އިސްރާއީލާ ދެކޮޅު ހަރަކާތްތައް ބޮޑުވެ މެޑްރިޑް ވުއެލްޓާ ސައިކަލް ރޭސް ހުއްޓުމަކަށް

އިސްރާއީލާ ދެކޮޅު ހަރަކާތްތައް ބޮޑުވެ އެންމެފަހުން މެޑްރިޑްގައި ކުރިއަށްދިޔަ ވުއެލްޓާ ސައިކަލް ރޭސް ހުއްޓާލަން ޖެހިއްޖެއެވެ.

ސައިކަލްރޭސް ހުއްޓާލަން ޖެހުނީ އިސްރާއީލްގެ ޓީމެއް ރޭހުގައި ބައިވެރިކުރަން ނިންމި ހިސާބުންނެވެ. ރޭސް ބަލަން އެއްވި ގިނަ އަދަދެއްގެ މީހުން ވަނީ އިސްރާއީލްގެ ޓީމް ބައިވެރިކުރުމާ ދެކޮޅަށް މަގުތަކުގައި އަޑުއުފުލާފައެވެ. އެންމެފަހުން ރޭސް ހުއްޓާލަން ޖެހުނީ މުޒާހަރާތައް ބޮޑުވެ، މުޒާހަރާގެ ބައިވެރިން ބެރިކޭޑްތައް އުކާލައި، ރޭސްޖަހާ ޓްރެކަށް ވަދެގަތުމުންނެވެ. މި ހަރަކާތުގައި ފުލުހުންނާ މުޒާހަރާގެ ބައިވެރިންނާ ދެމެދު ކޮންމެވެސް ވަރެއްގެ ހަމަނުޖެހުންތަކެއްވެސް ވަނީ ހިނގާފައެވެ.

ރޭސް ހުއްޓާލާފައިމިވަނީ އެންމެ ފަހު ދުއްވުންތަކާ ހުސާބަށް ގޮސްފައިވަނިކޮށެވެ. މިއީ ވުއެލްޓާ ސައިކަލްރޭސް މި ފަހުގެ ތާރީހެއްގައި ހުއްޓާލަން ޖެހުނު ފުރަތަމަ ފަހަރެވެ. މި ރޭސް އެންމެފަހުން ހުއްޓާލަން ޖެހުނީ 1978 ވަނަ އަހަރު ކުރިއަށްދިޔަ ސިޔާސީ ހަރަކާތްތަކެއްގެ ސަބަބުންނެވެ.

މުޒާހަރާއާ ގުޅިގެން ސްޕެއިންގެ ބޮޑުވަޒީރު ޕެޑްރޯ ސަންޗޭޒް ވަނީ، މުޒާހަރާކުރަން ޖެހުނު ސަބަބު ވަރަށް ސާފުކަމަށް ވިދާޅުވެ، ފަލަސްތީނުގެ ހައްގުގައި އަޑުއުފުލަން ޖެހޭކަމަށް ވިދާޅުވެ، އެކަން ކުރުމަށް ބާއްވާ ހަރަކާތް ހުއްޓުވުމުގެ މާނައެއްނެތްކަމަށް ވިދާޅުވެފައެވެ.

މުޒާހަރާތަކަށް 100،000 ހާސް މީހުން ނިކުމެފައިވާއިރު، އެ ހުރިހާ މީހުންވަނީ ފަލަސްތީނާއެކު ތިބިކަމަށް ބުނެފައެވެ.

ފަލަސްތީނު މައްސަލާގައި ސްޕެއިން ސަރުކާރާ އިސްރައީލް ވެރިންނާ ދެމެދު ވަނީ ހޫނު ބަހުގެ ހަމަލާތަކެއް ބަދަލުކޮށްފައެވެ. މީގެ އިތުރުން ތެލް އަވީވްގައި ހުންނަ ސްޕެއިން ސަފީރު ވަނީ އެޤައުމަށް ގެނެސްފައެވެ. އިސްރާއީލް މައްސަލާގައި ސްޕެއިންގެ ކުޅިވަރާ ބެހޭ ވަޒީރު އަލެގްރިއާ ވަނީ ބައިނަލްއަޤްވާމީ ކުޅިވަރުގެ މުބާރާރްތަކުން އިސްރާއީލްގެ ޓީމުތައް ވަކިކުރަންޖެހޭކަމަށް ވިދާޅުވެފައެވެ.