އެފްއޭއެމް އިންތިހާބުގެ ކަންކަން ބާޠިލްކޮށް އަލުން ފަށަން ފީފާއިން އަންގައިފި!

ފުޓްބޯޅަ އެސޯސިއޭޝަން އޮފް މޯލްޑިވްސް، އެފްއޭއެމް ގެ އިންތިހާބާއި ގުޅިގެން މިހާރު ނިންމާފައިވާ ހުރިހާ ނިންމުމެއް ކެންސަލްކޮށް އަލުން އެ އިންތިޚާބުގެ ކަންކަން ފެށުމަށް ފީފާއިން އަންގައިފި އެވެ.

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ އިންތިޚާބުގައި ވާދަކުރެއްވުމަށް ފޯމު ހުށަހެޅުއްވި ޤައުމީ ޓީމުގެ ކުރީގެ ފޯވާޑް އަޙުމަދު ޠާރިޤް (ޓޮމް) ގެ ކެންޑިޑެންސީގެ ޝަރުތު ފުރިހަމަ ނުވާ ކަމަށް، އިލެކްޓޯރިއަލް ކޮމެޓީން ނިންމި ނިންމުމާ ދެކޮޅަށް އޭނާގެ ފަރާތުން އިސްތިއުނާފަށް ވަނީ ހުށަހަޅާފައެވެ.

އެކަމާއި ގުޅިގެން އެފްއޭއެމްއިން މިމަހު 15 ވަނަ ދުވަހު ނެރުނު ބަޔާނެއްގައި ބުނީ، އެފްއޭއެމްގައި އިންތިޚާބީ އެޕީލްސް ކޮމެޓީއެއް ނެތްކަމުން، އެ މައްސަލަ އަށް ހައްލު ހޯދުމަށް، އެފްއޭއެމްގެ ބެލެނިވެރި ފަރާތް، ދުނިޔޭގެ ފުޓުބޯޅައިގެ މައި އިދާރާ (ފީފާ) އަދި ސަރަހައްދީ ފުޓުބޯޅަ އިދާާރާ (އޭއެފްސީ)ގައި އެދިފައި ވާނެ ކަމަށެވެ.

އެ މައްސަލާގައި، މިއަދު ފީފާއިން ވަނީ 4 ފިޔަވަޅެއް އެޅުމަށް އެފްއޭއެމް އަށް އަންގާފައެވެ. އެއީ؛

1) އެފްއޭއެމްގެ އިންތިޚާބުގެ އިލެކްޓޯރަލް ޕްރޮސެސް ސައްހަ ނޫންކަމާއި، މިހާރުގެ އިލެކްޓޯރަލް ޕްރޮސެސް އެއްކޮށް ބާތިލް ކުރުން

2) އެފްއޭއެމް ގެ ކޮންގްރެސްއެއް ބާއްވައި، އިލެކްޓޯރަލް ކޮމިޓީއަށާއި އެޕީލް ކޮމިޓީއަށް  އެއް ކޮންގްރެސްގެ ތެރެއިން މެންބަރުން އިންތިޚާބު ކުރުން

3) އެ ދެ ކޮމިޓީއަށް އިންތިޚާބު ކުރާ މެންބަރުންނަކީވެސް އެފްއޭއެމްގެ އިލެކްޓޯރަލް ކޯޑާއި, އަސާސީ ގަވާއިދާއި އެއްގޮތަށް އިންތިޚާބު ކުރާ މީހުންކަން ކަށަވަރު ކުރުން

4) އެފްއޭއެމް އިންތިޚާބުގެ ކަންކަން އެންމެ ފުރަތަމަ މަރުހަލާއިން އަލުން ފަށައި އެގްޒެކްޓިވް ކޮމިޓީއަށް މެންބަރުން އައްޔަން ކުރުން

މީގެ ކުރިން އެފްއޭއެމް އިންތިހާބު ބާއްވަން އޮތީ މި މަހުގެ 31 ވަނަ ދުވަހު އެވެ.