ރާއްޖޭގައި ޑިވޮލޮޕްމަންޓް ބޭންކެއް އުފެއްދުން ހިމެނޭހެން މުހިންމު މަޝްވަރާތަކެއް މިއަދުގެ ކެބިނެޓް ބައްދަލުވުމުގައި!

ރާއްޖޭގައި ޑިވެލޮޕްމަންޓް ބޭންކެއް އުފެއްދުމާއި އެނޫންވެސް މުހިންމު ގިނަ ކަންކަމާއި ގުޅޭގޮތުން ވަޒީރުންގެ މަޖިލީހުގައި މިއަދު މަޝްވަރާކުރައްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

މިއަދުގެ ވަޒީރުންގެ މަޖިލީހުގެ ބައްދަލުވުން ފެށްޓެވުމުގެ ކުރިން ރައީސް އޮފީހުގައި ހުންނަވާ، ވާހަކަ ދައްކަވަމުން ރައީސް ޑރ. މުޙައްމަދު މުޢިއްޒު ވިދާޅުވީ، ވަޒީރުންގެ މަޖިލީހުގެ މިއަދުގެ ބައްދަލުވުމުގައި މުހިންމު ކަންތައްތަކަކާމެދު މަޝްވަރާކުރެއްވުމަށް ނިންމަވާފައިވާކަމަށެވެ.

އޭގެ ތެރޭގައި ރާއްޖޭގައި ޑިވެލޮޕްމަންޓް ބޭންކެއް އުފެއްދުމާގުޅޭގޮތުން މަޝްވަރާކުރެއްވުމާއި، އޮންލައިން ޕޭމަންޓް ޕްލެޓްފޯމްތައް ބޭނުންކޮށްގެން ފައިސާގެ މުއާމަލާތްތައް ކުރުމުގައި ހުރި ހުރަސްތައް ނައްތާލުމާގުޅޭގޮތުން މަޝްވަރާކުރައްވާނެކަމަށް އެމަނިކުފާނު ވިދާޅުވިއެވެ.

އަދި އެއާއެކު ފަތުރުވެރިކަމުގެ ދާއިރާއަށް ސޯޝަލް ހައުސިންގ ކެޓެގަރީއެއް ތަޢާރަފުކުރުމާއި، މީޑިއާތަކަށް ޚާއްސަކޮށްގެން ޤާއިމުކުރުމަށް ނިންމާފައިވާ މީޑިއާ ވިލެޖުގެ މަސައްކަތްތަކާގުޅޭގޮތުންވެސް މިއަދުގެ ވަޒީރުންގެ މަޖިލީހުގައި މަޝްވަރާކުރެވިގެންދާނެކަން ރައީސުލްޖުމްހޫރިއްޔާ ވަނީ ފާހަގަކުރައްވައިފައެވެ.

ރާއްޖޭގައި ފުރަތަމަ ފަހަރަށް އިންވެސްޓްމަންޓް ބޭންކެއް ޤާއިމުކުރެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ. އެފަދަ ބޭންކެއް ގާއިމް ކުރެއްވުމުގެ މައިގަނޑު މަގުސަދު ކަމަށް އެމާނިކުފާނު ވިދާޅުވީ ބޭންކް މެދުވެރިކޮށް ކުޑަ އިންޓްރެސްޓް ރޭޓެއްގައި ތަރައްޤީގެ މުހިންމު މަޝްރޫއުތަކަށާއި، އަމިއްލަ ބޮޑެތި އިންވެސްޓްމަންޓްތަކަށް ލޯނު ލިބޭނެ މަގު ތަނަވަސްކުރުމެވެ.

އަދި އެފަދަ ބޭންކެއް ޤާއިމުކުރުމަށް ބޭނުންވާ "ޕޮލިސީ ފްރޭމްވަރކް" އެކުލަވާލުމަށް ރައީސް ޑރ. މުޙައްމަދު މުޢިއްޒުގެ ސަރުކާރުގެ ހަފްތާ-14 މަގުޗާޓުގައިވެސް ހިމަނާފައިވާއިރު ރައީސް އޮފީހުގެ ވެބްސައިޓް ގައި ވާގޮތުން މި ފްރޭމްވަރކް އެކުލަވާލުމުގެ %80 މަސައްކަތް މިހާރު ވަނީ ނިމިފައެވެ.