މިހާރު އޮތް ރައްޔިތުންގެ މަޖިލީހުން ބޭނުމެއް ނުވޭ ވައުދުތައް ފުއްދަން ޖާގަ ދޭކަށް: ރައީސް ޑރ.މުއިއްޒު

މިހާރު ކުރިއަށްދާ 19 ވަނަ ރައްޔިތުންގެ މަޖިލީހުން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ގެ ރިޔާސީ ވައުދުތައް ފުއްދަން ޖާގަދޭން ބޭނުންނުވާކަމަށް ރައީސް ޑރ.މުއިއްޒު ވިދާޅުވެއްޖެއެވެ.

ރައީސް ޑރ.މުއިއްޒު މިފަދައިން ވިދާޅުވީ ރ އަތޮޅުގެ ރަށްތަކަށް ކުރައްވާ ދަތުރުފުޅުގެ ތެރެއިން ރ.މީދޫ އަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައެވެ. މިގޮތުން ރައީސް ޑރ.މުއިއްޒު ވިދާޅުވީ ދަތި ކުރެވެން އޮތް ގޮތަކަށް ދަތިކޮށްގެން ބަޖެޓް ފާސްކޮށްދިނީ ވެސް ވައުދުތައް ފުއްދަން ޖާގަ ނުދިނުމަށް ކަމަށެވެ.

"މި ދަންނަވަން އުޅޭ ވާހަކައަކީ މިހާރު އޮތް ރައްޔިތުންގެ މަޖިލީހުންނެއް ބޭނުމެއް ނުވެޔޭ، އަޅުގަނޑު ވީ ވައުދުތައް ފުއްދަން ޖާގަ ދޭކަށެއް، އެހެންވީމަ އެބޭފުޅުންނަށް ދަތި ކުރެވެން އޮތް ގޮތަކަށް ވިއްޔާ ކޮށްގެން މަޖިލީހުން ބަޖެޓް ފާސްކޮށްދިނީ،".

ރައީސް ޑރ.މުއިއްޒު ވިދާޅުވިއެވެ.

ރައީސް ޑރ.މުއިއްޒު ވިދާޅުވީ މަޖިލީހުން ބަޖެޓް ހަމަޖައްސައިދީފައިވާއިރު، މެމްބަރުން ބޭނުންވާ ކަންކަން އުނިކޮށް، ބަދަލުތައް ގެނެސް، ހިނގަމުންދިޔަ މަޝްރޫއުތަކާއި ފެށިފައި ހުރި މަޝްރޫއުތައް ވެސް ނިންމުމާއި ގާތަށްވެސް ފައިސާ ހަމަޖައްސާދީފައި ނުވާ ކަމަށެވެ. އަދި ޓްރާންސިޝަން މުއްދަތުގެ ތެރޭގައި މިހާރުގެ ސަރުކާރުން ބަޖެޓަށް ހުށަހެޅި ކަންކަން ވެސް ބަޖެޓް ފާސްކުރި އިރު ހިމަނާފައިނުވާކަން ރައީސް ޑރ.މުއިއްޒު ފާހަގަކުރައްވިއެވެ.

މިއީ ހަގީގަތް ކަމަށާއި، ވެރިކަމުގެ ފުރަތަމަ ދުވަހުން ފެށިގެން މި ސަރުކާރުން މަސައްކަތް ފަށާ، 14 ހަފްތާ ނިމިގެން ދިޔައިރު، ކުރިމަތިވި ހުރިހާ އުނދަގޫތަކުން އަރައިގަނެ ރައްޔިތުންނަށް ވެވަޑައިގެންނެވި ވައުދުތައް ފުއްދެވުމަށްޓަކައި ކަންތައްތައް ފަހި ކުރި ކަމަށް ރައީސް ޑރ.މުއިއްޒު ވިދާޅުވިއެވެ. އޭގެތެރޭގައި ރައީސް ޑރ.މުއިއްޒު ފާހަގަ ކުރެއްވި ކަންތައްތަކުގެ ތެރޭގައި، 120 ބިލިއަން ރުފިޔާ ބޭރުގެ ދަރަނި ހައްލުކޮށް އެ ފައިސާ ދެއްކުމާއި، ރައްޔިތުންނަށް ސަރުކާރުގެ ކުންފުނިތަކުން ދަރާފައި ހުރި 9 މިލިއަން ރުފިޔާގެ ބިލްތައް ދައްކައި، އާމްދަނީ އިތުރު ކުރުން ހިމެނެއެވެ.

ރައީސްޑރ.މުއިއްޒު ވަނީ މީދޫ އަކީ ބިން ހުސްވެ، ފުރިފައިވާ ރަށެއް ކަން ފާހަގަކުރައްވާ، ރަށުގެ ބިން ބޮޑުކުރަން ފަޅުގައި މާބޮޑު ޖާގައެއް ނެތް ކަމަށް ވިދާޅުވެފައެވެ. އަދި މިރަށުގައި ގާތްގަނޑަކަށް 8 ނުވަތަ 10 ހެކްޓަރު ބިން ހިއްކެން އޮތް ކަމަށާއި، ފަޅު ހިއްކެން އޮތް އެންމެ ބޮޑު މިނަކަށް މި އަހަރު ތެރޭގައި ހިއްކައި ދެއްވާނެ ކަމަށް ރައީސް ޑރ.މުއިއްޒު ވިދާޅުވިއެވެ.

މިފަދަ މަޝްރޫއުތައް ހިންގުމަށް ބޭނުންވާ ވަރަށް ބަޖެޓްގައި ފައިސާ ޖަހައިދީފައި ނުވި ނަމަވެސް ރާއްޖޭގެ އިގްތިސާދު ކުރިއަރުވާ މުހިންމު ހުރިހާ ކަމެއް ކުރުމުގެ މަގު ފަހި ކޮށް، މި އަހަރު ތެރޭގައި އެ ރަށުގެ ތަރައްގީއަށް ބޭނުންވާ ގިނަ ކަންކަން ހިނގާނެ ކަމަށާއި، ރާއްޖޭގެ އެކި ރަށްރަށުގައި އެކި ސަބަބުތަކާއި ހެދި ނުނިމު ހުރި މަޝްރޫއުތައް ހިނގާނެ ކަމަށް ރައީސް ޑރ.މުއިއްޒު ވަނީ ވިދާޅުވެފައެވެ.