅަހެޔޮކަމުގެ އިތުރުން ފަތުރުވެރިކަމަށް ބަރޯސާވެފައިވާ ރާއްޖޭގެ އިގްތިސާދަށް އޮތް ބޮޑު ނުރައްކަލެއްކަން ފާހަގަކޮށްފައިވެއެވެ.

މިނިސްޓްރީން އިތުރަށް ބުނީ، ދުންފުހީގެ މައްސަލައަކީ މުޅި ދެކުނު އޭޝިއާ ސަރަހައްދަށް ކުރިމަތިވެފައިވާ ތިމާވެށީގެ މައްސަލައެއް ކަމަށާ، މޫސުމީ ވަޔާއެކު ސަރަހައްދީ ގައުމުތަކުން ބޭރުވާ ދުމާއި ތަޣައްޔަރުވެފައިވާ ވައި ރާއްޖެއާ ހަމައަށް ފޯރަމުންދާ ކަމަށެެވެ. އަދި ރާއްޖޭގެ ޖަޒީރާވަންތަ ގޮތާއި، ކުޑަ ބިމެއްގައި އާބާދީ ބޮޑުވުމުގެ ސަބަބުން ބޭރުގެ ގައުމުތަކުން އަންނަ މިފަދަ ތިމާވެށީގެ ބަދަލުތަކުގެ ނުރައްކާ ރާއްޖެއަށް ނިސްބަތުން ބޮޑު ކަމަށްވެސް ބުންޏެވެ.

މި މައްސަލައަށް ދާއިމީ ހައްލެއް ހޯދުމަށްޓަކައި އެ މިނިސްޓްރީން ބައިނަލްއަގުވާމީ މައިދާނުގައި މަސައްކަތްތަކެއް ކުރަމުންދާ ކަމަށާ، އެގޮތުން، ސައިންޓިފިކް ދިރާސާތައް ހިއްސާކުރުމާއި، މައުލޫމާތު ބަދަލުކުރުމުގެ މަސައްކަތްތައް ފާހަގަކޮށްފައިވެއެވެ.

އެ މިނިސްޓްރީން އިތުރަށް ބުނީ، ދުންފުހީގެ އަސަރު ކުޑަކުރުމަށާއި، ވައިގެ ސާފުކަން ދެމެހެއްޓުމަށްޓަކައި ދުންފުހީގެ މައްސަލައަށް ދިގު މުއްދަތުގެ ހައްލުތަކެއް ހޯދުމަށް ސަރަހައްދީ އަދި ބައިނަލްއަގުވާމީ ފެންވަރުގައި   މަސައްކަތް ކުރަމުންދާ ކަމަށެވެ.

އަދި ތަރައްގީވަމުންދާ ކުދި ޖަޒީރާ ގައުމެއްގެ ހައިސިއްޔަތުން، ތިމާވެށި ރައްކާތެރިކުރުމާއި ދެމެހެއްޓެނިވި ތަރައްގީއަށް ރާއްޖެއިން އަބަދުވެސް މަސައްކަތް ކުރާނެ ކަމުގެ ޔަގީންކަން މިނިސްޓްރީން ވަނީ ދީފައެވެ.