މަޖިލިސް އިންތިޚާބު އިންސާފުވެރި ނުވާނެ - ސައީދު

ކުރިއަށް އޮތް މަޖިލީހުގެ އިންތިޚާބު އިންސާފުވެރިނުވާނެ ކަމަށް ކުރީގެ އިކޮނޮމިކް މިނިސްޓަރ މުހައްމަދު ސައީދު ވިދާޅުވެއްޖެ.

ޕްރޮގްރަސިވް ކޯލިޝަނުން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަމުން މިފަހަރުގެ މަޖިލީހުގެ އިންތިޚާބުގައި ވާދަކުރައްވަން ވެސް ނިންމާފައިވާ މުހައްމަދު ސައީދު ވިދާޅުވެފައިވަނީ އިންތިޚާބުގެ މިނިވަން ކަމުގެ ވާހަކަދައްކާއިރު މިހާރު ރާއްޖޭގެ ސިޔާސީ މައިދާނުގައި ހުރި ހަމައެކަނި އިދިކޮޅު ލީޑަރު ހައްޔަރުކޮށްފައިވާކަމަށެވެ. އަދި އެއިންވެސް ދޭހަވަނީ ކުރިއަށް އޮތް މަޖިލީހުގެ އިންތިޚާބު އިންސާފުވެރި ނުވާނެ ކަން ކަމަށް އޭނާ ވިދާޅުވިއެވެ. އަދި އިންސާފުވެރި އިންތިޚާބެއް ބާއްވާނެ ނަމަ އިދިކޮޅު ލީޑަރު ހައްޔަރު ނުކުރާނެ ކަމަށް ސައީދު ވިދާޅުވިއެވެ.

އެމްއެމްޕީއާރްސީގެ މައްސަލައިގައި އެތައް މީހުން ހިމެނޭއިރު ހައްޔަރުކޮށްފައިވަނީ ހަމައެކަނި ރައީސް ޔާމީން ކަމަށާއި، އެހެން ކަމުން މަޖިލިސް އިންތިޚާބު އިންސާފުވެރިތޯ ނޫސްވެރިންވެސް ސުވާލު އުފައްދަން ޖެހޭނެ ކަމަށް އޭނާ ވިދާޅުވިއެވެ.

އަދި ރައީސް ޔާމީންގެ ފަރާތުން އިންތިޚާބުގައި ބޭފުޅުން ވާދަކުރައްވަން މަސައްކަތް ކުރާއިރު، އެ މަނިކުފާނު އިންތިޚާނުގެ ޚަރަދުތަކުގައި ބޭނުންކުރުމަށް އެކި ފަރާތްތަކުން ޖަމާ ކޮށްފައިވާ ފައިސާތައްވެސް ފްރީޒް ކޮށްފައިވާ ކަމަށް ސައީދު ވިދާޅުވިއެވެ.

އެހެން ކަމުން އެއްވެސް ހާލެއްގައި ކުރިއަށް އޮތް މަޖިލީހުގެ އިންތިޚާބު އިންސާފުވެރި ނުވާނެ ކަމަށް އޭނާ ވަނީ ވިދާޅުވެފައެވެ.

އިދިކޮޅު ލީޑަރުކަމަށް ޕްރޮގްރެސިވް ކޯލިޝަނުން ގަބޫލުކުރާ ޔާމީންގެ ވެރިކަމުގައި ރިޔާސީ އިންތިޚާބު ބާއްވަން ވާއިރަށް އޭރުގައި ތިބި ސިޔާސީ ލީޑަރުން ޖަލަށްލި ކަން ފާހަގަކޮށްލެވެއެވެ.

އަދި ރިޔާސީ އިންތިޚާބު ބާއްވާ ނަތީޖާ އިއުލާން ކުރަންދެން އިލެކްޝަން ކޮމިޝަނަށް ތައުރީފުކޮށް އެބޭފުޅުން ވާހަކަދެއްކެވިއިރު، އިންތިޚާބު ނާކާމިޔާބު ވުމާއިއެކު އިލެކްޝަންސް ކޮމިޝަނުން މެމްބަރުންނަށް ރައީސް ޔާމީނަށް ތާއީދު ކުރާ ފަރާތްތަކުން ވަނީ ވަރަށް ބޮޑަށް ފާޑުކިޔާފައެވެ.