ޖުވެނައިލް ކޯޓު އަނބުގަހުން ވަގަށް އަނބު ބިންމީހަކު ހައްޔަރު ކޮށްފި

ޖުވެނައިލް ކޯޓުގެ އަނބުގަހުން ވަގަށް އަނބު ބިނދެގެން 64 ވަނަ ފަހަރަށް އިއްޔެ ހައްޔަރުކޮށްފިއެވެ.

ކްރިމިނަލް ކޯޓުގެ ބަންދު އަމުރުގައި ވާގޮތުން މި މައްސަލާގައި ހައްޔަރު ކުރީ އުމުރުން 42 އަހަރުގެ ދިވެހި ފިރިހެނެކެވެ. އޭނާގެ މައްޗަށް ކުރަނީ ވައްކަން ކުރިކަމުގެ ތުހުމަތެވެ.

އަމުރުގައި ބުނެފައިވާ ގޮތުގައި އެމީހާ ފާރު މައްޗަށް އަރައިގެން ޖުވެނައިލް ކޯޓުގެ އަނބުގަހުން އަނބު ބިނުމަށްފަހު ދާން އުޅެނިކޮށް، އެކަން ތަކުރާރު ނުކުރުމަށާއި، އަނބުތައް ބަހައްޓާފައި ދިޔުމަށް އެ ތަނުގައި ތިބި ސެކިއުރިޓީން ބުނެފައިވެއެވެ.

އެހެން ނަމަވެސް، އެކަމަށް އެއްބަސްނުވެ، އޭނާ އެތަނުން ދިޔަ ކަމަށާ އޭނާ ދަނިކޮށް ފުލުހުން ހުއްޓުވާފައިވާ ކަމަށް އޭނާ ޝަރީއަތުގައި ބުނެފައިވާ ކަމަށް ކޯޓު އަމުރުގައިވެއެވެ.

އޭނާގެ ބަންދުގެ ލޮގަށް ބަލާއިރު އެކި ފަހަރު މަތިން 63 ފަހަރު މީގެ ކުރިން ހައްޔަރުކޮށްފައިވާ ކަމަށް ކޯޓު އަމުރުގައި ބުނެފައިވެއެވެ. އޭގެ ތެރެއިން 30 ފަހަރު ބަންދަށް ބަދަލުކޮށްފައިވާ ކަމަށް އަމުރުގައި ބަޔާންކޮށްފައިވެއެވެ.

އަދި މީގެ ކުރިން އޭނާ އެންމެ ގިނައިން ހައްޔަރުކޮށްފައިވަނީ ވެސް ވައްކަމުގެ މައްސަލަތަކުގައި ކަމަށް ކޯޓު އަމުރުގައި ވަނީ ބުނެފައެވެ.

ކްރިމިނަލް ކޯޓުން ވަނީ އޭނާގެ ބަންދަށް ހަތް ދުވަސް ޖަހާފައެވެ.

އަދި ބަންދުގައި ބެހެއްޓުމަށް ސަބަބެއްގެ ގޮތުގައި ކަނޑައަޅާފައިވަނީ ބަންދުން ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމަށްޓަކައެވެ.