ތިނަދޫ ސިޓީ އުފަންވެގެން އައީ 'ޕްރީ މެޗުއަރ ބޭބީ' އެއްގެ ގޮތުގައި: އާދަމް ޝަރީފް

ކުރީގެ ރައީސް އިބްރާހިމް މުހައްމަދު ޞާލިހު ގެ ސަރުކާރުން ހުވަދު އަތޮޅު ތިނަދޫ، ސިޓީ އެއްގެ ގޮތަށް ބަދަލު ކުރައްވާފައިވަނީ، "ދުވަސް ނުފުރާ ވިހާފައިވާ ތުއްތު ކުއްޖެއްގެ ގޮތުގައި ނުވަތަ ޕްރީ މެޗުއަރ ބޭބީއެއްގެ" ގޮތުގައި ކަމަށް ސިޓީ ތަކާއި އިދާރީ ދާއިރާތައް ހިންގުމާއި އާއްމު މަސައްކަތްތަކާ ބެހޭ ވުޒާރާގެ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ.

ރިޔާސީ އިންތިޚާބުގެ ކެންޕެއިންގެ ތެރެއިން، އަދުގެ ރައީސުލްޖުމްހޫރިއްޔާ ޑރ މުހައްމަދު މުޢިއްޒު ތިނަދޫއަށް ކުރެއްވި ދަތުރުފުޅުގެ ތެރެއިން އެމަނިކުފާނު ވަނީ ގާނޫނަށް ގެންނަންޖެހޭ ބަދަލުތައް ގެނެސްގެން ތިނަދޫއަށް ސިޓީއެއްގެ ދަރަޖަ ދެއްވާނެ ކަމަށް ވިދާޅުވެފައެވެ.

އެފަދައިން އެމަނިކުފާނު ވިދާޅުވެފައި ވަނިކޮށް، އިންތިޚާބުގެ ތެރޭގައި، އޭރުގެ ރައީސް ޞާލިހު ވަނީ، ގާނޫނުގައި އޮންނަ ގޮތާއި ޚިލާފަށް ތިނަދޫއަށް ސިޓީއެއްގެ ދަރަޖަ ދެއްވާފައެވެ. އެކަމުގެ ސަބަބުން، ތިނަދޫއަށް ސިޓީއެއްގެ ދަރަޖަ ލިބުނު ނަމަވެސް، ބައެއް ކަންކަން ފުރިހަމަ ކުރުމުގައި އެ ސިޓީއަށް ގޮންޖެހުންތަކާއި ވަނީ ކުރިމަތިލާން ޖެހިފައެވެ.

އެކަމަށް އިޝާރަތްކުރައްވައި، ރޭ ރައީސުލްޖުމްހޫރިއްޔާ ޑރ މުހައްމަދު މުޢިއްޒު ތިނަދޫ ރައްޔިތުންނާއި ބައްދަލު ކުރެއްވުމަށް ބޭއްވި ޖަލްސާގައި ވާހަކަ ދައްކަވަމުން، ޝަރީފް ވިދާޅުވީ، ރައީސުލްޖުމުހޫރިއްޔާ ޑރ މުހައްމަދު މުޢިއްޒު މަސައްކަތް ކުރެއްވީ އޮންނަ އުސޫލުގެ ތެރެއިން ތިނަދޫއަށް ސިޓީއެއްގެ ދަރަޖަ ދެއްވަން ކަމަށެވެ.

ނަމަވެސް ކުރީ ސަރުކާރުން އެކަން, "ނުބައި ކޮޅަކުން ޖަހާފައި އުފަން ކުރުވުމުން" އުދަނގޫ ތަކަކާއި ކުރިމަތިލާން ޖެހިފައިވާ ކަމަށެވެ.

ތިނަދޫ ސިޓީ އުފަންވެގެން އައީ ޕްރީ މެޗުއަރ ބޭބީއެއްގެ ގޮތުގައި. އެކަމަކު ދަންނަވަންތޯ؟ އެކަން، އެ ސިޓީއެއްގެ ތަސައްވުރު އެންމެ ފުރަތަަމަ އަޅުގަނޑުމެންނާއި ހަމައަށް ގެނެސްދެއްވީ އަޅުގަނޑުމެންގެ މިއަދުގެ ރައީސުލްޖުމްހޫރިއްޔާ ޖުމްހޫރިއްޔާ. ރައީސުލްޖުމްހޫރިއްޔާގެ އެ ތަސައްވުރާއި އެކުގައި، ރައީސުލްޖުމުހޫރިއްޔާ ބޭނުންފުޅު ގޮތަކަށް އެކަން ކުރައްވަން އުޅެނިކޮށް، ނުބައި ކޮޅަކުން ޖަހާފައި މި ސިޓީ އުފަން ކުރުވީ. އެހެންވީމާ ކުޑަކޮށް އުނދަގޫ ވެގެން މިއުޅުނީ.

އާދަމް ޝަރީފް ޢުމަރު

ޝަރީފް އިތުރަށް ވިދާޅުވީ، ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ޒަޢާމަތުގައި،  ރާއްޖެ ފަޚުރުވެރިވާފަދަ ތަރައްގީއެއް ތިނަދޫ ސިޓީން ފެނިގެންދާނެ ކަމުގެ ޔަގީންކަން އޮތް ކަމަށެވެ . އަދި ހަގީގީ މާނައިގައި ތިނަދޫ ސިޓީއަކަށް ހައްދަވާނީ ރައީސް މުޢިއްޒު ކަމަށްވެސް ޝަރީފު ވިދާޅުވި އެވެ.