މޭޔަރ އިންތިޚާބުން ބަލިވީ ރައީސް ޔާމީން ނުލައި ނުކުތީމައެއް ނޫން: އަބްދުއްރަހީމް
ލިޔުންތެރިޔާ
ޚަދީޖާ އަރުފާ
އިއްޔެ ބޭއްވި މާލޭ މޭޔަރ ބައި-އިލެކްޝަންގައި ސަރުކާރު ހިންގާ މައި ޕާޓީ، ޕީއެންސީގެ ކެންޑިޑޭޓަށް ކާމިޔާބީ ނުލިބުނީ، ކުރީގެ ރައީސް، އަދި ޕީޕީއެމްގެ ކުރީގެ ރައީސް ޔާމީން އަބްދުލްގައްޔޫމް ފަހަތްޕުޅުގައި ނުހުންނެވީމަ ނޫން ކަމަށް ޕީއެންސީގެ ޗެއާޕާސަން އަބްދުއްރަހީމް އަބްދުالله ވިދާޅުވެއްޖެއެވެ.
އިއްޔެ ބޭއްވުނު މާލޭ ސިޓީ ކައުންސިލުގެ ބައި އިލެކްޝަނާއި ގުޅޭގޮތުން މަޢުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ، އެ އިންތިޚާބުގައި ޕީއެންސީއަށް މޭޔަރ ކަމުގެ ގޮނޑި ނުލިބުނީ ރައީސް ޔާމީން އެ ކެންޑިޑޭޓްގެ ފަހަތްޕުޅުގައި ނުހުންނެވުމުންތޯ ސުވާލު ކޮށްފައެވެ.
އެ ސުވާލަށް ޖަވާބު ދެއްވަމުން އަދުރޭ ވަނީ، މޭޔަރ ބައި އިލެކްޝަން ގައި ރައީސް ޔާމީންގެ ފަރާތުންވެސް ކެންޑިޑޭޓެއް ނެރުއްވިކަން ފާހަގަކުރައްވާފައެވެ. އަދި އިންތިޚާބުން ބަލިވީ ޔާމިން ފަހަތްޕުޅުގައި، ނެތުމުން ކަމަށް ވާނަމަ، ޔާމީންގެ ކެންޑިޑޭޓްގެ ވޯޓާއި ޕީއެންސީގެ ކެންޑިޑޭޓްގެ ވޯޓް އެއްކޮށްލުމުން، އިންތިޚާބު ކާމިޔާބުވާންޖެހޭނެ ކަމަށް އަދުރޭ ވިދާޅުވިއެެވެ.
އެއްގޮތަކަށްވެސް އެކަން (އިންތިޚާބުން ބަލިވީ ރައީސް ޔާމީނާ ނުލައި ނުކުތުމުންކަން) ގަބޫލު ކުރެވޭކަށްނެތް. އެއީ ރައީސް ޔާމިންވެސް ނެރުއްވި ކެންޑިޑޭޓެއް. އެ ކެންޑިޑޭޓާ، އަޅުގަނޑުމެންނަށް ލިބުނު ވޯޓާ އެއްކޮށްލީމާ، އެހެން ކަމަށް ވަންޏާ އަޅުގަނޑުމެން ވިން ވާނީ.
އަބްދުއްރަހީމް އަބްދުالله
މިއާއެކު، އަދުރޭ ވަނީ އިއްޔެގެ އިންތިޚާބުން ބަލިވީ ތައްޔާރު ނުވެވި، އެކަމަށް މަސައްކަތް ނުކުރެވުމުން ކަމަށް ތަކުރާރުކޮށް ވިދާޅުވެފަ އެވެ. އަދި އެކަމަށް ޕާޓީގެ މެންބަރުންގެ ކިބައިން މަޢާފަށް އެދިވަޑައިގެން، އެކަން ތަކުރާރު ނުވާނެ ކަމަށް ވަނީ ވިދާޅުވެފަ އެވެ.
އަދުރޭ މިހެން ވިދާޅުވެފައި ވާއިރު، އިއްޔެގެ އިންތިހާބުގެ ވަގުތީ ނަތީޖާ ދައްކާ ގޮތުން ޔާމިންގެ ކެންޑިޑޭޓު، ކުރީގެ ކޮމިޝަނާ އޮފް ޕޮލިސް ހުސައިން ވަހީދަށް ލިބިލެއްވީ 1888 ވޯޓެވެ. ޕީއެންސީގެ ކެންޑިޑޭޓް، ކުރީގެ ބަންޑާރަ ނާއިބު ޢާއިޝަތު ޢާޒިމާ ޝަކޫރަށް ލިބިލެއްވީ 5031 ވޯޓެވެ. ދެ ބޭފުޅުންގެ ވޯޓު އެއްކޮށްލުމުން، ޖުމުލަ 6919 ވޯޓު ވާއިރު، މިއީ އިންތިހާބު ކާމިޔާބު ކުރެއްވި، އެމްޑީޕީ ކެންޑިޑޭޓް އާދަމް އާޒިމަށް ލިބިލެއްވި ވޯޓަށްވުރެ މަދު އަދަދެކެވެ. ޢާޒިމަށް ލިބިލެއްވީ، 7،621 ވޯޓެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
