ޓީސީއަތުން މޮޅުވެ، އީގަލްސް ޕޮއިންޓް ޓޭބަލްގެ އެއްވަނާގައި ހަމަޖެހިލައިފި

މިހާރު ކުރިއަށްދާ ދިރާގް ދިވެހި ޕްރިމިއާލީގްގައި ރޭ ޓީސީ ސްޕޯޓްސް އާއި އީގަލްސް ސްޕޯޓްސް ކްލަބް ބައްދަލުކުރިމެޗް އީގަލްސް ކާމިޔާބުކޮށް ޕޮއިންޓް ތާވަލްގެ އެންމެ ކުރީގައި ހަމަޖެހިލައިފިއެވެ.

ގަލޮޅު ދަނޑުގައި ކުޅުނު މިމެޗް ޓީސީގެ މައްޗަށް އެޓީމް ކުރިހޯދީ 3-0 ގެ ނަތީޖާއިންނެވެ. އީގަލްސްގެ ފަރާތުން މޮޅު ކުޅުމެއް ފެނިގެންދިޔަ މިމެޗްގައި ގިނަ ހަމަލާތައް އުފައްދަފައިވަނީވެސް އެޓީމުންނެވެ. މެޗްގައި އީގަލްސްއަށް ގޯލް ހުޅުވާލަދިނީ ފުރަތަމަ ހާފް ނިމެންއުޅެނިކޮށް ވެން ޑޭވް އެވެ. ފުރަތަމަ ހާފްގެ ކުޅުން ނިމުނީ 1-0 ގެ ނަތީޖާއިން އީގަލްސް ކުރީގައި އޮވެގެންނެވެ.

މެޗްގައި އީގަލްސްގެ ދެވަނަ ލަނޑު ޖަހާފައިވަނީ 80 ވަނަ މިނެޓް ތެރޭގައި މާކޯ އިވަނޮވިޗެވެ. އީގަލްސްގެ ތިންވަނަ ގޯލް ކާމިޔާބުކޮށްދިނީ ފުރަތަމަ ގޯލްވެސް ޖަހައިދިން ވެން ޑޭވްއެވެ. މިމެޗްގެ މޮޅު ކުޅުންތެރިޔާގެ މަގާމުވެސް ހޯދީ ވެން ދޭވް އެވެ.

އީގަލްސް ވަނީ މިފަހަރުގެ ލީގްގައި ކުޅުނު ހުރިހާ މެޗްތަކުންވެސް މޮޅުވެފައެވެ. އެގޮތުން ފުރަތަމަ މެޗްގައި ބިސްބުރުއަތުން 3-1 ގެ ނަތީޖާއިން މޮޅުވިއިރު، ގައްދޫ އާ ދެކޮޅަށް ކުޅުނު މެޗުން މޮޅުވީ 0-2 ގެ ނަތީޖާއިންނެވެ.

ރޭގެ މެޗުން ލިބުނު މޮޅާއެކު ޕްރިމިއާލީގް ތާވަލްގެ އެއްވަނާގައި އީގަލް އޮތީ 9 ޕޮއިންޓް ހޯދައިގެންނެވެ. ދެވަނާގައި އޮތީ ނިއުރޭޑިއަންޓާއި ވިކްޓްރީއެވެ.