އަނަސްއަށް ރުހުން އޮތް ކަމަށް މަޖިލީހުުން ފާސްކޮށްފި

ރައްޔިތުންގެ މަޖިލީހުން މިއަދު ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ގެ ރައީސްގެ ގޮތުގައި ރައީސުލްޖުމްހޫރިއްޔާ ޢައްޔަންކުރެއްވި ގއ. ދެއްވަދޫ، ދޭލިޔާގެ މުޙައްމަދު އަނަސްއަށް ރުހުން ދީފިއެވެ.

މި ނިންމުން ފާސްވެފައިވަނީ ވޯޓުގައި ބައިވެރިވި 82 މެންބަރުންގެ އިއްތިފާޤުންނެވެ.

އަނަސް މި މަޤާމަށް ޢައްޔަންކުރެއްވީ މިދިޔަ މަހުގެ 13 ވަނަ ދުވަހުއެވެ. އޭނާގެ ނަން ރައްޔިތުންގެ މަޖިލީހުގެ ރުހުމަށް ހުށަހެޅުމުން، މަޖިލީހުގެ އެސްއޯއީ ކޮމިޓީން ވަނީ އަނަސްގެ ޤާބިލުކަން ވަޒަންކޮށް، 87 މާކްސް ދެއްވާފައެވެ. އަދި އޭނާއަކީ މި މަޤާމަށް އެކަށީގެންވާ ބޭފުޅެއްކަމަށްވެސް ވަނީ ނިންމާފައެވެ.

އަނަސް މި މަޤާމަށް ޢައްޔަންކުރެއްވީ ކުރީގެ ރައީސް ހަމްދީ އަގީލް ފެބްރުއަރީ 13 ގައި މަޤާމުން ވަކިކުރެއްވުމާ ގުޅިގެންނެވެ.

މުޙައްމަދު އަނަސްއަކީ ދިވެހިރާއްޖޭގެ ޤައުމީ ޔުނިވަރސިޓީން މާސްޓަރ އޮފް ބިޒްނަސް އެޑްމިނިސްޓްރޭޝަން ހާސިލުކުރައްވާފައިވާ ބޭފުޅެކެވެ. އޭނާގެ ކުރީގެ މަސައްކަތުގެ ތަޖުރިބާގެ ތެރޭގައި މާލީ ވަޒީރުގެ ނައިބުކަމާއި، ހައުސިންގ ޑިވެލޮޕްމަންޓް ކޯޕަރޭޝަންގެ އޮޑިޓް މެނޭޖަރުކަމާއި، މޯލްޑިވްސް ބިޒްނަސް ސްކޫލުގެ އެސޯސިއޭޓް ޕްރޮފެސަރުކަން ހިމެނެއެވެ.