ކޭޕާކް ޚިޔާނާތް: ޖައިޝާންގެ މައްޗަށް ވެސް 89 ދައުވާ ސާބިތުވެއްޖެ

މއ.އެރަލްސީ، ޙަސަން މަމްދޫހް (މަންޑޭ) އާއި އިތުރު ބަޔަކު ބައިވެރިވެގެން ހަންބޯ ކޮމްޕެނީ ޕްރައިވެޓް ލިމިޓެޑުގެ މެޖޯރިޓީ ހިއްސާދާރުކަމުގައިވާ ޗައިނާ، ޖިން ޝިހޫ، ގެ ސޮއި ފޯޖުކޮށްގެން ލިޔެކިޔުންތަކެއް ހަދައިގެން ބޭންކް އޮފް މޯލްޑިވްސްގައި އެ ކުންފުނީގެ ނަމުގައި ބޭންކް އެކައުންޓް ހުޅުވައި ހަންބޯގެ ފަރާތުން ކޭ-ޕާކް ރެސިޑެންސްގެ ނަމުގައި ހުޅުމާލޭގައި އިމާރާކުރަމުންދާ އިމާރާތުގެ އެޕާޓްމަންޓްތައް އޮޅުވާލާއިގެން މަކަރާއި ޙީލަތުން ޢާއްމު ފަރާތްތަކަށް ވިއްކައި ބައެއް އެޕާޓްމަންޓްތައް އެއް ފަރާތަށް ވުރެ ގިނަ ފަރާތަށް ވުރެ ގިނަ ފަރާތަށް ވިއްކައި އެފައިސާއަށް ޚިޔާނާތްތެރިވެ އެފައިސާ ލޯންޑާކޮށްފައިވާ ކަމަށް ތުޙުމަތުކުރެވޭ މައްސަލާގައި ދައުވާ އުފުލާފައިވާ ކަމަށް ޖައިޝާން ސަޢީދުގެ މައްޗަށް ވެސް ދައުވާތައް ސާބިތުވާ ކަމަށް ކަނޑައަޅައިފި އެވެ.

ޖައިޝާން ސަޢީދުގެ މައްޗަށްގެ ދައުލަތުން ވަނީ 89 ދައުވާއެއް އުފުލާފަ އެވެ. އެއީ ޓެކުމުގައި ބައިވެރިވުމުގެ 45 ދައުވާ އަކާއި  އޮޅުވާލުމުގެ ޢަމަލެއް ކުރުމުގެ 40 ދައުވާ އަކާއި މީހަކަށް ކަމެއް އޮޅުވާލުމުގެ ނިޔަތުގައި އެނގިހުރެ ޞައްޙަނޫން ލިޔުމެއް ދިނުމުގައި ތިން ދައުވާ އަކާއި  މަނީ ލޯންޑަރކުރުމަށް އެހީތެރިވުމުގެ ދައުވާ އެކެވެ.

މި ހުރިހާ ދައުވާއެއް އޭނާގެ މައްޗަށް ސާބިތުވާ ކަމަށް ވަނީ ކަނޑައަޅާފަ އެވެ.

ޖައިޝާން އަކީ މަމްދޫހްގެ ވިޔަފާރީގައި އޭނާގެ އެންމެ ގާތް އެކަކެވެ. އޭނާގެ ޕާސަނަލް އެސިސްޓެންޓަކީ އެއީ އެވެ. ސެކްރެޓަރީގެ ދައުރުވެސް އަދާކުރީ އޭނާ އެވެ. އަދި މަމްދޫހްގެ ވިޔަފާރީގެ ލިޔެކިޔުންތަކާއި އެކައުންޓް ތައް ބެލެހެއްޓީވެސް އޭނާ އެވެ.

މި ދައުވާތައް ސާބިތުވާކަމަށް ކަނޑައެޅުމާ ގުޅިގެން އަދަބު ކަނޑައެޅެންދެން ޖައިޝާން ވަނީ ބަންދުކޮށްފަ އެވެ.