ކަސްޓަމްސްގެ ވަޒީފާއަށް މީހުން ހޯދަނީ. ކޮއްތު ފައިސާވެސް ލިބޭނެ

މޯލްޑިވްސް ކަސްޓަމްސް ސާވިސްގެ ވަޒީފާއަށް ގިނަ އަދަދެއްގެ މީހުން ހޯދުމަށް މިއަދު އިއުލާނުކޮށްފިއެވެ.

ކަސްޓަމްސްއިްނ މީހުން ހޯދަނީ އެސިސްޓެންޓް ކަސްޓަމްސް އޮފިސަރ އޮފިސަރުގެ މަޤާމަށެވެ. މާލޭ އޭރިއާގައި ކަސްޓަމްސްއިން ގާއިމްކޮށްފައިވާ އޮފީސްތަކަށް 164 މީހުން ބޭނުންވާކަމަށް އެ އިދާރާއިން ވަނީ ބުނެފައެވެ.

ސަރުކާރުގެ ގެޒެޓްގައި އާއްމުކޮށްފައިވާ އިއުލާނުގައިވާގޮތުން މި މަގާމަށް ކަނޑައެޅިފައިވާ މަސައްކަތުގެ މުސާރައަކީ 5،000 ރުފިޔާއެވެ. މުސާރައިގެ އިތުރުން ނޮން-ޕްރެކްޓިސިންގ އެލަވަންސް: އަސާސީ މުސާރައިގެ %35 އަށްވާ 1,750 ރުފިޔާ ކަނޑައެޅިފައިވާއިރު،  ސަރވިސް އެލަވަންސް: އޮފީހަށް ހާޒިރުވާ ކޮންމެ ދުވަހަކަށް 200 ރުފިޔާ އާއި ކަސްޓަމްސްގެ ޤާނޫނާއި ގަވާއިދާއި އެއްގޮތްވާގޮތުގެ މަތިން އިތުރުގަޑީގެ ފައިސާއާއި ބަންދު ފައިސާއާއި އެހެނިހެން އިނާޔަތްތައްވެސް ލިބޭނޭކަމަށް ކަސްޓަމްސްއިްނ ބުނެއެވެ. މީގެ އިތުރުން ކޮއްތު ފައިސާގެ ގޮތުގައި ދުވާލެއްގެ މައްޗަށް 60 ރުފިޔާ ދިނުމަށްވެސް ވަނީ ކަނޑައެޅިފައެވެ.

ވަޒީފާގެ ޝަރުތުތަކަށް ބަލާއިރު ޖީ.ސީ.އީ އޯ ލެވެލް ނުވަތަ އެ ފެންވަރުގެ އިމްތިޙާނެއްގައި 2 (ދޭއް) މާއްދާއިން ދަށްވެގެން [ޑީ] ފާސް ލިބިފައިވުމާއިއެކު، ސެކަންޑަރީ ސްކޫލް ސެޓްފިކެޓް އިމްތިޙާނުގައި [ދިވެހި] މާއްދާއިން ދަށްވެގެން [ސީ] ފާސް ލިބިފައިބުން ލާޒިމެވެ. އަދި ކަސްޓަމްސްއިން ކަނޑައަޅާ ބޭސިކް ފިޒިކަލް ފިޓްނެސް ޓެސްޓުން ފާސްވުން ހިމެނެއެވެ.

ކަސްޓަމްސްއިން ބުނީ ވަޒީފާއަށް ޝައުގުވެރިވާ ފަރާތްތަކުން މެއިމަހުގެ 31 ވަނަ ދުވަހުގެ 14:00 ގެ ކުރިން އެ އިދާރާގެ ސަރވިސްގެ ވެބްސައިޓްގައިވާ "ރެކްރޫޓްމެންޓް ޕޯޓަލް" މެދުވެރިކޮށް ހުށަހަޅަން ޖެހޭނެ ކަމަށެވެ.