ހުޅުމާލެ ފެރީ ޓާމިނަލާއި ހެންވޭރު ޓާމިނަލް ބޭނުންކުރުމަށް 7 ފަރާތަކުން ޝައުގުވެރިކަން ފާޅުކޮށްފި

މާލެ އާއި އަތޮޅު ތަކާއި ދެމެދު ލޯންޗް ފެރީ އޮޕަރޭޓް ކުރާ ފަރާތްތަކުން ލަފާ ފުރުމަށްޓަކައި ހެންވޭރު ފެރީ ޓާމިނަލާއި، ހުޅުމާލެ ފެރީ ޓާރމިނަލް ބޭނުން ކުރުމަށް ހުޅުވާލުމުން ލޯންޗުތައް އޮޕަރޭޓްކުރާ ގިނަ އަދަދެއްގެ ފަރާތްތަކަކުން އެކަމަށް ޝައުގުވެރިކަން ފާޅުކޮށްފިއެވެ.

އެމްޓީސީސީން ވަނީ މިމަހުގެ 6 ވަނަ ދުވަހު، އަތޮޅުތަކުން މާލެއަށް ލޯންޗު ދަތުރުތައް ބާއްވާ ފަރާތްތަކަށް ހުޅުމާލެ ފެރީ ޓާމިނަލާއި ހެންވޭރު ޓާމިނަލް ބޭނުންކުރުމުގެ ފުރުސަތު ދިނުމަށް ތައްޔާރުވަމުންދާކަމަށް ބުނެފައެވެ. އަދި އެކަމަށް ޝައުގުވެރިވާ ފަރާތްތަކުން  އީމެއިލް މެދުވެރިކޮށް ހުށަހެޅުމަށް ވަނީ އަންގާފައެވެ.

އެމްޓީސީސީން ބުނީ ލޯންޗުތައް އޮޕަރޭޓްކުރާ 7 ފަރާތަކުން އެކަމަށް ޝައުގުވެރިކަން ފާޅުކޮށްފައިވާކަމަށެވެ. އޭގެ ތެރޭގައި އދ އަތޮޅުން ފެންފުށި، މާމިގިލި އަދި ދިއްދޫ ހިމެނެއެވެ. ކ އަތޮޅުން، މާފުށި، ގުޅި، ގާފަރު، އަދި ކާށިދޫ ހިމެނެއެވެ. ބ އަތޮޅުން ތުޅާދޫ، ހިތާދޫ، ގޮއިދޫ، ފެހެންދޫ، އަދި ފުޅަދޫ ހިމެނެއެވެ.

އެމްޓީސީސީން ބުނީ މިހާރު ޝައުގުވެރިކަން ފާޅުކޮށްފައިވާ ފަރާތްތަކާއެކު މި ހިދުމަތް ފެށުމުން ދުވާލަކަށް ޖުމްލަ 15 ފެރީއަށް ޓާމިނަލްތަކުން ހިދުމަތް ދެވޭނެ ކަމަށެވެ. އެއީ ގާތްގަނޑަކަށް 2000 ފަސެންޖަރުންނެވެ. އެމްޓީސީސީން ބުނީ ހެންވޭރު ފެރީ ޓާމިނަލުން މިހާރުވެސް އެއްފަހަރަކާ 5 ލޯންޗް އަދި ހުޅުމާލެ ފެރީޓާމިނަލުން އެއްފަހަރާ 3 ލޯންޗަށް ކައިރިކުރެވޭނޭ ކަމަށެވެ. އެގޮތަށް ކައިރިކުރާ ލޯންޗުތަކަށް ދިނުމަށް ހަމަޖެހިފައިވަނީ 30 މިނެޓެވެ.

އެމްޓީސީސީން ބުނީ ދަތުރުވެރިން ޓާމިނަލަށް އައި ފުރުމާ ދޭތެރޭ މަޑުކޮށްލުމަށް ޓާމިނަލް އެތެރެ ވަކިބައެއް ހާއްސަކުރެވިފައިވާއިރު، ދަތުރުވެރިންގެ ފަސޭހަޔަކަށް ފާހާނާ އާއި ބޯފެން ލިބޭނޭ އިންތިޒާމު ހަމަޖެހިފައި ހުންނާނޭ ކަމަށެވެ. މީގެ އިތުރުން ޓާމިނަލް ބޭނުންކުރާ ފަރާތްތައް ބޭނުންވާނޭ ގޮތަށް ހިދުމަތްތައް ތަރައްޤީކުރުމަށްވެސް އިސްކަންދޭނޭކަމަށް އެމްޓީސީސީން ބުންޏެވެ.

މާލެ އާއި އަތޮޅު ތަކާއި ދެމެދު ލޯންޗް ފެރީ އޮޕަރޭޓް ކުރާ ފަރާތްތަކުން ލަފާ ފުރުމަށްޓަކައި ހެންވޭރު ފެރީ ޓާމިނަލް އަދި ހުޅުމާލެ ފެރީ ޓާރމިނަލްގެ ބަނދަރު ބޭނުން ކުރުމަށް ހުޅުވާލުމަށް އެމްޓީސީސީން ނިންމީ، ރައީސުލްޖުމްހޫރިުއްޔާގެ އިރުޝާދުގެ ދަށުންކަމަށް އެކުންފުނިން ބުނެއެވެ.

މާލެއަކީ އެކިއެކި ބޭނުންތަކުގައި ކޮންމެ ދުވަހަކުވެސް އެތައްހާސް ބަޔަކު އައިސް ގޮސްހަދާ ތަނެކެވެ. އެކަން އެހެން އޮންނައިރު، ލަފާފުރުމުގައި އެ އޮންނަ އުނދަގޫ ކަމަކީ ލޯންޗްތަކުގެ ކައްޕިންނާއި ދަތުރުކުރާ ފަރާތްތައް އަބަދުމެ ދައްކާ ވާހަކައެކެވެ.