އިންޑިއާއަށް ފުރި މޯލްޑިވިއަންގެ ބޯޓެއް އަނބުރައި ވީއައިއޭއަށް

ޓެކްނިކަލް މައްސަލައެއް ދިމާވެ އިންޑިއާއަށް ފުރި މޯލްޑިވިއަންގެ ބޯޓެއް އަނބުރައި ވެލާނާ އިންޓަނޭޝަނަލް އެއަރޕޯޓް (ވީއައިއޭ) އަށް ޖައްސައިފިއެވެ.

މޯލްޑިވިއަންއިން ހާމަ ކުރި ގޮތުގައި، ޓެކްނިކަލް މައްސަލައެއް ދިމާވެގެން އަނބުރައި، އަލުން ވެލާނާ އިންޓަނޭޝަނަލް އެއަރޕޯޓަށް ޖައްސާފައިވަނީ، ފްލައިޓް Q2700އެވެ.

މި ފްލައިޓަކީ ވެލާނާ އިންޓަނޭޝަނަލް އެއާޕޯޓުން އިންޑިއާގެ ޓްރުވެންޑްރަމަށް ފުރި، ބޯޓެކެވެ. މޯލްޑިވިއަން އިން ބުނި ގޮތުގައި، އެ ފްލައިޓު އަނބުރައި ވީއައިއޭއަށް ޖެއްސީ ޓްރިވެންޑްރަމަށް ފުރިތާ ކުޑައިރުކޮޅެއް ފަހުންނެވެ.

ޓެކްނިކަލް މައްސަލައަކާހުރެ ފްލައިޓް ގްރައުންޑް ކުރަން ޖެހުމާ އެކު، އޭގައި ތިބި ފަސިންޖަރުން ވަނީ ފޮނުވާލާފައެވެ. އަދި މިއަދުގެ އެ ފްލައިޓް ކެންސަލް ކުރެވިފައިވާ ކަމަށް އަންގާ، މޯލްޑިވިއަން އިން ވަނީ، މި ކަމުގެ ސަބަބުން ފަސިންޖަރުންނަށް ދިމާވި ދަތިތަކަށް މަޢާފަށް އެދިފައެވެ.

މޯލްޑިވިއަން އިން އިތުރަށް ބުނެފައިވަނީ، ފްލައިޓަށް ދިމާވި މައްސަލަ ޙައްލުކުރުމަށް، މަސައްކަތް ކުރަމުންދާ ކަމަށެވެ. އެހެން ނަމަވެސް ދިމާވި މައްސަލަ އަދި ދެނެގަނެވިފައިނުވާ ކަމަށާއި، މައްސަލަ ދެނެގަނެވުމާއެކު އިތުރު ތަފްސީލު ހާމަކުރާނެ ކަމަށް ވެސް މޯލްޑިވިއަން އިން ވަނީ ބުނެފައެވެ.