ޓްރޭޑް މާކްބިލް ރައްޔިތުންގެ މަޖިލީހުން ފާސްކޮށްފި

ދިވެހިރާއްޖޭގެ ވިޔަފާރީގެ މާހައުލު ހަރުދަނާކޮށް އިތުބާރުއުފެއްދުމަށް ރައްޔިތުންގެ މަޖިލީހަށް ހުށަހަޅާފައިވާ ޓްރޭޑް މާކް ބިލް ރައްޔިތުންގެ މަޖިލީހުން މިއަދު ފާސްކޮށްފިއެވެ.

ސަރުކާރުގެ ފަރާތުން ރައްޔިތުންގެ މަޖިލީހަށް މި ބިލް ހުށަހަޅާފައިވަނީ މަޑުއްވަރި ދާއިރާގެ މެންބަރު އަޙްމަދު ޒާހިރުއެވެ. މަޖިލީހުގެ ތަޅުމުން މި ބިލް ފާސްކޮށްފައިވަނީ އިގްތިސާދީ ކޮމިޓީން ބިލަށް ހުށަހެޅި ބައެއް އިސްލާހްތަކާ އެކުގައެވެ.

މި ބިލުގައިވާގޮތުން ޓްރޭޑްމާކެއް ރަޖިސްޓްރީކޮށްދޭނީ 10 އަހަރުގެ މުއްދަތަކަށް ނަމަވެސް މުއްދަތު ހަމަވުމުން، އަނެއްކާވެސް މުއްދަތު އިތުރުކުރެވިދާނެއެވެ.

އެ ބިލުގައި ޓްރޭޑްމާކުގެ ވެރިފަރާތަށް ލިބިގެންވާ ހައްގުތަކަކީ ކޮބައިކަން ބަޔާންކޮށްފައިވެއެވެ. އަދި އެ ހައްގުތަކަށް އަރައިގަނެއްޖެނަމަ އެޅޭނެ ފިޔަވަޅުތައްވެސް ބިލުގައި ތަފުސީލުކޮށް ބަޔާންކޮށްދީ، ފިޔަވަޅު އެޅުމުގައި އަމަލުކުރަންޖެހޭ އުސޫލުތައް ކަނޑައަޅާފައިވެއެވެ.

އޭގެ އިތުރަށް ކައުންޓާފިޓް މުދާ ރާއްޖޭގައި އުފެއްދުމާއި ވިއްކުމާއި ރާއްޖެއިން ބޭރުކުރުން ބިލުގައި މަނާކޮށްފައިވެއެވެ. އަދި އެފަދަ މުދަލެއް އުފައްދައި، އެއިން ވިޔަފާރިކޮށް، ރާއްޖެއިން ބޭރުކުރުމުގެ އަމަލެއް ހިންގައިފިނަމަ އެ ފަރާތެއް 100،000 ރުފިޔާއާއި 2،000،000 ރުފިޔާއާ ދެމެދުގެ އަދަދަކުން ޖޫރިމަަނާކުރެވޭނެ ކަމަށް ބިލުގައި ބުނެއެވެ.

މި ބިލާ ބެހޭގޮތުން އިކޮނޮމިކް މިނިސްޓަރު މުހައްމަދު ސައީދު މީގެ ކުރިން ވިދާޅުވެފައިވަނީ، ޓްރޭޑްމާރކާއި ބެހޭ ބިލަކީ ރާއްޖޭގައި އިންވެސްޓުކުރާ ފަރާތްތަކުގެ ޝައުޤުވެރިކަން ހޯދުމަށް މުހިއްމު ބިލެއްކަމަށެވެ. މި ބިލް ޤާނޫނަކަށް ވެގެން ދިއުމުގެ ސަބަބުން ރާއްޖޭގެ ވިޔަފާރީގެ މާހައުލު ހަރުދަނާކޮށް އިތުބާރު އުފެދިގެންދާނޭކަމަށް ވަޒީރު ވިދާޅުވިއެވެ.