ސީޕީ ކަޕް ހޭންޑްބޯޅަ ޓޯނަމެންޓް ފިރިހެން ޑިވިޝަން ޗެންޕިއަންކަން އެސްއޯއާރުސީ އިން ހޯދައިފި

މިހާރު ކުރިއަށްދާ "ސީޕީ ކަޕް ހޭންޑްބޯޅަ ޓޯނަމެންޓް 2025" ގެ ފިރިހެން ޑިވިޝަން ފައިނަލްގެ މެޗުގައި ސްޕެޝަަލް އޮޕަރޭޝަންސް ރެކްރިއޭޝަން ކުލަބު (އެސްއޯއާރުސީ) އާއި ސްޕެޝަަލް ކުލަބު ޕްރޮޓެކްޝަން ޑިޕާޓްމަންޓް (ކުލަބު އެސްޕީޑީ) ވާދަކުރި މެޗު 12-17 ގެ ނަތީޖާއަކުން ކާމިޔާބުކޮށް މުބާރާތުގެ ޗެންޕިއަންކަން އެސްއޯއާރުސީ އިން ހޯދައިފިއެވެ.

މުބާރާތުގެ ފައިނަލުން އެސްއޯއާރުސީ ޖާގަހޯދީ ސެމީފައިނަލްގެ ދެވަނަ މެޗުގައި 23-18 ގެ ނަތީޖާއަކުން މާލޭ ފްރޮންޓްލައިން ޕޮލިސް (އެމްއެފްޕީ) ބަލިކުރުމަށްފަހު އެވެ. އަދި ކުލަބު އެސްޕީޑީ ފައިނަލުން ޖާގަހޯދީ ސެމީފައިނަލްގެ ފުރަތަމަ މެޗުގައި 12-8 ގެ ނަތީޖާއަކުން ހުޅުމާލޭ ޕޮލިސް ބަލިކުރުމަށްފަހު އެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ ދެލަނޑުގެ ލީޑަކާއެކު 6-8 ގެ ނަތީޖާއަކުން އެސްއޯއާރުސީ ކުރީގައި އޮވެގެންނެވެ. އަދި ދެވަނަ ހާފުގައި އެޓީމުން އިތުރު ނުވަ ލަނޑު ކާމިޔާބުކުރިއިރު، މިހާފުގައި ކުލަބު އެސްޕީޑީއަށް ކާމިޔާބުކުރެވުނީ ހަ ލަނޑެވެ.

އެގޮތުން މިމެޗުގައި އެސްއޯއާރުސީގެ އަހުމަދު އަބްދުއް ސައްތާރު ހަ ލަނޑު ކާމިޔާބުކުރިއިރު، އެޓީމުގެ އަލީ ނަޖާހު، ޝާމިލް މުހައްމަދު އަދި ހުޒެއިމަތު އަދުނާން މިއިން ކޮންމެ ކުޅުންތެރިއަކު ވަނީ ތިން ލަނޑު ކާމިޔާބުކޮށްފައެވެ. އަދި އެޓީމުގެ އަނެއް ދެ ލަނޑު ކާމިޔާބުކޮށްދިނީ ހުސެއިން އަޒްހަމް އެވެ.

މީގެ އިތުރުން މިމެޗުގައި ކުލަބު އެސްޕީޑީގެ މުހައްމަދު އަސްލަމް އަދި އިސްމާއިލް އަހުމަދު މިއިން ކޮންމެ ކުޅުންތެރިއަކު ފަސް ލަނޑު ކާމިޔާބުކުރިއިރު، އެޓީމުގެ މުހައްމަދު ހައިދަރު އަދި އަހުމަދު އަހުތަމް މިއިނަ ކޮންމެ ކުޅުންތެރިއަކު ވަނީ މިމެޗުގައި އެއްލަނޑު ކާމިޔާބުކޮށްފައެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ އެސްއޯއާރުސީގެ އަހުމަދު އަބްދުއް ސައްތާރު އެވެ.

2 ފެބުރުއަރީ 2025 އިން 13 ފެބުރުއަރީ 2025 ގެ ނިޔަލަށް ކުރިއަށް ގެންދި މިމުބާރާތުގެ ފިރިހެން ޑިވިޝަނުގައި މިއަހަރު ޖުމްލަ 10 ޓީމަކުން ވާދަކޮށްފައިވާއިރު، މި ޑިވިޝަންގެ މެޗުތައް ކުރިއަށް ގެންގޮސްފައި ވަނީ ބައިވެރިވި 12 ޓީމު ދެ ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން އެންމެ ރަނގަޅު ނަތީޖާއެއް ހޯދާ ދެޓީމަށް މުބާރާތުގެ ސެމީ ފައިނަލުން ވަނީ ފުރުސަތު ލިބިފައެވެ.