ޗައިނާއަށް ދިން ކަމަށް ބުނި އެންމެ ރަށެއް ވެސް އަދި ނުދެއްކޭ!
ކުރީގެ ރައީސް އަބްދުﷲ ޔާމީންގެ ވެރިކަމުގައި ޗައިނާ އާއި ގުޅުން ބަދަހިކުރުމުން އެކަމާއި އެމްޑީޕީގެ ފަރާތުން ވަރަށް ބޮޑަށް ވަނީ ފާޑުކިޔާފައެވެ. ޗައިނާގެ މިލިޓަރީ ބޭހެއް ރާއްޖޭގައި ގާއިމްކުރާ ވާހަކަ އާއި ރާއްޖޭގެ ރަށްތައް ޗައިނާއަށް ދޭން ނިންމާފައިވާ ވާހަކައެވެ. އަދި ބައެއް ރަށްތައް ޗައިނާއަށް ދިން ކަމަށް ވެސް އެމްޑީޕީގެ އިސްބޭފުޅުން ވަނީ ތުހުމަތު ކުރައްވާފައެވެ.
ރައީސް ޔާމީންގެ ސަރުކާރުން "ދިރުވާލި" ކަމަށް ކުރީގެ ރައީސް މުހައްމަދު ނަޝީދު ތުހުމަތު ކުރެއްވި ރަށްތައް ދިނީ ޗައިނާއަށް ކަމަށް ވެސް ވާހަކަ ދެކެވިފައިވެއެވެ.
އެހެން ނަމަވެސް ވެރިކަން ބަދަލުވި ހިސާބުން ޗައިނާއަށް ދިން ރަށްތަކުގެ ވާހަކަ އެއް އެމްޑީޕީގެ އެއްވެސް ބޭފުޅަކު ނުދައްކަވައެވެ. ޗައިނާގެ މިލިޓަރީ ބޭހެއް ގާއިމްކުރަން ރައީސް ޔާމީންގެ ސަރުކާރުން ކޮށްފައިވާ މަސައްކަތެއްގެ ވާހަކަ ވެސް މެއެެވެ.
ސަރުކާރުގެ މުއައްސަސާތަކުގައި ހުރި މައްސަލަތަކުގެ ވާހަކަ ތަފާތު އެކި ގޮތްގޮތަށް ދައްކަމުން ގެންދިޔަ ނަމަވެސް ޗައިނާއަށް ދޫކުރި އެއްވެސް ފަޅު ރަށެއްގެ ވާހަކަ ނުދައްކަނީ ކީއްވެގެން ހެއްޔެވެ؟
ރައީސް އަބްދުﷲ ޔާމީންގެ ސަރުކާރުން ޗައިނާއަށް ރަށްތައް ދިނީ އެހާ ވެސް ސިއްރިއްޔާތުގައި ހެއްޔެވެ؟ ނުވަތަ އެރަށްތަކާއި ބެހޭ މައުލޫމާތު ހާމަކުރުމަށް ރަގަޅު ވަގުތު ނުޖެހެނީ ކަމަށް ވެސް ވެދާނެއެވެ.
ނުވަތަ ޗައިނާއަށް "ދީފައިވާ" ރަށްތައް އަތުލަން ސަރުކާރުން ޖެހިލުންވަނީ ކަމަށް ވެސް ވުން އެކަށީގެންވެއެވެ. ކޮންމެ ގޮތަކަށް އެކަން ވެގެން ދިޔަ ނަމަވެސް ރައްޔިތުންނަށް އެވާހަކަ ބަޔާންކޮށްދޭން ސަރުކާރުން ޖެހިލުންވާކަށް ނުޖެހެއެވެ.
ޖެހިލުންވެ އެ މައުލޫމަތު ހިއްސާ ނުކުރާ ނަމަ އޭގެއިން ދޭހަވާ މާނައަކީ ޗައިނާއަށް ރަށްތައް ދޫކުރި ކަމަށް ބުނެ ދެއްކީ ފުލޯކު ވާހަކަ ތަކެއް ކަމެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
