މަހެއްހާ ދުވަހުގެތެރޭ މަސައްކަތް ނިންމާ، ޢިއްޒުއްދީން ފާލަން ބޭނުން ކުރަން ފެށޭނެ: ވަޒީރު މުއްޠަލިބު

މަހެއްހާ ދުވަހުގެތެރޭގައި އިއްޒުއްދީން ފާލަމުގެ މަސައްކަތް ނިމި ބޭނުންކުރަން ފެށޭނެކަމަށް އިމާރާތްކުރުމާއި ގެދޮރުވެރިކަމާއި ބިނާރާބެހޭ ވަޒީރު ޑރ.އަބްދުﷲ މުއްތަލިބް ވިދާޅުވެއްޖެއެވެ.

ފާލަމުގެ މަސައްކަތް ކުރިއަށްދާ ގޮތް ބައްލަވާލެއްވުމަށްފަހު، ދައުލަތުގެ މީޑިއާ ޕީއެސްއެމަށް ދެއްވި ބަސްދީގަތުމެއްގައި ވަޒީރު މުއްތަލިބް ވިދާޅުވީ، ކުރިން އޮތް ފާލަން ރޫޅާލަން އެންގީ ފާލަމަށް ވަރަށް ބޮޑަށް ގެއްލުންތަކެއްވެ، ރައްޔިތުންނަށް ގެއްލުންތަކެއް ވެދާނެތީ ކަމަށެވެ.

މަސައްކަތް ނުފެށި ލަސްތަކެއްވީނަމަވެސް މިހާރު ބާރު ސްޕީޑުގައި މަސައްކަތް ކުރިއަށްދާކަމަށް ވަޒީރު ވިދާޅުވިއެވެ.

މިއީ މާލޭގެ މަލަމަތިކަމަށްވެފައި، ފާލަން އެގޮތަށް ބަންދުކޮށްފައި ބޭއްވުމަކީ އަރާފައިބާ މީހުންނަށްވެސް ފާހަގަކުރެވޭ ކަން ފާހަގަކުރައްވާ ވަޒީރު ވިދާޅުވީ، ސަރުކާރުން ވަރަށް ބޮޑަށް ބަރުއަޅައިގެން މަސައްކަތް ބާރަށް ކުރިއަށްދާކަމަށާއި، މަހެއްހާ ދުވަހުގެ ތެރޭގައި މަސައްކަތް ނިންމާ ފާލަން ހުޅުވާލެވޭނެކަމަށް އުންމީދުކުރައްވާކަމަށެވެ.

"އޭރު އޮތް ފާލަމަށް ވަރަށް ބޮޑަށް ގެއްލުންތަކެއްވެ، ބައިތައް ވެއްތި ރައްޔިތުންނަށް ގެއްލުމެއް ވެދާނެތީ އަޅުގަނޑުމެން އެނގީ ރޫޅާލަން. ރޫޅާލާފަ އޭރު މަސައްކަތް ފެށެން ތައްޔާރުނުވާތީ ހަގީގަތުގައި ވަރަށް ލަސްތަކެއް ވެގެންދިޔަ ފާލަން ބަންދުކޮށްފަ އޭރު މަސައްކަތް ނުފެށި. އެހެންމަވެސް މިއީ މާލޭގެ މަލަމަތިކަމަށްވެފައި، ފާލަން އެގޮތަށް ބަންދުކޮށްފައި ބޭއްވުމަކީ މިތަނަށް އަރަާފައިބާ މީހުންނަށްވެސް ފާހަގަކުރެވޭ ކަމަކަށްވެ މާލޭގެ ރީތިކަން ގެއްލިގެންދާނެ ފަދަކަމެއްކަމުން ސަރުކާރުން ވަރަށް ބޮޑަށް ބަރުއަޅައިގެން މަސައްކަތް ބާރަށް ކުރިއަށް އެބަދޭ. އުއްމީދުކުރަނީ މަހެއްހާ ދުވަހުގެ ތެރޭގައި މިމަސައްކަތް ނިންމާ ފާލަން ހުޅުވާލެވޭނެކަމަށް."

ވަޒީރު މުއްތަލިބް ވިދާޅުވިއެވެ.

ޑިޒައިން އެންޑް ބިލްޑް އުސޫލުން އްޒުއްދީން ފާލަން އަލުން ތަރައްޤީކުރުމަށް އެމްޓީސީސީ އާއި މިދިޔަ އަހަރު ހަވާލުކުރި ނަމަވެސް، އެކަށީގެންވާ ސްޕީޑުގައި ކުރިއަށްގޮސްފައެއް ނުވެއެވެ.