ޢާޒިމާގެ އިންތިޚާބީ ހައްގަކަށް އަރައިގެންފައިވާ ކަމަށްބުނެ މައްސަލަ ބަލަން އީސީއަށް!

ޕީއެންސީ ޓިކެޓްގައި މާލެސިޓީ މޭޔަރ ކަމަށް ވާދަކުރައްވާ ކުރީގެ ބަންޑާރަ ނާއިބު ޢާއިޝަތު ޢާޒިމާ ޝަކޫރުގެ އިންތިޚާބީ ހައްގަށް އަރައިގަތްކަމަށް ވިދާޅުވެ މައްސަލަ އިލެކްޝަންސް ކޮމިޝަނަށް ހުށަހަޅުއްވަން ނިންމަވައިފިއެވެ.

ޢާޒިމާގެ ފަރާތުން އިއްޔެ ނެރެފައިވާ ނޫސްބަޔާނެއްގައި ބުނީ، އޭނާގެ ނަމުގައި މޯލްޑިވްސް އިސްލާމިކް ބޭންކުން ނަގާފައިވާ ގެދޮރުވެރިކަމުގެ ލޯނުގެ މައްސަލައިގައި ލޯނު ރީސްޓްރަކްޗާރކުރުމަށް ވާހަކަދައްކަވަން ފަށްޓަވައި، ފައިސާ ދައްކާނޭ ގޮތުގެ ޝެޑިއުލެއްވެސް އެ ބޭންކަށް ހުށަހަޅުއްވާފައި ވަނިކޮށް އެ ބޭންކުގެ އެދުމުގެ މަތިން އޭނާގެ ޣައިރު ހާޒިރުގައި ސިވިލް ކޯޓުން ހުކުމް ކޮށްފައިވާ ކަަމަށެވެ.

އަދި އެކަން އިސްލާމިކް ބޭންކުން ކުރިއަށް ގެންގޮސްފައިވަނީ، ލޯނު ރީ-ސްޓްރަކްޗަރ ކުރުމަށް ދެކެވެމުންދިޔަ ވާހަކަތައް ވަކިގޮތަކަށް ނިމެންދެން، ކޯޓުގައި ހިނގަމުންދިޔަ މައްސަލަ މަޑު ޖައްސާލުމަށް ކޯޓަށް ލިޔުމުން އަންގާނޭ ކަމުގެ ޔަގީންކަން އޭނާއަށް ދިނުމަށްފަހު ކަންވެސް އާޒިމާ ފާހަގަކުރެއްވިއެވެ.

މިއީ އަޅުގަނޑު ކުރިމަތިލާފައިވާ މާލެ ސިޓީގެ މޭޔަރު އިންތިހާބު ކުރުމަށް ބާއްވާ ބައި-އިލެކްޝަން އަށް ނުފޫޒުފޯރުވުމަށް ބޭންކިންގެ ޤާނޫނުތަކާއި އުސޫލުތަކާއި ޚިލާފަށް، ބޭންކުގެ ވަކި މުވައްޒަފަކު ކޮށްފައިވާ ކަމެއްކަމަށް އަޅުގަނޑަށް ގަބޫލުކުރެވޭ ވަރުގެ މަޢުލޫމާތު ވަނީ ލިބިފައެވެ.

މިކަން މިހެން ހިނގާފައި ވަނިކޮށް، ވަކި ފަރާތަކަށް ޢާޒިމާ ފައިސާ ދޭންޖެހޭ ކަމަށް ބުނެ އޭނާއާއި ދެކޮޅަށް ސިވިލް ކޯޓަށް މައްސަލައެއް ހުށަހަޅާފައިވާ ކަމަށާއި، އަދި އެކޯޓަށް އޭނާ ހާޒިރުވެފައި ނުވާތީ މިމަހުގެ 9 ވަނަ ދުވަހު އޭނާގެ ޣައިރު ހާޒިރުގައި ހުކުމް ކުރުމަށް ހަމަޖެހިފައިވާ ކަމަށާ، އެކަން އޮންލައިން ނޫހެއް ކަމަށްވާ "ދައުރު" އަށް ކަށަވަރު ކުރެވިފައިވާކަމަށާއި، އަދި އެކަމުގެ ލިޔުންތައް އެނޫހަށް ލިބިފައިވާކަމަށް 4 ޖެނުއަރީ 2024 ވަނަ ދުވަހު ދައުރު ނޫހުގައި ޝާއިއު ކޮށްފައިވާ ކަމަށް އެ ބަޔާނުގައި ފާހަގަކޮށްފައިވެއެވެ.

