ވިއްސާރައާ ގުޅިގެން ފުލުހުންގެ އޮޕަރޭޝަނަލް ލެވެލް ތިނަކަށް

ރާއްޖެއަށް މިހާރު ކުރަމުންދާ ވިއްސާރައާ ގުޅިގެން، ދިވެހި ފުލުހުންގެ ޚިދުމަތުގެ އޮޕަރޭޝަނަލް ލެވެލް ތިނަކަށް ބަދަލުކޮށްފިއެވެ. މި ބަދަލާއެކު، ރައްޔިތުންގެ ރައްކާތެރިކަން ކަށަވަރުކޮށް، އެހީތެރިކަން ފޯރުކޮށްދިނުމަށް ޚާއްޞަ މަސައްކަތްތަކެއް ކުރަމުންދާކަމަށް ފުލުހުން މައުލޫމާތު ދީފައިވެއެވެ.

މާލޭގައި 55 ތަނެއްގައި ވެލި ބަސްތާ ޖަހައި، ފަސް ތަނަކުން ފެން ހިއްކައި، އަދި ފަސް ތަނެއްގައި ފެން ހިންދާ ޕަންޕު ޖެހުމަށް އެހީތެރިވެފައިވާކަމަށް ފުލުހުން ބުނެއެވެ. މީގެ އިތުރުން، ހުޅުމާލޭގެ މުޙައްމަދު ގާސިމް ޕްރީ ސްކޫލަށް ފެންވަންނާތީ ވެލިބަސްތާ ޖަހައި ރައްކާތެރިކަމުގެ ފިޔަވަޅުތައް އަޅާފައިވެއެވެ.

އަތޮޅުތެރޭގައިވެސް ފުލުހުން ދަނީ އެހީތެރިކަން ފޯރުކޮށްދެމުންނެވެ. ހދ. އަތޮޅުގެ ގިނަ ރަށްރަށުގައި ގޭގެއަށް ފެންވަދެ، މަގުތަކުގައި ފެންބޮޑުވެފައިވާތީ ފުލުހުން އެހީތެރިކަން ފޯރުކޮށްދީފައިވެއެވެ. ހަމައެހެންމެ، ހއ. އިހަވަންދޫ، ކެލާ އަދި ބާރަށުގައިވެސް ގިނަ ގޭގެއަށް ފެނުގެ އަސަރުކޮށްގެން އެހީތެރިކަން ފޯރުކޮށްދީފައިވެއެވެ.

ނޯތު ޕޮލިސް ރީޖަނުގައި ނ. މަނަދޫ އަދި ރ. ވާދޫގައި ފެންބޮޑުވުމުގެ މައްސަލަތަކަށް އެހީތެރިވެފައިވާއިރު، ބ. މާޅޮހުގެ މަގުތަކުން ފެން ހިންދުމުގެ މަސައްކަތް ކޮށްފައިވެއެވެ. ސައުތު ސެންޓްރަލް ޕޮލިސްގެ ސަރަޙައްދުގައި ދ. ހުޅުދެލި އަދި މ. މުލަކުގައި ފެންބޮޑުވެފައިވާތީ ގޭބިސީތަކާއި ސަރުކާރުގެ އިދާރާތައް ހިމާޔަތްކުރުމުގެ މަސައްކަތުގައި ފުލުހުން އެހީތެރިވެދީފައިވެއެވެ.

އައްޑޫ ސިޓީގައިވެސް ފުލުހުންގެ އެހީތެރިކަން ފޯރުކޮށްދީފައިވެއެވެ. ހުޅުމީދޫގައި ގެއަކަށް ފެންވަދެފައިވާތީ އެހީތެރިވެދީފައިވާއިރު، ގަމުގައި ގެއެއްގެ ފުރާޅު އެއްލައިލުމާއި އަނެއް ގެއެއްގެ ފުރާޅަށް ބަނބުކެޔޮ ގަހެއް ވެއްޓިފައިވާތީ ފުލުހުން އެހީތެރިވެފައިވެއެވެ.

ފުލުހުން މައުލޫމާތު ދޭގޮތުގައި، މި މަސައްކަތްތަކުގެ އިތުރުން ވެސް ރާއްޖޭގެ ހުރިހާ ހިސާބެއްގައި ރައްޔިތުންނަށް އެހީތެރިކަން ފޯރުކޮށްދިނުމުގައި ފުލުހުން ދަނީ ހަރަކާތްތެރިވަމުންނެވެ. އަދި ނެއިބަރހުޑް އޮފިސަރުން ގޭބިސީތަކަށް ޒިޔާރަތްކޮށް ރައްކާތެރިވުމަށް މައުލޫމާތު ހިއްސާކުރުމުގެ މަސައްކަތް ވެސް ކުރިއަށްދާކަމަށް ފުލުހުން ބުނެއެވެ.