ހަތް އަހަރަށް ފަހު މަރުކަޒުގެ އިމާމުގެ މަގާމުން ޝެއިޚް އިބްރާހިމް ރަޝީދު އިސްތިއުފާ ދެއްވައިފި

ހަތް އަހަރަށް ފަހު މަރުކަޒުގެ އިމާމުގެ މަގާމުން ޝެއިޚް އިބްރާހިމް ރަޝީދު ހަސަން އިސްތިއުފާ ދެއްވައިފި އެވެ.

ޝެއިޚް އެ މަގާމުން އިސްތިއުފާ ދިވެހިރާއްޖޭގެ އިސްލާމީ ޔުނިވަރސިޓީގެ ވަޒީފާއަކަށް ވަޑައިގަތުމަށެވެ. އެކަން ހާމަކޮށް ޝެއިޚް ކުރެއްވި ޕޯސްޓެއްގައި ވިދާޅުވީ ވޭތުވެދިޔަ ހަތް އަހަރުގެ ދިގު މުއްދަތުގައި އިސްލާމީ މަރުކަޒުގެ އިމާމެއްގެ މަސްއޫލިއްޔަތު އަދާކުރުމުގެ ފުރުސަތު ލިބިގެންދިޔުމަކީ، ލިބުނު ވަރަށް ބޮޑު ޝަރަފަކާއި ފަޚުރެއް ކަމަށެވެ.

"އަޅުގަނޑަށް އިތުބާރު ކުރައްވާ މި މަޤާމަށް އައްޔަންކުރެއްވި ކަމަށްޓަކައި، ދިވެހިރާއްޖޭގެ ކުރީގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އަދި މިހާރުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް އިޚްލާޞްތެރިކަމާއެކު ޝުކުރު ދަންނަވަމެވެ," ދެ ރައީސުންނަށް ޝުކުރު އަދާކުރައްވާ ޝެއިޚް ވިދާޅުވި އެވެ.

އަދި މަޤާމުގެ މަސްއޫލިއްޔަތުތައް އަދާކުރުމުގައި ކުރީގެ އިސްލާމިކް މިނިސްޓަރ ޑރ. އަޙްމަދު ޒާހިރު ޢަލީ އާއި މިހާރުގެ އިސްލާމީކަންތައްތަކާއި އައުޤާފާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ދެއްވި އަގުހުރި ނަސޭހަތާއި، އިރުޝާދަށް ވެސް ވަނީ ޝުކުރު ދަންނަވާފަ އެވެ.

މީގެ އިތުރުން އެކުގައި މަސައްކަތް ކުރެއްވި، އިސްލާމީ މަރުކަޒުގެ އިސްއިމާމް ފަޟީލަތުއް ޝައިޚް މުހައްމަދު ލަތީފާއި އަލްހާފިޡް ސަލްމާން މުޙައްމަދު ލަތީފާއި އައްޝައިޚް ނަޞްރުﷲ ޢަލީ އާއި އައްޝައިޚް ޢައްމާރު އިލްޔާސްގެ ނަން ފާހަގަކޮށްފައިވެ އެވެ.

ޝެއިޚް ވިދާޅުވީ އިސްލާމިކް ޔުނިވާސިޓީއާ ގުޅިވަޑައިގަތީ ތަޢުލީމާއި އުނގަންނައި ދިނުމުގެ ދާއިރާއިން ދިވެހި ޤައުމަށް ޚިދުމަތް ކުރުމަށް ލިބުނު ފުރުސަތެއްގެ ބޭނުން ހިފުމަށް ކަމަށެވެ.