ހޯއްގޮވާ ބަލީގެ ކޭސްތަކުގެ އަދަދު ފަހަކަށް އަރައިފި!

މިއަހަރުގެ ޖެނުއަރީ މަހުުގެ 23 ވަނަ ދުވަހު ގއ.ވިލިނގިލިން ފެނުނު ހޯއްގޮވާ ބަލީގެ ކޭސްތަކުގެ އަދަދު 5 އަށް އަރައިފިއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނީ 31 ޖަނަވަރީ 2024 ވަނަ ދުވަހު ގއ.ވިލިނގިލިން އިތުރު ޕަރޓޫސިސް ނުވަތަ ހޯއްގޮވާ ކެއްސުމުގެ އިތުރު ކޭސްއެއް ވަނީ ފެނިފައިވާ ކަމަށެވެ. މިއާއި އެކު މި ބައްޔަށް ފައްސިވި މީހުންގެ އަދަދު މިވަނީ 5 އަށް އަރާފައެވެ.

އެޗްޕީއޭއިން ބުނީ ގއ.ވިލިނގިލީގައި ބަލި ފެތުރުން، މަދު ކުރުމަށް ގއ.އަތޮޅު ހޮސްޕިޓަލްގައި ޓާސްކް ފޯހެއް އެކުލަވާލައި، ރަށުގެ އެހެނިހެން ސެކްޓަރުތަކުގެ ފަރާތްތަކުގެ އެއްބާރުލުމާއެކު ބަލި ފެތުރުން ކޮންޓްރޯލް ކުރުމުގެ މަސައްކަތް ކުރަމުންދާ ކަމަށެވެ.

މިހާތަނަށް އެޗްޕީއޭގެ ތަފާސްހިސާބު ތަކުން ދައްކާގޮތުގައި ފައްސިވެފައިވާ މީހުންގެ ކޮންޓެކްޓުންގެ ތެރޭގައި 2 ހައި ރިސްކު މީހުން ހިމެނޭއިރު، 25 ފަރާތެއްގެ ކިބައިން ބަލީގެ އަލާމަތްތައް ވަނީ ފެނިފައެވެ. މީގެ އިތުރުންވެސް، ކޮންޓެކްޓް ނުވާ 46 ފަރާތެއްގެ ކިބައިން ބަލީގެ އަލާމާތްތައް ފެނިގެން ވަނީ ޓެސްޓް ކޮށްފައެވެ. އަދި 27 ފަރާތަކަށް ޕްރޮފައިލެކްސިސް ވަނީ ދެވިފައެވެ.

މި ބައްޔާއި އެހެނިހެންވެސް ރޯގާ ތަކުން ރައްކާތެރިވުމަށް މާސްކް އަޅައިގެން އުޅުމަށާއި ޚާއްސަކޮށް އަލާމާތެއް ހުރިނަމަ މާސްކް އެޅުން އަދި އަލާމާތެއް ހުރިނަމަ ސްކޫލް، އޮފީސް ނުވަތަ މީހުން ގިނަ ތަންތަނަށް ނުދިއުން އަދި ބަލި މީހުން ގާތަށް ނުދިއުމަށް އެޗްޕީއޭއިން އިލްތިމާސް ކުރެއެވެ. އަދި އަތް ދޮވުމާއި ސެނިޓައިޒަރ ބޭނުން ކުރުމަށް ވެސް އިދާރާއިން ވަނީ އެދިފައެވެ.

މީގެ އިތުރުންވެސް ކޮވިޑް 19 ވެކްސިނާއި އިންފުލުއެންޒާ ވެކްސިން ފުރިހަމަކުރުމަށާއި މި ބަލި ޖެހުމުގެ ނުރައްކާ އެންމެ ބޮޑީ ކުޑަކުދިންނަށް ކަމަށްވާތީ 7 އަހަރު ނުވާ ކުޑަކުދިންގެ ތެރެއިން މި ވެކްސިން ފުރިހަމަ ނުކޮށް ތިބި ކުދިންނަށް ވީހާވެސް އަވަހަށް ވެކްސިން ދިނުމަށް އެޗްޕީއޭއިން އިލްތިމާސްކުރެއެވެ. މި ބައްޔަށް ޖަހާ ވެކްސިން އެ ރަށެއްގެ ސިއްހީ ހިދުމަތްދޭ މަރުކަޒުން ލިބެން ހުންނާނެ ކަމަށް ވެސް އެއިދާރާއިން މައުލޫމާތުދެއެވެ.

މި ބައްޔަކީ ގަވާއިދުން ވެކްސިން ދޭންފެށުމާއި ގުޅިގެން ކޮންޓްރޯލް ކުރެވިފައިވާ ބައްޔެއް ނަމަވެސް މަދު މަދުން ރާއްޖެއިން ފެންނަ ބައްޔެކެވެ.

ޕަރޓޫޓިސް ނުވަތަ ހޯއްގޮވާ ކެއްސުމަކީ ބޯޑެޓެލާ ޕަރޓޫސިސް ކިޔާ ވައްތަރެއްގެ ބެކްޓީރިއާއެއްގެ ސަބަބުން ނޭވާލާ ނިޒާމަށް ޖެހޭ ބައްޔެކެވެ. ގައިން ގައިން ވަރަށް ފަސޭހައިން އަރާ މި ބަލި ފުރަތަމަ ޖެހުމުން ފެންނާނީ އާންމު ރޯގާތަކުގައި ވެސް ފެންނަ އަލާމާތްތަކެވެ. އެހެންނަމަވެސް ހަފްތާއެއް ފަހުން ކެއްސުން ދިގުލައިގެން ގޮސް ވަރަށް ގިނަ ދުވަހަށް ދެމިގެންދާނެއެވެ.