ގއ.ވިލިނގިލިން ބަންޑާރަގޯތި ދޫކުރުމަށް ހުޅުވާލައިފި

ގއ.އަތޮޅުގެ ވެރިކަންކުރާ ރަށް، ވިލިނގިލިން ދިރިއުޅުމަށް ބަންޑާރަ ގޯތި ދޫކުރުމަށް އެރަށު ކައުންސިލުން ހުޅުވާލައިފިއެވެ.

މިކަމާ ގުޅޭގޮތުން ގއ.ވިލިނގިލީ ކައުންސިލުން ބުނެފައިވަނީ، އެ ކައުންސިލްގެ 4 ވަނަ ދައުރުގެ 2024 ވަނަ އަހަރުގެ 34 ވަނަ ބައްދަލުވުމުން ފާސްކުރިގޮތަށް ދިރިއުޅުމަށް ބަންޑާރަގޯތި ދޫކުރުމަށް ހުޅުވާލާފައިވާކަމަށެވެ.

ބަންޑާރަ ގޯތި ދޫކުރުމާއި ބެހޭ އުޞޫލަށް ބަލާއިރު، ގއ. ވިލިނގިލީގައި ދިރިއުޅުމަށްޓަކައި ވިލނގިލީގެ ރައްޔިތުންނަށް މިފަހަރު، 115 ގޯތި އަދި ގއ. ވިލިނގިލީ ފިޔަވައި ރާއްޖޭގެ އެހެން ރަށެއްގައި ރަށްވެހިވެފައިވާ، ގއ. ވިލިނގިއްޔަށް ރަށްވެހިކަން ބަދަލުވުމަށް އެދޭ ފަރާތްތަކަށް 25 ގޯތި ދޫކުރުމަށް ވަނީ ހަމަޖެހިފައެވެ. ކައުންސިލުން ބުނީ، ދޫކުރުމަށް ހަމަޖެހިފައިވާ ގޯއްޗެއްގެ ބޮޑުމިނަކީ 2000 އަކަފޫޓާއި 3000 އަކަފޫޓާއި ދެމެދެވެ.

ގޯތި ދޫކުރުމުގެ އުސޫލްތަކަށް ބަލާއިރު، ވިލިނގިލިން 600 އަކަފޫޓު ހަމަނުވާވަރުގެ ބިންކޮޅެއް އޮވެއްޖެނަމަ ގެވަޅު ލިބުމުން އެމީހަކު އެބިންކޮޅު ދޫކޮށްލަން ޖެހެއެވެ. އަދި 600 އަކަފޫޓުގެ ގޯއްޗެއް ވިއްކިނަމަ، ގެވަޅު ލިބޭނީ އެ ގޯތި ވިއްކިތާ 5 އަހަރުވެފައިވާނަމައެވެ.

ވިލިނގިލީ ކައުންސިލުން ބުނީ ގޯއްޗަށް އެދުމަށް ހުޅުވާލާފައިވަނީ މިހިނގާ ޖެނުއަރީމަހުގެ 30 ވާ ބުރާސްފަތި ދުވަހުގެ މެންދުރު 13:00 ނިޔަލަށެވެ.