ވީއައިއޭގެ އާ ޓާމިނަލްގެ މަސައްކަތް ނިންމުމަށް 100 މިލިއަން ޑޮލަރުގެ ލޯނެއް ސައުދީ ފަންޑުންދީފި

ވެލާނާ އިންޓަނޭޝަނަލް އެއާޕޯޓް (ވީއައިއޭ) ގެ އާ ޓާމިނަލްގެ މަސައްކަތް ނިންމުމަށް އިތުރަށް 100 މިލިއަން ޑޮލަރު (1.5 ބިލިއަން ރުފިޔާ) އަދި ރާއްޖޭގެ ސިއްހީ ދާއިރާ ތަރައްގީ ކުރުމުގެ ކަންކަމަށް ސައުދީ ފަންޑުން 50 މިލިއަން ޑޮލަރު (770 މިލިއަން ރުފިޔާ) ގެ ލޯނެއް ދީފި އެވެ.

މި ލޯނު ދިނުމުގެ އެއްބަސްވުމުގައި އިއްޔެ ދިވެހި ސަރުކާރާއި ސައުދީ ފަންޑުގެ މެދުގައިވަނީ ސޮއިކޮށްފައެވެ. ސަރުކާރުގެ ފަރާތުން އެ އެއްބަސްވުމުގައި ސޮއިކުރެއްވީ ފިނޭންސް މިނިސްޓަރު ޑރ.މުޙައްމަދު ޝަފީގެވެ. އަދި ސައުދީ ފަންޑުގެ ފަރާތުން ސޮއިކުރެއްވީ މިހާރު ރާއްޖެއަށް ޒިޔާރަތްކުރައްވަމުންދާ ސައުދީ ފަންޑުގެ އެންމެ އިސްވެރިޔާ ސުލްޠާން އަބްދުއްރަހްމާން އަލްމުރްޝަދެވެ.

ފިނޭންސް މިނިސްޓްރީން ނެރުނު ބަޔާނެއްގައި ބުނެފައިވަނީ ސައުދީން ހަމަޖައްސައިދިން 100 މިލިއަން ޑޮލަރުގެ ލޯނާއެކު ވެލާނާ އިންޓަނޭޝަނަލް އެއާޕޯޓުގެ މަޝްރޫޢުގެ ދުވެލި އަވަސްވާނެ ކަމަށެވެ. އަދި އެ މަޝްރޫޢު ނިމުމުން ރާއްޖޭގެ އިޤުތިޞާދަށް ގިނަގުނަ ފައިދާތައް ލިބޭނެކަމަަށްވެސް އެ ވުޒާރާއިން ބުންޏެވެ.

މީގެ އިތުރުން އެއާޕޯޓު މަޝްރޫޢު ނިމުމުން ރާއްޖެއަށް އަންނަ ފަތުރުވެރިންގެ އަދަދު އިތުރުވެ، އިތުރު އެއާލައިންތަކަށް ޖާގަ ލިބި ވިޔަފާރިއާއި ފަތުރުވެރިކަމާއި ދަތުރުފަތުރާ ގުޅުންހުރި ސިނާއަތްތައް އިތުރަށް ކުރިއަރާނެ މަގުތައް ފަހިވާނެކަންވެސް އެ ވުޒާރާއިން ވަނީ ފާހަގަކޮށްފައެވެ.

އެއާޕޯޓް ތަރައްގީ ކުރުމަށް މީގެ ކުރިން 2016 ވަނަ އަހަރު ވެސް ސައުދީ ފަންޑުން ވަނީ 100 މިލިއަން ޑޮލަރުގެ ލޯނެއް ދީފަ އެވެ.

ސައުދީ ފަންޑުގެ ސީއީއޯ މަރުޝަދު ވިދާޅުގޮތުގައި ސައުދީގެ އެހީގައި ވެލާނާ އިންޓަނޭޝަނަލް އެއާޕޯޓުގެ ކެޕޭސިޓީ ހަތް މިލިއަން ފަސިންޖަރުންތައް އިތުރު ކުރެވޭނެ އެވެ.

މި 100 މިލިއަން ޑޮލަރުގެ އިތުރުން، ސިއްހީ ދާއިރާގެ ތަރައްޤީއަށް ހިންގާ މަޝްރޫޢަކަށް 50 މިލިއަން އެމެރިކާ ޑޮލަރުގެ ލޯނެއް ދިނުމަށްވެސް އިއްޔެ ވަނީ އެއްބަަސްވެފައެވެ.

ވެލާނާ އިންޓަނޭޝަނަލް އެއާޕޯޓު އިތުރަށް ފުޅާކުރުމުގެ މަޝްރޫޢަކީ މި ސަރުކާރުން އެންމެ އިސްކަންދީގެން އަވަހަށް ނިންމުމަށް މަސައްކަތްކުރަމުން އަންނަ އެއް މަޝްރޫޢެވެ. މި އަހަރުގެ ތިންވަނަ ކުއާޓާ ނިމޭ ހިސާބަށް ވެލާނާ އިންޓަނޭޝަނަލް އެއާޕޯޓުގެ އައު ޓާމިނަލް ބޭނުންކުރަން ފެށުމަކީ މި ސަރުކާރުގެ އަމާޒެކެވެ.