ބޯންމެރޯ ޓްރާންސްޕްލާންޓް ހެދުމަށް ދެ ކުއްޖަކު ފުރައިފި

ހަފްތާ 14 ގެ ދަށުން ސަރުކާރުގެ އެހީގައި ބޯންމެރޯ ޓްރާންޕްލާންޓް ހެދުމަށް ފުރުމަށް ހަމަޖެހިފައިވާ ފަރާތްތަކުގެ ތެރެއިން ދެ ކުއްޖަކު މިއަދު ޓްރާންޕްލާންޓް ހެދުމަށް ފުރައިފިއެވެ.

ބޯންމެރޯ ޓްރާންސްޕްލާންޓަށް ފުރަތަމަ ކުއްޖާ ރާއްޖެއިން ބޭރަށް ފުރީ މިދިޔަ އަހަރުގެ ޑިސެންބަރ މަހުގެ 14 ވަނަ ދުވަހުއެވެ.

މި ފަރުވާ އަށް އިތުރު ކުދިން އަންނަ ހަފްތާގައި ރާއްޖެއިން ބޭރަށް ފޮނުވުމަށްޓަކައި މިހާރު ތައްޔާރުވަމުން ދާ ކަމަށް ހެލްތު މިނިސްޓްރީން މައުލޫމާތުދެއެވެ.

ތެލެސީމިއާ ކުދިންނަށް ބޭނުންވާ ބޭހާއި ކޮންސިއުމަބަލް ލިބޭނެ އިންތިޒާމް ހަމަޖައްސައިދިނުމަށްޓަކައި އެސްޓީއޯ އާ އެކު އެއްބަސްވުމެއް ހެދައި ރަށުގައި ތިބެގެން ވެސް ބޭސް ލިބޭނެ އިންތިޒާމް ހަމަޖައްސައިދީފައިވާ ކަމަށް މިނިސްޓްރީން މައުލޫމާތުދެއެވެ. އަދި ލޭ ބޭނުންވާ ފަރާތްތަކަށް ލޭ ހޯދުމަށް އިތުރު ކޭމްޕް ތައް ވެސް ހަފްތާ 14 ގެ ދަށުން ހިންގުމަށް އެ މިނިސްޓްރީން ވަނީ ރާވާފައެވެ.

މީގެ އިތުރުން ޕްރައިވެޓް ހެލްތު ކެއާގެ ދަށުން ތެލަސީމިޔާ ކުދިން ހަދަމުން އަންނަ ޓެސްޓެއް ކަމުގައިވާ "ޓީ 2 ސްޓާރ ޓެސްޓް" ގެ ޚިދުމަތް ހުޅުމާލެ ހޮސްޕިޓަލުން ލިބޭނެ ގޮތް ހެދުމަށްޓަކައި ބޭނުންވާ ފައިސާ ހުށައަޅައި މި އަހަރުގެ ފެބްރުއަރީ މަހުގެ ތެރޭގައި ޚިދުމަތް ފޯރުކޮށްދެވޭ ކަމަށް ވެސް ހެލްތު މިނިސްޓްރީން މައުލޫމާތު ދެއެވެ.

ދައުލަތުގެ ހަރަދުގައި ބޯންމެރޯ ހެދުމަށް ކުދިން ފޮނުވުމުގެ އިތުރުން  ތެލަސީމިއާ އާއި ގުޅުން ހުރި ހުރިހާ ކަމަށް ފަރުވާ ކުރެވޭނެ އެކަމަށް ޚާއްސަ ހޮސްޕިޓަލެއް ރާއްޖޭގައި ގާއިމް ކުރެއްވުމަށް ރައީސް ޑރ.މުހައްމަދު މުއިއްޒު ނިންމެވީ ޑިސެންބަރު 10 ވަނަ ދުވަހު  އޮތް ވަޒީރުންގެ ބައްދަލުވުމުގައެވެ.