އެހެންނަމަވެސް އޭނާގެ މައްޗަށް އެފަދަ ދައުވާއެއް ކޮށްފައިވާކަން އެނގިފައި ނުވާތީ އެކަން ސާފުކުރުމަށް އޭނާގެ ގާނޫނީ ވަކީލުން ސިވިލް ކޯޓަށް ލިޔުމުން އޭނާގެ މައްޗަށް އެފަދަ އެއްވެސް ދައުވާއެއް ސިވިލް ކޯޓަށް ހުށަހެޅިފައި ނުވާކަމަށް އެކޯޓުން ގާނޫނީ ވަކީލުންނަށް ލިޔުމުން ޖަވާބު ދީފައި ވާކަމަށްވެސް އާޒިމާ ވިދާޅުވެފައި ވެއެވެ.

އާޒިމާ ވިދާޅުވީ އެ ދެ މައްސަލައަކީވެސް އޭނާ މިހާރު ކުރިމަތިލައްވައިގެން އުޅުއްވާ މާލޭ ސިޓީގެ މޭޔަރު އިންތިޚާބުގެ ބައި އިލެކްޝަންގެ އިންތިޚާބަށް ނުފޫޒު ފޯރުވާ މި އިންތިޚާބުގައި އޭނާއަށް ގެއްލުން ދިނުމުގެ ނިޔަތުގައި ބަޔަކު ރާވައިގެން ކުރަމުންދާ ކަމެއްކަމުގައި އޭނާއަށް ގަބޫލުކުރެވޭކަމަށެވެ.

އެހެންކަމުން، މައިގަނޑު ހަތަރު ފިޔަވަޅެއް އެޅުމަށް އޭނާގެ ވަކީލުންގެ ޓީމުން ނިންމަވައި މަސައްކަތް ފަށްޓަވާފައިވާ ކަމަށް ޢާޒިމާ ވިދާޅުވި އެވެ. އެއީ؛

1) ދިވެހރާއްޖޭގެ ބޭންކިންގއާ ބެހޭ ގާނޫނުގެ ދަށުން މި މައްސަލަ ބައްލަވައި ބޭންކާ ދެކޮޅަށް ފިޔަވަޅު އަޅުއްވައިދެއްވުން އެދި މޯލްޑިވްސް މަނިޓރީ އޮތޯރިޓީއަށް ހުށަހެޅުން.

2) ދައުރު ނޫހުގައި، ދޮގު ހަބަފަތުރައި، ލޔުންތައް އުފައްދައި ފެބްރިކޭޓްކޮށް ޢާޒިމާގެ އަބުރަށް އަރައިގަނެ، އަދި އޭނާއާ ބެހޭ ގޮތުން ދޮގު މައުލޫމާތު ފަތުރާފައިވާ ކަމަށް ބުނެ، އެ މައްސަލަ ބައްލަވައި ފިޔަވަޅު އަޅައި ދެއްވުން އެދި މޯލްޑިވްސް ޕޮލިސް ސަރވިސަސް އަށް ހުށަހެޅުން

3) ޢާޒިމާގެ އިންތިހާބީ ޙައްގަކަށް ދައުރު ނޫހުން އަރައިގެންފައިވާ ކަމަށް ބުނެ، އެމައްސަލަ ބައްލަވައި ދެއްވުންއެދި އިލެކްޝަންސް ކޮމިޝަނަށް ހުށަހެޅުން

4) އަބުރުގެ ދައުވާ ސިވިލް ކޯޓަށް ހުށަހެޅުން