ވިއްސާރައާއި ގުޅިގެން މިހާތަނަށް 226 މީހުންނަށް ވަގުތީ ބޯހިޔާވަހިކަން ފޯރުކޮށްދީފި

އިއްޔެ ރާއްޖެއަށް ކުރި ވިއްސާރައާއި ގުޅިގެން މިހާތަނަށް މާލެއިން 226 މީހުންނަށް ވަގުތީ ބޯހިޔާވަހިކަން ފޯރުކޮށްދީފައިވާކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.

އިއްޔެ ކުރި ވިއްސާރަ އާއި ގުޅިގެން އެންޑީއެމްއޭއިން ހާމަކުރި އަދާހަމައިގައިވާގޮތުން މާލޭގައި ފެންބޮޑުވެގެން އެކި އެކި އެހީތަކަށް އެދި 774 ތަނަކުން ރިޕޯޓްކޮށްފައިވާއިރު، މީގެ ތެރެއިން 554 ރިކުއެސްޓަކީ ވެލިބަސްތާ ޖެހުމެވެ.

އެންޑީއެމްއޭއިން ބުނީ، މާލެއިން ޒަރޫރީ ބޭނުންތަކަށް ހުރަސް އެޅިގެން ރިޕޯޓްކުރެވުނު 53 ގެއެއްގެ ރެޕިޑް އެސެސްމަންޓް، އެ އޮތޯރިޓީއާއި ދިވެހި ރެޑްކެރެސެންޓާއި ފުލުހުން ކުރިއަށް ގެންގޮސްފައިވާކަމަށެވެ. އަދި މީގެ ތެރެއިން އާއްމު ދިރިއުޅުމަށް ހުރަސްއެޅޭ ހާލަތުގައިވާ 36 ގޭބީސީގެ 226 މީހުންނަށް ވަގުތީ ބޯހިޔާވަހިކަމާއި ކެއިން ބުއިން ފޯރުކޮށްދީފައިވާކަމަށް އެ އޮތޯރިޓީން މައުލޫމާތުދެއެވެ.

މާލޭގައި ފެންބޮޑުވެގެން ވެލިބަސްތާ ޖެހުމުގެ މަސައްކަތުގައި މާލޭ ސިޓީ ކައުންސިލް، ފުލުހުން، ސިފައިން، މިނިސްޓްރީ އޮފް ސިޓީސް ލޯކަލް ގަވަމެންޓް އެންޑް ޕަބްލިކް ވޯކްސް އާއި ސްކައުޓުން ހަރަކާތްތެރިވެފައިވާކަން ފާހަގަކޮށް އެންޑީއެމްއޭއިން ބުނީ، ފެން ހިއްކުމުގެ މަސައްކަތުގައި ސިފައިންގެ އިތުރުން އަމިއްލަ ފަރާތްތަކުންނާއި އާއްމު ފަރުދުން މަސައްކަތްކޮށްފައިވާކަމަށެވެ.

މިއާއިއެކު، އެންޑީއެމްއޭއިން ބުނީ، މިއަދު މޫސުން ގޯސްވެ ރ.އިނގުރައިދޫއަށާއި، ށ.މަރޮއްޓަށް އުދަ އަރައިގެން އެކިވަރުގެ ގެއްލުންތައް ލިބިފައިވާކަމަށެވެ. މީގެ އިތުރުންވެސް، ބޯކޮށް ވާރޭވެހި، ގެއްލުން ލިބިގެން ރިޕޯޓްކޮށްފައިވާ ރަށްރަށަކީ:

1) ފ.ނިލަންދޫ - ރަށުގެ 80 އިންސައްތައިގައި ފެންބޮޑުވެފައިވޭ

2) ދ.ކުޑަހުވަދޫ - 10 ވަރަކަށް ގެއަށް ގެއްލުން ލިބިފައިވޭ

3) ދ.މީދޫ - 10 ވަރަކަށް ގެއަށް ގެއްލުން ލިބިފައިވޭ

4) ފ.މަގޫދޫ - 9 ގެއަކަށް ގެއްލުން ލިބި 1 ގެއަކުން މީހުން ހުސްކޮށްފައިވޭ

5) އދ.މާމިގިލި - 4 ގެއަކަށް ބޮޑެތި ގެއްލުން ލިބިފައިވޭ

6) ކ.ގުރައދޫ - 60 ގެއަކަށް އެކިވަރުގެ ގެއްލުން ލިބިފައިވޭ

7) ފ.ފީއަލި - ފެންބޮޑުވެގެން 1 ގެއަކުން މީހުން ހުސްކޮށްފައިވޭ

8) ކ.ހިންމަފުށި - 60 އިންސައްތަ ގެތަކުގައި ފެންބޮޑުވެފައިވޭ

މޫސުމާއި ބެހޭ އިދާރާ (މެޓް އޮފީސް) އިން ވަނީ މިއަދުވެސް އުތުރާއި މެދު ރާއްޖެތެރޭގެ އެކި ހިސާބަށް ވިއްސާރަކޮށް، ބައެއް ރަށްތަކަށް ބޯކޮށް ވާރޭވެހި ގުގުރާނެކަމަށް ލަފާކޮށް، މި ސަރަހައްދުގެ މޫސުމަށް ސަމާލުވުމަށް އިލްތިމާސްކޮށްފައެވެ.