ކޮންމެ ރައްޔިތަކަށްވެސް ހަމަހަމަކަމާ އެކު ރައީސަށް ސުވާލު ފޮނުވޭނެ ނިޒާމެއް ޤާއިމްކުރަނީ

ހަމަހަމަކަމާ އެކު ކޮންމެ ރައްޔިތަކަށްވެސް ރައީސުލްޖުމްރޫހިއްޔާއާ ސުވާލުކުރެވޭނެ ނިޒާމެއް ޤާއިމްކުރަން ނިންމަވާފައިވާކަމަށް  ރައީސުލްޖުމްހޫރިއްޔާގެ އޮފީހުގެ ޗީފް ސްޕޯކްސްޕާސަން ހީނާ ވަލީދު ވިދާޅުވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމުގައި ހީނާ ވިދާޅުވީ ޢާންމު ރައްޔިތުން ރައީސާ ކުރަން ބޭނުންވާ ސުވާލުތައް ކުރުމުގެ ހަމަހަމަ ފުރުސަތުތަކެއް ދިނުމުގެ ގޮތުން, ވީޑިއޯ މެދުވެރިކޮށް ރައީސާ ކުރަން ބޭނުންވާ ސުވާލުތައް ރައީސް އޮފީހަށް ފޮނުވޭނެ ޚާއްސަ ނިޒާމެއް ގާއިމް ކުރަމުންދާ ކަމަށެވެ.

"ހަމަހަމަ ފުރުސަތުތައް ހުރިހާ ފަރާތްތަކަށްވެސް ހޯދައިދިނުމުގެ ގޮތުންނާއި އަދި ހަމަ އެއާއެކުއެކީގަ ވީހާވެސް ގިނަ ފަރާތްތަކަށް ރައީސުލްޖުމްހޫރިއްޔާއާ ސުވާލު ކުރެވޭނެ ފުރުސަތު ތަނަވަސް ކޮށްދިނުމުގެ ގޮތުން އަޅުގަނޑުމެން މިހާރު މި މަސައްކަތްކުރަނީ ސުވާލުތައް ވެސް ވީޑިއޯ މެދުވެރިކޮށްވެސް ރައީސުލްޖުމްހޫރިއްޔާގެ އޮފީހަށް ކޮންމެ ބޭފުޅަކަށް ވެސް ފޮނުވޭނެ ނިޒާމެއް ގާއިމު ކުރުމަށްޓަކައި."

ހީނާ ވިދާޅުވި އެވެ.

ހީނާ ވިދާޅުވިގޮތުގައި މިހާރު ގެނެސްދޭ ރައީސްގެ ސުވާލާ ޖަބާވު މިހާރު ކުރިއަށްދަނީ މަގުމައްޗަށް ނުކުމެ ނޫނީ ރަށްރަށަށް ދާއިރުވެސް ރެންޑޮމްކޮށް ރައްޔިތުން ބޭނުންވާ ސުވާލުތައް ނަގައިގެން ކަމަށެވެ. އަދި މިގޮތަށް މި ޕްރޮގްރާމް ކުރިއަށް ގެންދިޔުމުން، ހުރިހާ ރައްޔިތުންނަށް ހަމަހަމަ ފުރުސަތެއް ނުދެވޭކަން ހީނާ ވަނީ ފާހަކަކުރައްވާފައެވެ.

މީގެ އިތުރުން މިއަދުގެ ނޫސްވެރިންގެ ބައްދަލުވުމުގައި ހީނާ ވަނީ, މައުލޫމާތު ފޯރުކޮށްދިނުމުގެ ގޮތުން ރައީސް އޮފީހުން ކުރަމުންދާ ބައެއް އިތުރު މަސައްކަތްތައް ހާމަކުރައްވާފަ އެވެ. އެގޮތުން ކެބިނެޓް ބައްދަލުވުން ތަކުގެ މައުލޫމާތު ނޫސްވެރިންނަށް ފަސޭހައިން ލިބޭ ނިޒާމެއްވެސް ޤާއިމުކޮށް ރައީސް އޮފީހުގެ ވެބްސައިޓާ ލިންކު ކުރާނެ ކަމަށް ހީނާ ވިދާޅުވިއެވެ. އަދި ސަރުކާރުގެ އޮފީސްތަކާއި ކުންފުނިތަކުން ބައިވެރިވާ ހުރިހާ ކަމެއްގެ ފޮޓޮއާއި ޚަބަރު އެއްތާކުން ލިބޭ ނިޒާމެއް ވެސް ގާއިމްކުރުމުގެ މަސައްކަތް ކުރަމުންދާ ކަަމަށް ހީނާ ވިދާޅުވި އެވެ.