ސުލްހައިގެ ވާހަކަތަކަށް ދިއުމުގެ ކުރިން ކުރިއަށްއޮތީ ނާޒުކު ވަގުތުކޮޅެއް: އީރާން

އީރާނާއި އެމެރިކާ އާ ދެެމދު ފެށުމަށް ހަމަޖެހިފައިވާ ސުލްހައިގެ ވާހަކަތައް ފެށުމުގެ ވަގުތު ކުޑަތަންވެފައިވާއިރު، ކުރިއަށްއޮތީ ނާޒުކު ވަގުތުކޮޅެއްކަމަށް އީރާނުން ބުނެފިއެވެ.

އެމެރިކާ އާއި އީލާނާދެމެދު ހަމަލާ ބަދަލުކުރުންތައް ވަގުތީގޮތުން މެދުކަނޑާލުމަށްފަހު މިހާރު ދެ ޤައުމުން ތައްޔާރުވަމުން ދަނީ ޕާކިސްތާނުގެ އިސްލާމްއާބާދުގައި ސުލްހައިގެ ވާހަކަތައް ފެށުމަށް ތައްޔާރުވަމުންނެވެ. އީރާނުގެ ފާރްސް ނިއުސް އޭޖެންސީން ބުނެފައިވަނީ އެމެރިކާ އާއެކު ބާއްވާ ވާހަކަތަކުގައި ބައިވެރިވުމަށް އީރާނުގެ ވަފުދެއް ދިއުމަށް ހަމަޖެހިފައިވާކަމަށެވެ.

ނަމަވެސް އެއްބަސްވުމުގެ މަޝްވަރާތަކަށް ދިއުމުގެ ކުރިން އީރާނުންވަނީ ޝަރުތުތަކެއް ކުރިމަތިކޮށްފައެވެ. އެގޮތުން އެންމެ މުހިންމު ކަމަކަށް ފާހަގަކޮށްފައިވަނީ އިސްރާއީލުން ލުބުނާނަށް ދެމުންދާ ހަމަލާތައް އެމެރިކާއިން ހުއްޓުވުމަށް ކޮށްފައި އޮތް ޝަރުތެވެ. އީރާނުގެ ހާރިޖިއްޔާގެ ނައިބު ސައީދު ޚާތިބްޒާދާ ވިދާޅުވެފައިވަނީ، ސަރަހައްދީ ގޮތުން ގާއިމުކުރެވޭ ކޮންމެ ސުލްހައެއްގައި ލުބުނާން ހިމެނެންވާނެ ކަމަށާއި، "ކުރިއަށް އޮތް ގަޑިއިރުތަކަކީ ވަރަށް ނާޒުކު ވަގުތުކޮޅެއް" ކަމަށެވެ.

އިސްލާމްއާބާދުގައި މަޝްވަރާތައް ފެށި، އެއްބަސްވުމުގެ ތަފްސީލީ ކަންކަން ނިމުމުގެ ކުރިން، ހަމަލާބަދަލުކުރުން ހުއްޓާލުމުގެ އެއްބަސްވުން ރޫޅިދާނެތީ އެމެރިކާއިން ވަނީ ކަންބޮޑުވުން ފާޅުކޮށްފައެވެ. މި ކަންބޮޑުވުން އުފެދުނީ، ހަމަލާބަދަލުކުރުން ހުއްޓާލުމުގެ އެއްބަސްވުމުގައި ލުބުނާންވެސް ހިމެނޭ ކަމަށް އީރާނުން ބުނުމުންނެވެ.

އިސްރާއީލްގެ އަމަލުތަކާހެދި އެއްބަސްވުމަކާ ހަމަޔަށް ނައިސް ހަމަލާތައް ފެށިދާނެތީ އެމެރިކާއިން ކަންބޮޑުވުން ފާޅުކޮށްފައިވާއިރު، މި އެއްބަސްވުމަކީ މާބޮޑު ސީރިއަސްކަން އޮތް އެއްބަސްވުމެއްކަމަށް އީރާނުން ޤަބޫލުނުކުރާކަމަށް ދިރާސާކުރާ ފަރާތްތަކުން ބުނެއެވެ. ސަބަބަކީ އިސްވެދިޔަ ތަނުގެ ތަޖުރިބާއަށް ބަލައި އެމެރިކާ އަދި އިސްރާއީލާއެކު އެއްބަސްވުމެއް ހަދައިގެން އެއަށް އެޤައުމުތަކުން އިހުތިރާމް ކުރާނޭކަމަށް އީރާނުން ޤަބޫލުނުކުރުމެވެ.

އެމެރިކާ އާއި އީރާނާ ދެމެދު ފެށުމަށް ހަމަޖެހިފައިވާ ސުލްހައިގެ ވާހަކަތައް އިސްލާމްއާބާދުގައި ފެށުމަށް ހަމަޖެހިފައިވަނީ މާދަމާއެވެ.