އެމްޑީޕީ އާންމު މެންބަރުން އަޅުގަނޑަށް މާފަށް އެދޭކަށް ނުބުނަން، އެދޭކަށް ނުވެސް ޖެހޭ: ނަޝީދު

އެމްޑީޕީގެ އާންމު މެންބަރުން އެ މަނިކުފާނުގެ ކިބައިން މާފަށް އެދޭކަށް ނުޖެހޭނެ ކަމަށާއި، އެފަދަ މާނައެއްގައި މީގެ ކުރިން ވާހަކަފުޅު ދައްކަވާފައި ނުވާނެ ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިހެން ވިދާޅުވީ، ޗެއާޕާސަން އިންތިޚާބުގެ ކެންޕެއިންގެ ތެރެއިން ހއ. މުރައިދުއަށް ވަޑައިގަތުމުން، އެ ރަށުގެ އާންމު މެންބަރަކު ކުރި ސުވާލަކަށް ޖަވާބު ދެއްވަމުންނެވެ.

އެގޮތުން، ނަޝީދު ވިދާޅުވީ އެއްވެސް އާންމު މެންބަރަކު، ނުވަތަ އާންމު މެންބަރުންގެ އެންމެން އެ މަނިކުފާނުގެ ކިބައިން މާފަށް އެދޭކަށް ނުޖެހޭނެ ކަމަށެވެ.

"އަޅުގަނޑު ނުބުނަން އެކަހަލަ ވާހަކައެއް. އާއްމު މެންބަރުން އަޅުގަނޑުގެ ކިބައިން މާފަށް އެދޭކަށް ނުޖެހޭނެ. އެއްވެސް ޖަމާއަތެއްގެ އާއްމު އެންމެން ވަކި ފަރުދަކަށް މާފަށް އެދެން އެއީ ވަރަށް ހުތުރު ވާހަކައެއް. އެބާވަތުގެ ގޮތަކަށް ކަންކަން މާނަކުރެވުނު ނަމަވެސް އަޅުގަނޑު އެ މާނަގައިއެއް ނޫން ބުނީ.،" ނަޝީދު ވިދާޅުވިއެވެ

އެމްޑީޕީއަށް ލިބޭ ކާމިޔާބީތަކުގެ އަސްލަކީ ޕާޓީގެ އާންމު މެންބަރުންކަން ފާހަގަކުރައްވަމުން ނަޝީދު ވިދާޅުވީ، އެ ޕާޓީގެ އިންތިޒާމުތައް އެތުރިފައިވަނީ "ތިރިން މައްޗަށް ހިނގާ ގޮތަށް" އާންމު މެންބަރުންގެ ޕާޓީއެއްގެ ގޮތުގައި ކަމަށެވެ.

މީގެ އިތުރުން، އެމްޑީޕީ ދޫކޮށްލުމަކީ ހެދުނު ގޯހެއް ކަމަށް އިއުތިރާފުވަމުން ނަޝީދު ވިދާޅުވީ އެކަމަށްޓަކައި ވަރަށް ބޮޑަށް މާފަށް އެދިވަޑައިގަންނަވާ ކަމަށެވެ. އަދި އެފަދައިން ކަންކަން ދިމާވަނީ ބައެއް ފަހަރު ތަބީއަތުގައި ހުންނަ ރުންކުރުކަމުގެ ސަބަބުންކަމަށްވެސް ވިދާޅުވިއެވެ.

އަޅުގަނޑަށްކަންތައްކުރެވުނީ ރަނގަޅަކަށްނޫން. އަޅުގަނޑު ވަރަށް ބޮޑަށް މަޢާފަށް އެެދެން. ބައެއް ފަހަރަށް އަޅުގަނޑުމެންގެ ބައެއް މީހުންގެ ތަބީޢަތުގައި ހުރޭ ރުންކުރުކަން. އެހެންވީމާ އެކަހަލަ ކަންކަން އަތުން ދޫވެގެން ދަނީ. އެކަމަކު ކެތްތެރިކަމާ ހިކުމަތްތެރިކަން އިސްކުރުން އެއީ ހުރިހާ ބޭފުޅުންވެސް ކަންކުރަންވީ ގޮތަކީ.

ނަޝީދު

ނަޝީދު މިހެން ވިދާޅުވެފައިވާއިރު، ކެންޕެއިން ތެރެއިން ރ. ދުވާފަރަށް ވަޑައިގެން ވާހަކަދައްކަވަމުން ނަޝީދު ވަނީ އެމްޑީޕީ ދޫކޮށްލެއްވުމުން އެކަމަށް މާފަށް އެދިވަޑައިގަންނަވާފައެވެ.

އަދި އޭރު ކަންކަން ހިނގައި ގޮތަށް އަލިއަޅުވާލައްވަމުން ނަޝީދު ވަނީ،  އެމަނިކުފާނަށް ދެވުނު ބޮމުގެ ހަމަލާގެ ތަހުގީގު އެމްޑީޕީގެ ސަރުކާރުން ކުރިއަށް ގެންދިޔަ ގޮތާމެދު ކަންބޮޑުވުން ފާޅުކުރައްވާފައެވެ.

އަދި އޭގެ ފަހުން ނަޝީދާ އެންމެ އަރިހުގައި ތިއްބެވި މަޖިލިސް މެންބަރުން ވަކިކުރަން އެމްޑީޕީން ނިންމި ކަން ފާހަގަކުރައްވައި ”ތިޔަ ބޭފުޅުން ވެސް އަޅުގަނޑަށް މާފަށް އެދެން ޖެހޭ" ކަމަށް ވަނީ ވިދާޅުވެފައެވެ.

"ވަކިކުރަން ފިޔަވަޅު އަޅާ ކޮމިޓީއަށް ލާފައި އޮތީމަ ލަދެއް އަޅުގަނޑުގެ ހުރިއްޔާ ދާނެތާ އެ ހިސާބަށް. މި މީހުންނާ އެކު އުޅެނީ، އަޅުގަނޑު ވެސް ގޯސް ކަންތައް ކުރިން، އެކަމަކު ތިޔަ ބޭފުޅުން ވެސް އަޅުގަނޑު އަރިހުން މާފަށް އެދެން ވަރަށް ބޮޑަށް އެދެން،" ނަޝީދު ވިދާޅުވި އެވެ.